【重甜】【明就明 唔明就黎明】《XG快落》(7)

然後就用軍刀挖挖個大樹菠蘿殼...整到成個盆咁...

幾靚仔～冇穿冇爛～試試得唔得先～

走去湖邊...啲湖水清澈見底，應該冇問題嘅～

我就𢳂滿個大樹菠蘿～冇漏水～就行返埋去～勾喺個火堆之上～煲水～

再用把軍刀切切啲蘑菇～

大家都眼甘甘咁望住我切開啲蘑菇放落煲水裡面～

『做咩吖？』放多少少...

晴晴咬住舊大樹菠蘿：「整蘑菇湯？」

『係吖～幾好吖～』我搵支樹枝吉住粒大粒啲嘅蘑菇，『再唔係燒都仲得～』

大家見到我燒蘑菇，好似好得意咁～

我就吉埋俾大家一齊燒～

邊食大樹菠蘿～邊燒蘑菇～

『睇熱吖～』又整多幾個大樹菠蘿碗分啲蘑菇湯一齊飲～

邊食邊飲～邊抖抖～總算充咗飢～有返啲體力～

『好喇～』我用幾支粗啲嘅樹枝，整再幾碌矛，企返起身，『睇吓得唔得先～』

「嗯？」晴晴一頭問號咁打量住我，「得唔得咩吖？」

『捉魚囉～』我回頭望住晴晴，『預備定今晚嗰餐吖嘛～』

有體力就要做嘢～

晴晴同細孖就照顧住惠惠同大孖～

我就走去湖邊捉魚～

行出啲～再行出啲～就已經見到有唔少魚游嚟游去～

果然呢！呢個湖咁清～養到唔少魚～

仲要條條都幾大條咁～然後就要睇我嘅眼界喇！

望住！對準！一支矛飛埋去！

唔中...啲魚游開晒...

第一次姐～再嚟過！

望住！對準！一支矛飛埋去！

又唔中...

唔怕！咁多魚喺度，總有一次中！

嘗試！失敗...嘗試！失敗...再嘗試！

『Yes！』終於成功！

上咗手就容易啲！

我就繼續努力！越捉越大條！

唔覺唔覺，都已經差唔多日落～

我拎戰利品返去...

「喂咁耐㗎～」晴晴向我揮揮手～

『差唔多啦～』我舉起啲戰利品，『你哋睇吓捉咗幾多返嚟～』

大家就圍住個火堆，燒魚食～

燒吓燒吓～天都開始黑～

「小心睇熱吖～」晴晴就餵惠惠食魚～

細孖都照顧住大孖～

大家都食得好滿足～

『呢種生活...』我望住火堆，『都唔錯吖～』

「係唔錯～」晴晴點點頭～

大孖都點點頭：「難得嘅平靜...」

細孖都點點頭：「都好耐冇試過...」

『一直都過住呢種平靜嘅生活...』加加樹枝，『幾好吖～』

「最起碼都要...」晴晴諗一諗，「救返新哥出嚟先...」

『救新哥？』唔係吖化？

「嗯！」晴晴好認真咁點點頭，「一定要救新哥出嚟！」

大細孖都點點頭！

『喂點救吖...話唔定...話唔定...阿南話國安局都應承咗俾佢喺幻覺中過更好嘅生活！已經有人有出賣嘅心！我哋仲走去救...一來更加危險！二來...都唔知新哥仲有冇命...』我唔係搵藉口！我係有分析過！

「咁就更加要救新哥出嚟！」晴晴嘅眼神好堅定！

點解更加呢？

「新哥係我哋呢隊當中，唯一一個知啲Pure&True喺邊度造...」晴晴再諗諗，「甚至袁博士嘅身處位置！」

袁...袁博士？

「每隊都只有隊長知...」細孖接住講，「你話阿南出賣咗我哋...咁佢一定有話俾國安聽呢個情報...國安都唔會殺新哥，一定係想捉佢去逼供。」

逼供...

「以佢哋嘅藥物...」晴晴接住講，「就算新哥再意志堅定...都好難可以守口如瓶...呢個就係...佢哋嘅真正目的！」

真正嘅...目的？

同時...亦係點解晴晴咁肯定國安班人已經走晒...唔再追捕我哋...

『咁...咁就算要救...都要搵人幫手啦！我哋有其他隊㗎嘛！去搵咗其他隊幫先啦！』呢啲時候就真係人多好辦事！

大孖擰擰頭：「同時每隊都只有隊長同其他隊長互通消息...所以我哋都搵唔到幫手...」

乜...乜原來係咁㗎？

『咁仲點救吖？得我哋幾個？』唔好話人已經夠少...仲要傷嘅傷，仲有小朋友，『唔好玩啦...同自殺有咩分別呀？！』

「就算自殺都要！」晴晴緊握拳頭！「你都唔想咁美麗嘅景色...被魔爪搞到寸草不生㗎！」

咁美麗嘅景色...寸草不生...

我回望一片千島湖夜景...

「俾佢哋知道袁博士嘅身處位置...」晴晴搭住我膊頭，「我哋嘅最後希望就幻滅㗎喇...」

最後希望...袁博士...

『咁我哋都要知去邊度救㗎...』唔知新哥被捉去邊...講乜都冇用...

晴晴拍拍我膊頭：「赤鱲角...」

『赤鱲角？』機場？

「嗯！」晴晴點點頭，「你都見過幻覺之中嘅赤鱲角機場...實際唔係機場...係監獄...」

係...監獄？！

細孖接住講：「赤鱲角嘅監獄係勞役嘅地方...專捉啲有異心嘅市民入去...當中仲包括...我哋嘅成員...」

赤鱲角...赤鱲角...原來係...

晴晴一轉身：「咁我哋計劃聽日嘅拯救行動！」

真係要計劃嘛？

真係要去赤鱲角監獄救新哥嘛？

就憑我哋...幾個？！

TO BE CONTINUED

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～

三句預告

[Day 14－拯救行動] PART 01

今朝好早就起咗身...

有幾早？

已經將[Day 13－背後匕首] PART 04 Upload上Penana

會唔會係毒菇

綽廷仲諗可以過呢種無憂無慮(一皇四后)嘅平靜生活, 點知就嚟個熱血嘅睛睛，仲要聽日即刻去救人

咁真嘅機場去咗邊

晴晴識分㗎嘛

你連惠惠都計埋落去
救人要緊吖嘛

仲邊會有機場 封咗城㗎喇嘛

橫掂呢個故有晴晴呢個學生妹, 咁幼稚園/小學生妹惠惠咪一樣

唔通係要準備香港版法國大革命

好叻女呀

香港大革命
但係傷得嘅傷 依家真係元氣大傷
睇黎要啲時間重整旗鼓
起碼要有返啲裝備係手先有得同人鬥

大家都好了解飛揚
當然計埋惠惠

唔可以傷害小妹妹㗎

係XG版

話晒做開大事