其實英國生活成本唔算太貴,失業率老實講得5%都唔算太難搵工。
生活成本方面,除倫敦以外,其實假設你2個大人,一年正正常常,每月租£700既apartment,水電£120,上網雜費£60,一個月偶然會出下街食野£200,買下食物£300,仲有counsel tax to license之類就當加加埋埋£1600一個月,一年大概net burn £20,000內,即係大概一個大人£1萬鎊,9萬蚊港紙左右,當夠10萬港紙一年,依個計法絕對唔係省錢寶寶,所以大家可以再減d自行調節難度其實都一定無問題
[Easy Mode]
如果你係正正常常一對40歲,賣左層半供完既樓過英國,差極都有200萬港紙,你去到英國基本上已經係玩緊Easy Mode,你想買層120萬樓住,仲有80萬慢慢用8年(你唔港再交租,所以年net burn得返5萬蚊一個人,10萬兩個人,你有足足8年buffer可以慢慢搵工唔洗急,你確保到你變BC你都未burn 完,一個唔覺意你係賣左層供完既私樓,600-800萬港紙拎過去,其實你會係Easy Mode既Baby Mode,你既生活水平比起香港係唔會點跌,反而會大大提升,你講緊既係半退休狀態
[Normal Mode]
如果你可以每人拎住30萬過英國,我會形容為Normal Mode,你會有足足3年buffer去適應同搵工,只要你搵到份hea part time就已經可以保證你過到BNO 5+1入到藉,只要你3年內搵到自己既full time job就已經好安全,生活水平唔有好大改變,基本上唔會同香港差好遠,我會形容為只要你係正正常常講到英文肯學肯成為英國人就一定生存(活)到既Normal Mode
[Hard Mode]
如果一個人只拎住10萬過英國,老實講,你真係需要有定心理準備會幾大壓力,你只有一年既生命線,你可能需要收緊少少budget去就,例如住share house同消費降級,由於你無buffer可言,你可能真你需要將就一下有工就要去做,英國不致於生存唔到,但頭幾年,生活就真係未必有你份,你需要預計生活水準會差過香港
[Hell Mode]
真心建議,10萬都帶唔到,除非你係香港有直接既人身安全問題,如果唔係其實不如係香港依個熟悉既環境儲多一陣錢先,去一個陌生地方重新開始,雖然都唔係話一定成功唔到,但你面對既難度會比其他人高好多倍。
唔好比部分移民KOL誤導,有個錢旁身真係個難度係完全唔同。
當然你想挑戰難度我都阻唔到你,但真係唔易玩,好易Game Over。
[總結]
盡可能唔好太大安旨意,除非有十萬火急理由,儲少少錢再過英國可以令移民難度大大減低,唔好信 6萬就夠,果d完全係地獄mode既玩法,大部分人都玩唔掂會GG架
英國絕對唔難生存(活),但如無必要都真係無謂迫自己玩地獄mode