日本史交流討論

442 回覆
57 Like 1 Dislike
2017-07-21 21:59:59
各位好,我係石田治部少輔,呢七個月以黎響學術台分享日本戰國史。完成關東英傑傳之後,我講過會休息一陣,但又想維持歷史交流,所以就開呢個Post,想涵蓋曬成個日本歷史話題。

歡迎各位巴打分享交流,等在下都可以學到更多野。拿,順便推廣一下戰國史相關Post,敬請支持。

日本戰國史 - 三英傑篇(織田、豐臣、德川),以及島津發跡外傳

https://lihkg.com/thread/21926/page/1

https://lihkg.com/thread/108838/page/1

關東英傑傳 (武田、上杉、今川、北條),附加小分享

https://lihkg.com/thread/156373/page/1?post=078c7fd39ad41c7846219262b64d22d57d54e5f4

一齊討論啦
2017-07-21 22:01:27
「前文提要」

今次要分享既,並唔係咩特別史料,只係我覺得有趣,純粹想分享既一則戰國生活小事。以下內容係一則週記,出處係島津家一級史料 - 《上井覺兼日記》第265-270頁左右,由島津家臣上井覺兼撰寫。

上井覺兼既家族出自神道名門 - 諏訪氏位於薩摩國既分家,祖父諏訪為秋於1548年投靠島津家後,轉封到大隅國上井。五年後覺兼父親 - 諏訪薰兼轉封到薩摩西部既日置郡,為左紀念原址而改姓上井,就係家姓由來。上井覺兼響1559年為島津效力,當時正值島津貴久時代,主要響大隅、日向既戰事上活躍。

1573年繼任上井家督,隨後輔助島津義久,平步青雲成為家老重臣,島津家多場在日向國戰役(對伊東、大友氏、耳川之戰等)都有參戰,被賜封日向國宮崎地頭,主理當地政務,響行政方面有建樹。

其後亦有參與北伐,幾次進軍肥後國,然而1586年攻打大友家岩屋城時(主線有提及)身受重傷,一年後豐臣秀吉攻打九州,失去在日向國既領地,之後上井覺兼將工作交俾伊集院氏後,就鮮有記載,大概係安穩渡過餘生了,覺兼於1589年離世,終年44歲。

上井覺兼最著名既唔係事跡,而係佢留低既《上井覺兼日記》,以日記形式逐日詳述1574年至1586年既生活事跡,由於詳述九州歷史、生活風土、文化、信仰等等,所以被視為國家一級史料,至今保存響東京大學既史料編纂所中。

今次既節錄,係天正十年(1582年)11月一則週記,當時既島津家已經平定南九州,並與龍造寺隆信約定平分肥後國,上井覺兼是次出征,係參與島津掃蕩肥後國國人包括阿蘇氏等,週記內容係上井覺兼抵達肥後八代城既一週大要。

以下係週記內容,會用第一人稱口語敘述:

「11月11日,今日我到左八代城,諗下都應該係第三次吧?入城第一件事唔係休息,而係搵(島津)義弘大人問安啦,見左一面佢就叫我休息了。」

「11月12日,一早伊集院忠棟先生就黎拜訪我,話(島津)義久大人召集,我地就一齊出發,去到義久大人講:『咁人齊,梗係飲宴啦!』,就即刻叫人拎薩摩盛產既燒酎酒[註1],我地薩摩男兒咁熱血,當然好飲得啦!結果就由朝飲到晚了。」

「11月13日,琴晚義弘大人第一個貓低,今朝就叫我地去佢屋企開會,會議間提及出外既使者返黎了,講唔夠兩句,大人就突然拎支酒起身大叫:『開完會喇,飲勝!』結果,我地又飲到夜晚,大人依然係第一個冧低。」

「11月14日,琴晚飲太多,個頭少少痛,但係伊集院忠棟、肝付兼寬先生一早登門拜訪,難得有人客黎,就忍痛隊隊酒啦!飲到夜晚,伊集院先生邀請我地去佢屋企浸溫泉,然後當晚又隊酒喇!」

「11月15日,字跡潦草,我唔識解讀喇,總之今日冇飲酒,你班友俾我逗逗啦。」

「11月16日,又去義弘大人屋企開會,今次講肥後國事務,不過會後大人又發癲喇!結果?當然又飲勝啦!今次仲有位叫石原既武士表演狂言劇[註2],係幾搞笑既,但我個頭真係好痛啊。」

「11月17日,伊集院、肝付兩條友仔,又係一朝早邀請我上去飲宴,媽呀放過我啦!好彩,中途義弘大人召集開會,調派部份兵力到肥前示威,飲完做咩?今次唔係大人喇,係兩條蛋散捉我返去繼續飲酒呀。屌!我唔想飲酒呀!」

