《慾望樂園》

唔該晒你呀

希望大家鐘意

[30]
「吓？！做乜撚嘢啊？」MK阿叔一頭霧水，驚訝咁望向喺螢幕出現嘅狐狸。

未能掌握情況，唔知發生咩事同點解我突然之間贏左嘅唔止MK阿叔，周圍包廂都陸續傳出質疑嘅聲音。

「點解啊？」「規則唔係話要最後五分鐘撳住個制十秒先喺防守方贏咩？」「佢咩都冇做點解冇啦啦贏咗架？」

「各位客人可能對今場特別競投表演嘅結果唔大明白，請等我向大家解釋到底發生左咩事啦」慾望樂園當然唔會俾佢地嘅客人對佢地提供嘅服務不明不白，於是狐狸開始為在場嘅客人講解。

「大家請留意螢幕依家嘅畫面。」螢幕嘅畫面一轉，變成左之前競技場內嘅鏡頭所影到嘅畫面。

畫面中所顯示嘅係較早前我喺競投場中央攞到木盆同麻繩之後，MK阿叔嚟到，我一邊後退一邊用麻繩纏繞木盆嘅情況。鏡頭zoom近到去木盆嘅位置，可以見到當時其實我係偷偷地將發訊器放左喺木盆底下，並且用麻繩將佢牢牢固定。亦都係因為咁我用木盆格擋嘅時候一直都係用木盆邊同木盆面而唔係用底部。

「喺18號收埋左個發訊器之後，佢就一路引34號行上去天橋，再喺水塔旁邊攻擊對方觸發電擊，營造出因為電擊而鬆手跌左個木盆入水塔嘅假象。最後落番地面，喺時限就嚟到五分鐘嘅時候打開水塔出水口嘅開關，當水塔嘅水流完，時間就去到最後五分鐘內，而水塔內嘅木盆隨住水位一齊下降，當水流完嘅時侯，木盆亦下降到水塔底部，在失去水嘅浮力之下木盆嘅重量會壓向綁喺木盆底嘅發訊器，從而將按鈕壓住。」畫面再次切換到狐狸，而佢亦都將我贏得特別競技表演嘅方法向在場嘅客人正確無誤咁講解。

「原來係咁～」「仲有咁咁嘅方法！」「防守方咁都有得贏？！」

得知真相嘅客人傳嚟起哄，有啲更加為依個出奇不意嘅方法拍手叫好，睇嚟佢地相當滿意依場特別競技表演，但當然我唔係為左討好佢地而咁做，不過評分應該就唔會低啦。

但當然並唔係個個都咁開心，MK阿叔聽完狐狸嘅講解之後發現原來一直都俾我牽住鼻子走，再加上我好似望住小丑一樣望住佢嘅眼神，佢頓時惱羞成怒。

「屌你老母你玩鳩我？」氣憤嘅佢舉起伸縮警棍，準備繼續發洩佢嘅怒火。

「啊啊啊！！！」MK阿叔應聲倒地抽搐，今次已經係佢第二次喺我面前做戇鳩嘢俾人電，用腦諗吓都知，競技表演完咗之後樂園唔會再俾我地繼續郁手啦。

「比賽已經結束，投注嘅派彩已經有結果，咁多位客人亦都請為呢場比賽作出評分。」而狐狸亦都冇理會競技場發生嘅事繼續主持。

「我哋已經收到咁多位客人嘅評分，多謝咁多位客人對於今次特別競技表演嘅高度讚揚，我哋下次一定會努力向咁多位客人提供多啲高質素嘅表演！作為今次特別競技表演嘅贏家，18號會被送到我哋嘅醫療室接受醫生嘅治療同照顧，並且直到痊愈之前都可以獲得休假作為獎勵！」狐狸宣布完評分嘅結果之後，我幾乎雙眼發光！太好喇終於可以唞吓。

「事不宜遲，跟住落嚟嘅就會係大型多功能活動場嘅常規比賽，多人亂鬥。亦都會喺今日為咗特別競技表演搭建嘅呢個場地進行。」狐狸啱啱講完，閘門就打開左，幾個守衛由閘門跑出嚟，回收左MK阿叔嘅裝備之後就將佢架左出場，而我亦都喺解開手扣之後被搬上擔架床，依一刻我終於都頂唔順，直接就暈咗係上邊。

