【甜故】我愛上咗個Miss，點知發現佢係淫底

喺話畀Vivian知道後，我冇特別點理佢點樣處理呢件事。或者呢種只係我轉移責任嘅方法，但我已經覺得自己可以唔使再點諗呢件事，直到幾日後我收到一個電話。


我同John間唔中都會一齊爬山。我之前講過我自從轉行做補習，時間變得更靈活，多咗時間做自己嘢，於是我就諗住去以前冇時間去嘅地方。去咗幾次外國後，我發現我唔太鍾意出國，哪怕係日本我都覺得辛苦同麻煩，只願喺香港四處走。而朗日之下，香港群山總係被照得神采奪目。喺搭車路經彩虹時，獅子山頭揚首，令我諗起我後生嘅時候，帶學生去郊野公園學校旅行嘅時光。依家我年紀唔算細，趁依家有心力有時間，我周圍去行山，帶埋阿John去，免得一個人行山有啲乜嘢麻煩。之所以搵佢，係因為佢係我識得嘅後生仔中，最得閒嘅一位。

而佢呢次打電話畀我，約我去爬山。我如願應邀，喺巴士站等佢，一齊出發。我唔肯定呢個時候Vivian有冇話畀佢知件事，但佢同我坐巴士嘅時候，並冇提及任何有關嘅嘢，只係閒話家常。

我哋到達目的哋後，就一齊爬山。沿路風景鬱鬱蔥蔥，而人唔係好多。我哋一步一步從大路走上迤邐山路。轉進高地，荊榛滿目，但可以喺罅度睇到市區嘅大廈群好似初生嘅竹筍噉。我哋繼續上路，但行多幾步，我哋步伐慢起嚟，而且氣喘喘噉。John見我噉樣，都放慢腳步。我哋隨後到一處涼亭唞下。


我擺出個大水壺補充水份。正好飲完水後，John就開口講嘢。

「我本來想一開始就問，但係我心入面仲係諗緊應唔應該問。」佢話，我被佢冇頭有尾嘅說話搞得唔明白。

「我之前同你講過Zoey嘅事，而你應該本來都知道啲嘢。我唔知道你知道幾多，但我希望你冇做到嗰件事嘅幫兇。」佢話。

「『幫兇』？乜嘢意思，你想表達啲乜嘢？」我被佢嘅說辭激嚫。佢好似想質疑我哋乜嘢，明明我冇做過啲乜嘢。

「Zoey係喺你教過嘅學校度讀過書，而你應該都知道嗰啲事。」佢話。

「係呀！我唔係同你講過咩？Zoey嘅事情就係我善後，如果你覺得我cover up件事唔道德，噉我都冇乜嘢好講，但呢件事揚咗，對所有人都冇好處，包括作為受害者嘅Miss Wong。」我話。

「我唔係指呢樣嘢，我指嘅係之前嘅事。」佢話。

「之前嘅事？」我問。

「你知唔知道佢同佢嘅老師住埋一齊？」佢問。

「你話Zoey佢同我哋學校老師一齊住？究竟係點樣嘅一回事？同埋係邊個老師？」我驚訝噉問道。而佢見我懵然不知嘅樣，就將佢所知嘅事講出嚟。於是我知道咗Zoey同何Sir同居嘅事。

我千言萬語想講出嚟，但係嘴好似封住咗噉，只可以沉默以對。我需要時間去消化消化。我低頭思考緊我所聽到嘅一切，從何Sir收留Zoey到凌辱Zoey，然後造成Miss Wong嘅私密片外泄，呢一切喺我嘅腦入面開始形成更清晰嘅因果關係。之但係，我仲覺得模糊，畢竟John唔係巨細無遺噉話畀我知。而最關鍵嘅問題係，點解Zoey要住喺何Sir屋企？我開口嘅第一句說話，就係追問呢個問題。

「呢一層你唔需要知道。」John話，面對我嘅提問，冇正面回應。而我諗唔明白乜嘢叫「我唔需要知道」，佢講一半唔講一半，唔通我唔值得知道真相？

「呢件事係真嘅話，我就要嚴肅處理。而你提供嘅證據好關鍵。所以我想你講晒你所知嘅嘢出嚟。我知道何Sir依家喺邊度教書，而我都識得嗰度嘅校長。只要我去投訴，何Sir要為佢過嘅事付上代價。到時Zoey到⋯⋯」