「11月18日,今日去左義弘、家久大人,以及伊集院先生屋企拜訪,點知到左夜晚又黎飲宴,請左兩個人表演,一個係兩日前那位石原;另一個係藝人,叫幸若與十郎(編註:幸若舞家族成員不見此人名字),佢跳得唔錯,帶動會上氣氛,連我都興奮過頭,集體飲通頂。算啦,跟住島津家就預左要飲酒,只係我副肝,仲可以捱到幾耐呢????」

以上就係週記節錄,呢種生活仲要持續到1583年1月撤兵後,似乎島津家都好鍾意飲酒啊,七日有五日都係飲宴,薩摩國民風一向熱血單純,而且位置偏遠,點知京都咁多娛樂呢?冇事做就會搵酒飲架喇。好似1575年「島津家久上京參訪團期間」,就記錄過佢地日飲夜飲,去到京都更加放肆,呢班薩摩痴線佬真係無酒不歡呢。

註1:燒酎酒,即係日本燒酒,根據1546年葡萄牙商人既筆記,薩摩國當時已經利用白米、土豆煮蒸餾酒,1559年薩摩已有燒酎酒既記載,係此酒最早記載年份,但係當時既酒精度數應該冇今日咁高(今日約為36%-45%以下)

註2:狂言劇,係日本傳統戲劇之一,與能劇既超凡脫俗、重視服裝不同,狂言比較似相聲,以滑稽既台詞呈現一套戲劇,可以話係當時既喜劇,多數飾演神鬼妖怪、動物老人等,表情面具比能劇異常豐富,對音樂、場景既需求較寬鬆,所以節奏輕快有趣,較適合九州班痴線佬。



上文《上井覺兼日記》 節錄



島津家入門條件 - 要飲得



現代既狂言劇
2017-07-21 22:01:42
有無近代史
2017-07-21 22:02:20
有無近代史


等大家開題分享,近代史特別係二戰時期我唔係太熟
2017-07-21 22:04:25
留名支持,個關東篇j 到出血
2017-07-21 22:24:56
留名
有冇書推薦下


最近出左一本由台灣人寫既《明智光秀與本能寺之變》
先講述明智光秀生平及早年疑雲,然後再將光秀謀反動機,按照現今各種假說,逐個分析,如果想睇各種本能寺之變既疑團,可以考慮睇睇

不過台灣誠品暫時缺貨,唔知網上書店、香港誠品有貨未
2017-07-22 09:57:22
留名支持,個關東篇j 到出血

多謝支持呀
2017-07-22 11:09:11
出面有巴打講近代史

治部可以集中講戰國史
2017-07-22 11:53:08
出面有巴打講近代史

治部可以集中講戰國史


佢既日本史底蘊深厚
2017-07-22 11:53:49
星期一細分下德川本家及松平分家既待遇
2017-07-22 12:50:46
留名
2017-07-22 13:01:12
2017-07-23 12:01:19
星期一細分下德川本家及松平分家既待遇

我都覺得奇怪
點解有d仔姓松平
好似第七個仔松平忠輝咁
之後被眨為庶人?
2017-07-23 14:58:37
Ho ball
2017-07-25 00:58:36
治部
2017-07-25 17:05:59
德川、松平同為一家,大家都知道江戶幕府既統治者,都係延續德川既姓氏,並限制只有將軍、御三家、御三卿方可沿用德川一姓,其他外家親戚沿用松平氏。我地就溫故知新一下,話說松平家到左第三代松平信光時代,已經鞏固西三河既統治,而且兒孫滿堂,為左方便統治,就將佢地散佈各地,江戶史料《改正三河後風土記》就將三河至今依然存續既家族,歸納為「十八松平」。

佢地根據所屬居城命名,宗家據地係安祥城,就被稱為「安祥松平家」,如此類推,德川家康就係隸屬安祥松平家。

但係,到左德川家康就任後,已經過左差唔多八十年,各家關係亦不如前,反而各自割據,期間三河國因為宗教問題,爆發一揆動亂,部份支持一向宗既親戚對抗家康,所以到1564年三河一揆結束後,德川家康先重新統一松平氏。至於點解姓「德川」,關東英傑傳第515個POST ,以及出面加利既近代史都有介紹,在此不提。

反而大家可能好奇,到底德川家對其他同族既待遇如何呢?首先,德川家既人事管理,出曬名係「做得多,Pay得少」,四天王本多忠勝、井伊直政、榊原康政都係十至十二萬石,元老酒井家卻因為忠次隱居京都,更獲秀吉贈生果金,被家康扣減七成石高收入。「響秀吉地頭都唔返黎?酒井家真係忠心,扣減七成人工做個榜樣啦。」關原之戰後,德川家康手握實權,理應大肆犒勞啦,但我話你聽,身為血汗企業「德川」家臣,就唔駛諗住人工高,三大天王既戰後薪酬如下:

本多忠勝 - 薪酬不變,轉封伊勢桑名,地處伊勢灣要道,控制濃尾平原到京都既水路交通貿易

井伊直政- 加薪4萬石,轉封近江佐和山城,壟斷近江街道,即濃尾平原到京都既主要陸路。不過子孫擁有幕府大老團既職權

榊原康政- 維持不變,原因係要求留守江戶附近

響上述基礎下,大家都有心理準備,即使面對譜代家臣,德川都唔會重酬對待,以親藩(姓德川既)至上,但亦有限制,如「御三家」賜封紀州、尾張、水戶等要地,石高超過30萬,「御三卿」無領地,卻深入幕府統治中樞,以上六家除水戶藩外,都擁有將軍繼承權。

至於德川家康既其他兒子包括結城秀康、松平忠吉、松平忠輝、武田信吉已經過繼出去,但念在親生仔既份上,都俾佢地統治大片土地,不過就要遠離中樞,以鞏固宗家統治。

喂,講咁耐,都仲係德川宗家,其他分家呢?好喇,我就挑選十四個主要分家逐個介紹:



松平分家圖

1. 竹谷松平家 – 德川家強力支持者,一直跟從宗家南征北討,小田原之戰前,家督松平清宗留守河東興國寺城戒備,入關東後賜封兒玉郡八幡山一萬石。關原之戰後轉封到三河吉田藩,加薪至三萬石,但1612年因為後人 - 家清早逝絕後而被廢藩,異母細佬 – 清昌繼承家族,並念在家族貢獻而賜封三河5000石及成為將軍直屬部隊,直到幕末。

2. 形原松平家 – 德川家強力支持者,第五代家督 – 松平家忠活躍於討伐三河一揆、征戰今川家及長篠之戰。到第六代家信時代,入主關東後封上總五井藩5000石。1618-1635年間,先後三遷三河形原藩、攝津高槻、下總佐倉,收入增加至四萬石。第七代康信時,於1649年加薪一萬,轉封丹波國。但係,到左第11代因為享保大飢荒時橫征暴斂,1748年被轉封丹波龜山藩。

3. 大草松平家 – 由第三代松平昌安時起,已經屢次對抗宗家,被時任族長 - 松平清康擊破投降;三河一揆時,第四代松平昌久對抗宗家,被沒收領地及流放,直到第六代松平正親獲赦回歸,擔任家康長子 – 松平信康既直屬部隊,後人響戰場多次立功。第七代於德川秀忠時代加薪至6000石,但1632年被德川忠長既亂象連坐,轉投水戶藩,第九代無子絕後。

4. 五井松平家 – 德川家支持者,隨宗家南征北討,第六代松平伊昌因為死守長篠而立功,賜封下總國2000石,德川家光時代加封下總國海上郡6000石,並成為幕府直屬部隊,直到幕末。

5. 深溝松平家 – 德川家支持者,第二代松平好景對抗豪族吉田氏戰死,之後家族安排到東三河,跟隨酒井忠次;第三代松平伊忠參與多場戰事,長篠之戰時隨酒井忠次偷襲鳶巢山時,因過份深入而戰死。第四代松平家忠獲封武藏國埼玉郡1萬石,之後轉封下總國,1600年西軍突襲伏見城,協防既家忠奮戰而死。因為竹谷松平家絕後,第五代松平忠利接收而轉封吉田藩,加薪至3萬石。深溝一族輾轉遷任,最後響1668年成為肥前島原藩65000石大名。

6. 能見松平家 – 德川家支持者,自第三代起已經參與多場戰役,第四代松平重吉時輔助松平忠輝,並賜封越後三條郡2萬石,但1616年松平忠輝失墜,被秀忠召回並賜封下總關宿藩26000石,家族繼而轉封到遠江、出羽、豐後國,1645年轉封九州豐前國杵築藩,加薪至32000石,直到幕末。
2017-07-25 17:06:13
7. 長澤松平家 – 德川家支持者,長篠之戰時第八代松平康忠參與偷襲鳶巢山,之後擔任松平信康重臣,信康死後隱居,後來回投家康。第九代獲封武藏深谷藩10000石,但兩代繼承人早逝,就收左松平忠輝做養子繼任。忠輝因為關原既功勞,賜封越後高田藩75萬石,與結城秀康並列北陸兩大親藩。但係1615年大坂夏之陣,本來要沿大和國進攻,但因為遲到而被家康訓斥,又因為軍令斬殺秀忠近衛,令家康、忠輝父子出現裂痕。家康死後,1616年被德川秀忠藉詞問罪,被沒收領地及流放到伊勢、飛驒、信濃等地,直系自此斷絕,傍系後來轉任到形原郡,人工只有5千石