18號都幾醒

主角係有啲腦嘅

贏左有冇得加甜

真心好有創意

本身個規則就係想做鳩佢，依家仲要俾佢贏咗，有獎勵都要偷笑仲想加甜

你哋鍾意呢part就好啦，驚策略智鬥嘅嘢寫得唔好

呢篇唔錯，可以媲美嗰啲日本漫畫，而且寫得幾有畫面感

推

又話慾望樂園
連少少甜都無

多謝支持

又唔係叫性慾樂園
遲啲就會多返少少㗎啦

如果樓主開性慾樂園我一定捧場

推推！ 出密啲就好

淨係呢個都冇咁快寫完啦

最近開始有啲忙，不過應承大家我一有時間就會寫！

支持

［31］
與此同時，喺慾望樂園某一個人嘅辦公室入面…

辦公室內兩邊牆壁佈滿顯示屏，顯示住樂園唔同地方鏡頭嘅畫面，入口旁邊放有一啲盆栽裝飾，對住門口嘅牆放住一堆堆嘅文件櫃，辦公室嘅中央有一張實木辦公長枱，枱面放住一台電腦，一個女人坐喺辦公枱前嘅真皮辦公椅上面。女人嘅長相姣好，實質上已經40幾歲嘅年紀但睇落只有30出頭，有種女王的教室天海祐希嘅感覺，同樂園嘅其他職員唔同，佢並唔需要着住制服，而係穿着便服，名牌嘅貼身連衣短裙就算上身喺外套嘅遮蓋之下依然擋唔住佢嘅線條美，但佢嘅行為舉止就同佢嘅外觀相當違和。而呢個時候佢面前仲企住一個經理。

「報告左副園長，呢份係頭先喺大型多功能活動場舉辦嘅特別競技表演嘅報告，今次嘅收入相當可觀，特別係18號，好多客人對佢嘅評價相當好。」個名經理簡單向對方講解完之後，就遞上一份文件。

「好！好！好啊！咁嘅話我呢個月嘅業績就可以爬到右副園長頭啦！」女人就係呢個慾望樂園副園長之一，佢一路欣喜若狂咁揭住文件，一路叫好。

「自從13號之後已經冇咩人有咁高嘅評價，佢下次再出場一定有好多客人願意投注。如果左副園長你可以將佢變成你嘅獨家商品，咁你贏右副園長成為下任園長嘅機會就更加大啦。」個名經理向左副園長建議。

「你講得啱，但係要佢成為我嘅獨家商品唔係咁易，一係就要右副園長都同意，但佢一定冇可能放棄呢棵搖錢樹…」建議對左副園長相當吸引，但係佢皺起眉頭，似乎事情唔係咁易做到。

「一係…就可以發起商品爭奪競技，只要18號自願成為我哋嘅代表，我哋就可以向園長申請，並且只要贏到右副園長搵嘅代表，我哋一樣可以獨家代理18號。」經理一講完，左副園長即刻抬頭望向佢。

「你有方法令佢咁做？右副園長都會同我哋爭，如果我哋威迫佢分分鐘比對方得逞。」左副園長反問經理。

「所以我哋只可以利誘，我地可以…」就係咁兩個人喺辦公室入邊開始緊佢哋嘅密謀…

Ryan 喺呢個時候仲瞓咗喺擔架床上面昏迷住俾人抬走緊，而佢嘅命運已經開始比其他人討論緊。

時間嚟到特別競技表演完結嘅之後一日。

我迷糊地打開眼，周圍十分之光亮，我訓左係一張好軟熟嘅床褥上面。周圍用布簾圍住，再加上依陣熟悉嘅消毒酒精味，我好快就意識到自己已經被人送左嚟醫療室，我嘗試支撐起自己坐起身。

「哇屌….」當我一用力嘅時候手手腳腳去到肋骨都傳嚟左刺痛。我忍痛揭起張被，先發現原來自己兩個前臂同左小腿都打上左石膏。

「你醒左啦？」一個着住護士服嘅女性拉開布簾入嚟，但佢著嘅唔係一般嘅護士服，而係貼身嘅剪裁，再加上吊帶白絲襪，直頭成件情趣用品嘅護士服咁，並且將頭髮紮起戴着有十字符號嘅護士帽。淨係咁樣描述大家可能會想像一個好身材靚女嘅護士姐姐，但係實質上佢係一個200磅1.5米幾左右嘅大肥婆，原本收腰設計嘅護士服，喺佢嘅肚腩上面監生間咗幾條車胎，肥肉令到佢嘅手臂同手指睇落係一粒粒而且拜拜肉隨着佢嘅動作擺動，兩個大髀就好似粗壯嘅樹幹一樣由佢裙底生長出嚟，喺吊帶白絲襪嘅壓力之下襪口位嘅肥肉擠晒出嚟，清晰可見嘅一堆堆脂肪粒係佢大髀湧現。而頸上面嘅肥肉已經唔可以叫做雙下巴，根本已經同佢嘅下巴融為一體。暗瘡喺佢嘅面上面隨意生長，即使睇得出佢搽咗好厚嘅粉底都阻擋唔住。簡直就係一部人形坦克。

