(我頂,喺連登答呢啲好需要勇氣)
我係絲打,岩岩做咗媽媽幾個月
身體變化都係果幾樣啦,身體會水腫,比以前肥咗啲,肚上面會有少少紋同鬆左D,胸而家哺乳期會大咗好多(希望以後唔好下垂)
講真每個女性應該呢段時間都會有身材焦慮,生完頭兩個月根本唔想比先生見到自己個身體,會好冇自信😞
但因為生之前其實已經同先生傾過呢個問題,所以佢一直都好有耐性,同埋會確保我已經準備好同埋身體恢復得差唔多先至再「開飯」。其實頭幾次就算用咗用和仔都唔一定順利,都係會覺得痛,好彩先生體貼,一直都係照顧我感受為先,唔舒服嘅就會停,攬住瞓覺過幾日再試。同埋佢會不停讚我靚,話肚上面啲文一啲都唔醜樣,只會令佢更加心痛,會幫我用精油按摩個肚同小腿。
講真我覺得自己都好好彩,我老公係呢段時間比我十足10嘅支持安慰,想像唔到如果遇着啲男人把口賤格笑/埋怨你身材走樣嘅話真係可能以後都冇自信喺佢面前除衫😢
另外生完之後性慾減低係絕對正常,因為催乳素會壓抑性慾同排卵,所以一般要等BB斷奶之後催乳素減低同其他女性荷爾蒙回復正常水平先至會增加返性慾。荷爾蒙嘅嘢就好難控制到㗎喇,男士們唯有體諒吓啦。
我覺得好多男士有問題係因為佢哋冇預先做功課
以為生完個BB一個月傷口好返就等如返返去以前嘅狀態
但係女人由懷孕到生完BB斷奶之前呢兩年時間其實根本好似撞咗邪咁,身體同荷爾蒙會不受自己控制,情緒大上大落好多時真係自己都唔想架。
坊間啲瘦身廣告成日吹到啲明星生完之後三個月就收返呢啲根本唔正常,令到好多女士有好多壓力。男士們如果想提升返同太太之間嘅親密關係,首要條件係你要無時無刻都鼓勵同支持你太太,令佢哋對自己有返自信心。
女人嘅「性」係源自於「愛」,你如果令佢覺得自己不被愛,佢又點會想同你有性?