吉列嗰啲多層刀片又貴又傷皮膚
點解冇人講下啲真係好用嘅剃鬚刀
同大家分享下常見嘅剃刀種類:
1. 電動剃鬚刀 (電鬚刨)
好處: 容易使用, 快, 可以乾剃
壞處: 剃唔乾淨, 難清潔, 容易引起皮膚敏感/毛髮內生, 價格昂貴
用過電鬚刨都知道有幾方便快捷, 基本上30秒內一定剃完
缺點係冇可能剃得乾淨, 點都會有少少鬚根
金屬網同刀片中間容易累積污垢, 清洗唔方便
個鬚刨唔防水就仲難搞
所以用鬚刨剃鬚塊面成日都生好多粒粒
總括而言, 除非閣下好趕時間+對衛生同面部皮膚零要求
否則強烈唔建議用電鬚刨
2. 替換式刀頭/多重刀片剃刀 (cartridge razor)
好處: 使用難度低, 不易剃傷皮膚, 較電鬚刨乾淨
壞處: 刀頭貴, 長期使用成本最高, 容易引起皮膚敏感/毛髮內生
市面上最容易買到嘅手動剃刀
刀頭設計可以上下活動, 無論手柄任何角度都可以保持刀頭貼合面部輪廓, 所以使用相當簡單, 用力過大都唔容易剃傷
比電鬚刨剃得更乾淨 (雖然未至於完全貼服)
不過呢類剃刀有好多問題
第一, 雖然廠方聲稱刀頭可用一個月, 實際上剃5次左右已經變鈍要更換; 以刀頭價格平均一片$30 (最平款$20) 計算, 每兩日一次剃鬚, 一年成本已經大過$1000
第二, 如果你夾硬每片用足一個月, 鈍左嘅刀片會扯斷鬍鬚, 引起皮膚出血, 發炎, 毛髮內生等等
第三, 多重刀片唔會比一塊鋒利嘅刀片剃得更乾淨, 反而會剃走表層皮膚, 長期使用會引致皮膚敏感
3. 安全剃刀 (safety razor)
好處: 乾淨, 衛生, 不易引起皮膚問題, 長期使用成本最低, 品牌/型號選擇多
壞處: 有使用技巧, 手法不當容易剃傷
最推薦嘅剃刀
可細分為單面 (single edge/SE) 同雙面 (dual edge/DE)
DE safety razor喺討論剃鬚嘅圈子當中, 公認為最適合日常使用嘅剃刀
可以剃到完全貼服冇晒鬚根, 唔會引起皮膚問題, 刀片容易更換, 成本低廉 (刀片價格平均一塊$0.5-1)
剃刀設計非常多, 鋒利度由溫和到貼面, 手柄材質由金屬到木材任君選擇, 可以按個人需要決定
刀片選擇亦同樣充足
缺點為使用上有一定技巧, 要時間上手
初學者可能間中會剃損, 或者花費較多時間剃鬚
話雖如此, 一般而言剃3-4次已經可以掌握基本技巧
4. 直式剃刀 (straight razor)
好處: 乾淨, 衛生, 不易引起皮膚問題, 觀賞度高, 型
壞處: 使用難度最高, 容易剃傷, 日常維護困難, 價格昂貴
最傳統嘅剃鬚方法, 理論上可以最容易做到完全乾淨效果
不過上手難度極高, 角度稍有差錯就馬上見紅
要定期保養預防生鏽, 搵有經驗師傅磨刀保持鋒利
單價最平都$1000以上
建議留返比高手或者barber shop啲老師傅使用
希望以上資訊幫到大家
有經驗嘅巴打都可以分享下
唔用都得嘅，對皮膚冇咁好啫