「你係….？」其實一睇就知佢喺呢度嘅護士，但係佢帶比我嘅視覺衝擊實在太大…搞到我一時大腦hang咗機。

「睇唔出咩我咪負責慾望樂園醫療室嘅護士囉～就咁叫我護士得㗎啦。做咩眼甘甘咁望住我啊，同你講啊你唔好對我亂嚟啊，我都有樂園派發嘅手錶㗎！不過咁～你聽話嘅我當獎勵你幫你打飛機都得嘅～」護士一邊用着相當姣嘅語氣向我講，一邊用手指尖喺我心口上面輕掃。

「唔係呀我諗你誤會啦！嗚啊…」面對着佢嘅動作，我下意識縮起身體向後避開，但當我一郁嘅時候，痛楚又再傳遍我嘅身體。

「你都算實淨㗎啦，俾人用伸縮警棍打咗咁多下，都只係瘀傷同埋骨裂，雖然有啲地方都裂得幾犀利，特別係你隻左腳，脛骨受到傷害嘅位置腫得好犀利，梗係你受咗傷之後仲劇烈運動啦。」呢個時候一個着住白色醫生袍，帶着膠框眼鏡，睇落50幾歲嘅男人亦都走咗入嚟，佢雙目無神俾人一種好冇精神嘅感覺。

「我係慾望樂園嘅醫生，你都係就咁叫我醫生得㗎啦，我已經幫你嘅傷勢做好咗處理，但係你暫時都係唔好亂郁，以免整親受傷嘅地方。放心啦喺好番之前你都可以喺呢度休養，平時嗰啲商品冇咁好㗎，郁得返就要繼續做嘢㗎啦，好似係話呢個係你表現好嘅獎勵先有得咁樣。」醫生主動向我講起我嘅情況。

「嗯。」本身我仲諗住講聲唔該醫生，但係諗諗吓，佢都係幫慾望樂園做嘢嘅人，雖然佢係醫生，但係換個角度佢係幫慾望樂園將受損嘅商品維修之後繼續為客人服務，只係想將我哋嘅價值最大化，於是我對佢嘅回應就只有一句簡單嘅嗯。

做奴隸都要衝kpi

你當入左集中營

仲要畀重坦克挑逗
好想用nlaw消滅佢

[32]
「既然你起咗身就食啲嘢啦，補充番營養對你嘅康復都有幫助，不過以你兩隻手而家嘅情況，我建議你都係唔好亂咁郁，護士佢會照顧你呢段時間嘅起居㗎啦。」醫生講完之後，就穿過布簾轉身走咗。

「好啦咁我而家去幫你準備嘢食啦～咁你就乖乖地喺度休息吓先啦豬仔～」護士講完之後都穿過布簾轉身行咗出去，留低打晒冷震嘅我喺入邊。

雖然我都傷得唔輕，不過估唔到贏咗之後竟然可以有咁嘅獎勵，成功幫到阿晴，又喺好返之前唔使參加任何工作，亦即係佢呢段時間我都係安全嘅，但係咪我贏咗果次特別競技表現之後，佢哋就會放過我，唔再因為我襲擊職員而追究呢…

「夠鐘食嘢啦～」護士將一個木板固定喺我嘅病床上面，木板上面放有一盆食物，同我上次喺囚室食嘅一樣惡劣，一兜白粥，一舊乾爭爭嘅肉餅，再加一啲雜菜，食呢啲真係可以有足夠嘅營養康復咩…

「單調係單調啲，但鬼叫你哋係商品咩，比咩你就要食㗎啦，有我親手喂你食得開心啲啦～」護士用匙羹畢起一啖粥，然後嘟起佢嗰個肥厚嘅嘴唇，往粥上面吹氣，口水由佢嘅嘴唇彈出跌晒落去我啲食物上面。

