【陳頌文隨筆】單刀嗰刻其實好緊張
【Now Sports】今個球季結束,我認為自己嘅表現還可接受,不過有啲地方可以再做好啲,而我會用「大起大落」總結今季。
撰文:陳頌文
同上季比較,我覺得進步嘅地方係開始適應身體對抗。雖然都係成日唔夠對手嚟,不過已經比上季好少少。今季取得1個入球1次助攻,都係代表AFC Fylde嘅時候。講到自己英甲第一個入球,除咗開心興奮之外,都諗唔到點形容。
嗰場比賽對手係哈特斯菲,當時佢哋排名比AFC Fylde高1位,所以實力接近。教練臨場調我踢前鋒,當時嘅情況係對手開出角球,被我哋門將接實,而我係1 VS 1對住對方中堅,見到自己有空位就舉手要波,keeper都注意到就大腳斬前,個波落喺我同中堅嘅身前係五五波,我攞到個波推向前就單刀,嗰一刻其實好緊張、好驚。一來人哋高大過我,自己怕唔夠佢快,同埋呢下都算係黃金機會,又驚自己把握唔到,好彩最後都射入。
入完波嗰下,其實自己都呆咗,即時諗嘅係,入到一球即係有機會再入多球!總結成季,我覺得自己需要改善嘅地方仍然係身體對抗,其次係閱讀球賽能力。依家啲對手比我更有經驗,有時一諗到要做咩嗰下,對手已經埋到身,然後就失咗波。所以希望呢方面可以做得更好。
如果用一個詞語形容今季,我會話係「大起大落」。首先因為季初加入布力般流浪,之後借咗去Halifax FC,諗住有多啲機會,可惜同我諗法並唔一樣;然後再轉去AFC Fylde踢6場比賽,有5場正選,機會多咗,仲爭取到入球同助攻。
下一季目標?希望可以完全適應英甲比賽,然後爭取更好表現。
撰文:陳頌文
曾效力曼城青年隊、史篤城預備組,今季由布力般流浪U21外借到Halifax FC及AFC Fylde