而John用詫異嘅目光望住我，呢種眼神甚至帶有一種輕蔑嘅態度喺度，教我不忿。


「你唔信呀嘛？我就依家打電話過去。我有佢哋嘅羅校長電話，我哋本來就係同屆嘅大學同學嚟，只要我打電⋯⋯」

「你係認真嘅？你覺得十年前嘅事，就用一通電話就可以搞掂？」佢話，「你依家就淨係得我一面之詞，又可以做啲乜嘢？更何況，你依家只係一時激動，你唔可以好縝密去諗嘢，所以我勸你先乜嘢都唔好做住先。我之所以話畀你知呢件事，係因為我想你好好噉諗下你可以做到嘅事。我知你當年都有份隱瞞私密片外泄⋯⋯」

「我係為咗大家好！為咗Miss Wong好！」我激動大嗌。

「但有啲事，無論過咗幾耐，都總要有人幫手討回公道。」佢話，「但唔係喺呢種懊惱嘅情緒下唔理智噉去做。我知道你之所以聽到我嘅解釋後神色驟變，係因為你意識到你當年嘅舉動放跑咗何Sir。而你要聽我講，我唔怪你，但你要冷靜落嚟，再諗辦法。」

我深呼吸，平靜落嚟，然後再問：「但我都想知道真相，究竟點解Zoey佢要同何Sir一齊住，唔通佢愛上咗何Sir？（呢個時候我諗起自己到薇薇嘅事）唔通係何Sir要脅佢？」

「我唔可以講。」佢話，「呢件事，比原先以為嘅，仲要牽涉更多嘅嘢。」然後突然沉默，沉默得令我嘅疑惑越發強烈。

牽涉更多嘅嘢？呢件事仲可同乜嘢扯上關係？正當我疑惑時，一段記憶直擊我腦袋——Zoey嘅失蹤，同我喺佢屋企上𥄫到嘅嗰個圖案。

張Sir篇應該會喺今個星期內完結，之後會連載最後一篇嘅Mary篇

「你已經知道我當年發現嘅事，係唔係？」我話，「發現咗Zoey嘅事同你爸爸嘅連繫。」


佢點點頭。

「你應該其實好早就已經發現你爸爸失蹤嘅事。如果唔係Helen講，噉即係話，係你自己好早就自己去深挖呢件事。而你之後一聽到我話要搵Zoey，就聯想到Zoey同你爸爸件事嘅關係。」我話。

「冇錯，就算阿媽冇同我講，我都用咗自己嘅方法去知道原來屋企曾經發生過噉嘅事。而Zoey嘅事，係你委託我調查後，我先起疑心。然後我順藤摸瓜先搵到越嚟越多嘢，我先知道兩件咁唔拉間嘅事原來係互有聯繫嘅。我睇咗你當年喺警方落嘅口供，我知你知道嗰啲圖案嘅事。而呢一切嘅真相係點，雖然我都開始去查，但我係講唔清楚。所以我冇辦法去解釋畀你。」佢話。

「即使係Zoey同何Sir同居嘅原因都係呢件事嘅一部份？即使係噉，你都唔可以話畀我知？」我問。

佢冇回應。

「但點解你要講同居嘅事畀我知？」我問。

「我諗，有啲事，應該要交畀合適嘅人去知。雖則我可以查到你查唔到嘅嘢，但你可以做到我做唔到嘅事。我將呢件事話畀你知，我希望你可以做啱嘅事。我唔係想指點你，我只係知道我將呢件事講畀你知，我會放心啲。」佢話。


「你講嘅嘢，我明白嘞。你爸爸嘅事，咁多年嚟我做唔到啲乜，我好抱歉。我喺件事上，乜嘢都幫唔到手。你只係用唔多嘅時間，就已經知道好多連我都唔知道嘅事情。如今呢件事就交畀你嘞。」我話。

將所有說話盡吐出嚟後，我哋轉換心情，重新爬山。

去到山頂，已喺日落時分。我哋兩人靜觀夕陽。呢幅景象此前同今後想必會一直重覆啩。

同佢度過呢一日後，我反覆盤算住應該點樣處理何Sir嘅事。直接舉報十年前嘅事睇落唔現實，但一時之間，我都冇乜嘢好辦法。諗嚟諗去，都係覺得去直接同佢對質為好。

我去聯絡嗰位喺何Sir間學校做嘅校長，得知何Sir依家住喺邊。與其放暗箭噉舉報佢，我寧願去聽下何Sir嘅解釋。

喺去見何Sir嘅前一晚，我臨瞓前同薇薇傾偈，無意中隨口問：「你覺得我同何Sir有乜嘢分別？我哋都同個學生有路。」

「冇乜分別㗎，不過差別在於你遇上我，而唔係第個，」佢笑笑口，調皮噉同我話，「而且你比佢更死纏爛打啲，點趕都趕唔走。」

我止唔住噉笑，然後錫啖佢。