「就咁得㗎啦，其實我唔係好怕熱㗎咋。」望住護士咪起雙眼，啫起嘴唇個樣，再加上佢啲口水，我已經冇晒胃口。

「你哋啲男人個個都咁怕羞嘅，你地都係死左個時吸引啲，男人都喺變成屍體嘅時候最有魅力。」護士一邊將啱啱吹涼咗少少嘅粥遞到我嘴邊，入邊好似傾閑偈咁樣講出呢啲嘢。

我呆咗咁望住佢，睇嚟喺呢度做嘢嘅人果然多少有啲心理變態，佢戀屍癖嘅言論比起佢嘅外貌更加令人反胃。

「做咩唔食嘢啊？」護士見到我冇晒反應，於是問我。

「食…我食。」我真喺好肚餓，再加上佢好似想殺左我咁嘅言論，我唯有一啖一啖食晒佢喂俾我嘅嘢食。

「咁就乖啦，食飽飯就唞吓啦！」佢用佢隻肥手輕輕拍一拍我個頭。

屌…我忽然間覺得原來留喺醫療室都唔係咁好…

［33］
時間又過左兩日，我兩隻手已經好得7788，可以折左手上面嘅石膏，雖然左腳都仲係要繼續打住石膏走路跛吓跛下，但我都已經好開心，對手用得番可以自己食飯去廁所同抹身，依兩日俾個肥婆護士喂我都算，仲要去細幫我𢭃住，去大幫我抹，次次都講埋啲鹹濕野挑逗我。最慘就係抹身我全身上下所有位置都已經俾佢非禮曬…

「今日嘅夜晚飯到啦，如果你想嘅話，我繼續喂你都得個啵～」佢一路放低我嘅晚餐，一路向我拋媚眼。

「我自己嚟得架啦，好番要用吓隻手！」我毫不猶豫就拒絕左佢。

我低頭一望，牛扒、忌廉湯、蘆筍、薯菜、可樂，仲有個泡芙！到底發生咩事…我一度懷疑係我嘅斷頭飯…

「喺左副園長安排俾你架，可能因為你上場競投表演幫佢賺左唔少錢？」護士歪頭望天，手指篤住自塊面，做出一副自認為好可愛嘅表情。

諗諗吓，佢哋要殺我根本都唔需要用落毒啲咁溫柔嘅方法，更何況仲要落喺啲咁好嘅嘢食上面，於是我大快朵頤，享受住我入嚟之後最好嘅一餐。

就係呢個時候，醫療室大門傳來敲門嘅聲，護士好快就轉身出咗去應門。

「我喺帶佢哋過嚟做檢查㗎，順便過嚟望吓18號。」一把男聲由門口方向傳出。

「好啊咁你哋入嚟坐低等啦，18號喺入邊病床位啊我帶你過去啊～」護士把聲比起同我講嘢嘅時候更加姣。

「18號～有人嚟探你呀。」護士由布簾外面探頭向我講。

隨即一個身穿主任服裝，身高大約米八，頭髮井井有條咁樣往後疏理，高鼻梁深眼框，有種歐洲混血感覺嘅靚仔行咗入嚟，唔怪得護士頭先花痴咁樣啦。

「你好呀第一次見面，你叫我野馬得㗎啦。」野馬面帶微笑，做出一副友善嘅表情。

「直接講啦，你搵我做咩啊？」我打算同佢地講埋啲應酬嘅說話，單刀直入向佢問出今次搵我嘅目的。

「我想話俾你聽，你上次嘅表現獲得好高嘅評價，樂園嘅高層對你帶嚟嘅業績好滿意。最近樂園接收咗好多嘅商品，每次呢啲時候樂園都會舉辦一個大型活動，去消耗過多嘅商品，同埋滿足客人更加難滿足嘅慾望，你上次表現咁好，嚟緊客人希望見到你出場嘅呼聲都會好高，今次活動同之前唔同，死亡率好高㗎，唔好周圍講啊目前唔係好多人知㗎咋。」野馬挨近病床，壓低聲線向我講。

「我高業績又送我去啲咁嘅活動，想借啲意做低我咋掛？」我始終覺得，佢哋都係唔會咁容易放過我襲擊職員。

「冇辦法啦，就係要受歡迎嘅人參加呢啲活動客人先至願意俾錢㗎嘛」野馬聳肩，做出一副無可奈何嘅動作。

「你點解要講呢啲嘢俾我聽？」突如其來嘅情報成功引起我嘅疑惑。

「我係你喺呢度嘅朋友。」野馬用一個奇怪詭異嘅語氣喺我耳邊講。

「你咁講係咩意…」我隨即反問，但係講到一半就被打斷。

「好啦我好多嘢做㗎，同唔到你傾太耐啦，有份見面禮送俾你。」野馬講廿完之後隨即拉起布簾行出去。

過咗冇耐，佢帶住阿晴行咗入嚟。

「好啦你哋傾一陣啦，我轉頭再返嚟接你走。」馴鹿向阿晴交代完之後再次轉身離開。