2023 NFL Season (1)

基本規則

美式足球係回合制運動，兩隊會輪流進攻同防守，以推進去對方陣地為目標。每場打4節，每節15分鐘，攞得多分嗰隊贏。

進攻端有4次進攻機會，每次進攻可以向前傳一次或者向前跑，直至傳球失敗/持球者跌落地/走出界/被推停。如果4次進攻內成功推進10碼，就重新獲得4次進攻機會 (1st down)。如果用盡4次進攻都推進唔到10碼就會原地攻守互換。

得分方法基本上有兩種，達陣同踢球。達陣即係成功推進去防守端盡頭，會即刻攞6分再加追加得分機會。追加得分機會踢入可以攞多1分，達陣可以攞多2分。踢球即係喺進攻時將個波踢入龍門，一般都係第4次進攻而又喺射程範圍內先會踢，攞3分無追加得分機會。

如果第4次進攻時唔喺射程，好多時進攻端會選擇棄踢(punt)，一腳兜走個波等對方攻守互換喺後啲既地方開始進攻。

如果進攻端傳球俾防守方截到(波落咗地唔計)，或者跑跑吓甩波俾防守端執到，就即時turnover。防守方可以即時推進再喺停低嘅位置開始計4次進攻。

多數進攻會四分衛(Quarterback)發動，喺Lineman保護下將個波向前傳俾Wide Receiver/Tight End，或者由Lineman開路將個波交俾Running back跑陣。防守方就要盡力阻止接球跑陣，或者直接擒低四分衛

NFL全聯盟32隊分兩個Conference，常規賽每隊打17場，每個Conference出7隊打季後賽，單場淘汰打到出總冠軍。



優點

1. 節奏超快。每一個進攻3-10秒內要執行晒所有戰術，40內要開始下一次進攻。而且每一次進攻機會都好重要，差1碼就係差1碼要攻守互換。

2. 極少機會有垃圾時間。如果3次進攻都推進唔到10碼再棄踢，1分鐘左右就完咗一次進攻要攻守互換。所以就算領先好多都要盡力進攻，唔會有機會鳩猜波燒時間 (金飛龍呢啲戰術係漫畫先有)。美式足球反勝機會好高，上季有場0-33反勝同季後賽0-27反勝。

3. 每場波都好重要。因為NFL場數少，一季打得17場，好多時入唔入到季後賽都係差一場半場。季後賽全部一場過，基本上唔會有機會俾佢哋hea打。


缺點

1. 時間極西。賽程固定香港時間星期五朝早打1場，星期日晚(凌晨)開始打到星期一朝早，星期二朝早打1-2場。作為一個負責任嘅打工仔好大機會一場都睇唔到。

2. 好難認人。一隊波進攻防守唔同人，連埋特別組同後備一隊有53人，個個上晒甲仲要超過一半人唔會點掂波。睇好耐都只會識每隊既四分衛，勁啲既進攻球員同好撚勁既防守球員。

3. 規則複雜。除咗上面講嘅基本玩法，仲有好多瑣碎規則不能盡錄，要一路睇一路學。