松平忠輝

8.大給松平家 – 德川家支持者,第六代松平家乘入關東後,獲封上野那波郡1萬石,關原後加封到美濃岩村藩2萬石。呢個分家一直都周圍轉封,直到第11代松平乘佑時期,紮根三河國西尾藩,收入係27000石,直到幕末。

9.瀧脇松平家 – 德川家支持者,第六代松平正勝擔任家康直屬部隊,響大坂夏之陣戰死,由德川秀忠安排形原松平家次子 – 松平重信入贅,之後擔任駿府城代,收入係5000石。到左第八代松平信孝,就成為駿河小島藩10000石大名,直到幕末。

10. 福釜松平家 – 德川家支持者,第四代入關東後擔任下總、武藏國警備領袖長( 大番頭) ,收入1000石,呢個分家雖然參與多場戰事,但相對其他分家,一直都冇大名或直屬部隊既名份,到左1688-1704年間絕後。

11. 櫻井松平家 – 德川家對抗者,初代松平信定趁松平清康被殺,趁亂奪取岡崎城,意圖篡奪宗家,但因為宗家有今川義元撐腰,以及重臣土豪對抗下,松平信定向宗家投降。三河一揆時,第三、四代支持光頭黨,被家康擊敗投降。第五、六代都未夠三十就夭折,期間獲封武藏松山藩10000石,第七代松平忠賴加封到遠江濱松藩,收入50000石。1609年第八代松平忠重因為私鬥被沒收領地,減薪至8000石並擔任德川直屬部隊,捱左12年總算做返大名。家族於1711年轉攝津尼崎藩,收入增至45000石。

12. 東條松平家 – 德川家強力支持者,第三代松平家忠南征北討,坐領三河東條城1萬石,但因為體弱多病早逝,德川家康安排兒子 – 松平忠吉過繼,轉封駿河國沼津城4萬石。入主關東後,加薪至100000石,並坐擁武藏國忍城。關原之戰後,因為打響頭砲並奮戰立功,加封到清洲藩共520000石及就任左近衛中將,統領濃尾平原,可惜七年後舊傷復發,28歲就病逝,家族絕後。



松平忠吉

13. 藤井松平家 – 德川家支持者,關原之戰後賜封常陸土浦藩,收入35000石,本來第三至五代收入飛漲,但第六代松平忠之被沒收領地,由從弟松平信通繼任家督,轉封出羽上山藩,收入回復至35000石。傍系卻水漲船高,響松平忠周時代(1706年)獲封信濃上田藩,出任幕府政權中樞,收入58000石。

14. 松平鄉松平家 – 擔任幕府直屬部隊,直到幕末,收入440石,但好處係守住祠堂。

其實驟眼一睇,德川對呢班親戚都算唔錯,起碼有得做藩主,或者進入幕府中樞,響幕府具備一定地位,其中幾個分家更因為有家康既親生仔入籍而水漲船高。即使曾經對抗自己,只要歸順都可以分到一杯羹。

實際上,德川幕府呢種分封方法,就係將親族化整為零,充當中央屏障,另外德川家康對呢班親戚其實不太放心,而家你見到十四松平,但當年分封既點止咁少?只係剷除左班唔聽話既,所以要彰顯自己既族長地位,自然要分得咁細。

「德川、松平,大家一場親戚,唔駛分咁細既。」松平一族道。

「我地關係咁疏,一場親戚有時仲難聽過講粗口。」德川幕府反擊。
2017-07-25 17:36:58
治部
2017-07-25 20:02:17
今次太咬文嚼字,跟書教學,敬請見諒喇
2017-07-25 20:44:08
有冇南北朝時代歷史簡介
好似同戰國時代一樣都係立立亂
2017-07-26 03:21:46
好帖留名
2017-07-26 07:26:09
留名
有冇書推薦下


最近出左一本由台灣人寫既《明智光秀與本能寺之變》
先講述明智光秀生平及早年疑雲,然後再將光秀謀反動機,按照現今各種假說,逐個分析,如果想睇各種本能寺之變既疑團,可以考慮睇睇

不過台灣誠品暫時缺貨,唔知網上書店、香港誠品有貨未

胡煒權個本?佢香港人黎
博客來有貨的
2017-07-26 09:26:35
留名
有冇書推薦下


最近出左一本由台灣人寫既《明智光秀與本能寺之變》
先講述明智光秀生平及早年疑雲,然後再將光秀謀反動機,按照現今各種假說,逐個分析,如果想睇各種本能寺之變既疑團,可以考慮睇睇

不過台灣誠品暫時缺貨,唔知網上書店、香港誠品有貨未

胡煒權個本?佢香港人黎
博客來有貨的


係呀,真估唔到,星期五睇睇有冇得買先
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台潮流台上班台財經台房屋台飲食台旅遊台學術台校園台汽車台音樂台創意台硬件台攝影台玩具台寵物台軟件台活動台電訊台直播台站務台成人台黑 洞