《慾望樂園》

一直都好多謝你幫我推post

多謝支持先
放心！我會寫曬佢
唔好意思，平時太忙，最多都只可以隔日出文
今晚會有文出架

好

太好喇
等到頸都長
輕輕一推

推下先

唔該晒

平時要遲啲先出到我會同大家講㗎啦

［77］
「如果規則冇講到嘅，會唔會其實都喺一條鎖匙就開得，兩個鎖匙窿只係誤導？」喺大家開始對依場迷宮逃脫競技規則嘅套路有認識之後，阿翔提出一個大膽嘅假設。

「都唔係冇可能，一係我哋試試佢？」阿翔嘅提議都有佢嘅道理，就算開唔到鎖，都可以對規則有再進一步嘅認識，何況如果一旦真係開到鎖…

「我覺得機會唔大，不過可以一試嘅。」阿宗聽到我哋嘅討論之後，亦都和議。

「咁我就試下啦。」我攞出鎖匙，對住其中一個鎖匙窿插左入去。

我扭動鎖匙，鎖匙成功帶動門鎖，鐵門嘅門鎖傳嚟解鎖嘅聲音。我隨即拉動鐵門把手，嘗試將門打開。

「唔得，個把手扭唔郁。」我同佢地講出結果，鐵門把手依然被死死卡住。

我打算試埋另外一個鎖匙窿，鎖匙唔可以就咁抽出嚟，要再扭番返去先得。

「咁睇嚟真係要兩條鎖匙。」我試晒兩個鎖匙窿，結果都係一模一樣。

「所有商品已經進入迷宮，迷宮逃脫競技正式開始。」迷宮內傳出宣布開始嘅聲音，聲音嘅主人並唔係狐狸，就係佢講完之後，嗰三道實木房門嘅門鎖傳嚟開鎖聲。

「開始咗啦，我哋要行動㗎啦唔好嘥時間。」阿宗向我哋兩個講。

「嗯，我哋要盡快攞到規則所講嘅掠奪卡同埋道具。如果係咁，我哋應該分頭行動？」阿翔望向三道實木房門，啱啱好我哋就有三個人。

［78］
三道實木房門由外觀望落去都冇任何分別，於是為咗爭取時間，我並無思索太耐，直接就揀咗正對鐵門嘅嗰道門。

我打開實木房門，帶領住佢哋兩個進入房間，一入到嗰間房，就好似去咗一個礦坑一樣，計埋我哋頭先入嚟嗰度，房間嘅四面牆都係實木房門，但係令我哋覺得去咗礦坑嘅原因係因為房間四面牆壁都係岩石嘅表面，天花板吊住礦洞用嘅照明燈，房間嘅四個角落頭擺放住一籃籃嘅採礦工具。而房間嘅正中央，立住一個矮人礦工嘅銅像。

「又裝修都得幾骨緻喎。」阿宗脫口而出。

係佢哋兩個都入咗嚟之後我將房門關上，避免比其他組知道我哋嘅路線。

「我哋周圍睇吓先啦。」阿宗一邊講一邊已經動身探索住呢間房嘅嘢。

我行到去矮人礦工銅像嘅面前，銅像立於一個石制嘅平台之上，銅像嘅形象就好似我哋平時打機見到嘅矮人族，五短身形粗獷嘅鬍鬚，將十字鎬托係膊頭上面，背脊孭住一個裝礦嘅籃子。而佢企住嘅平台上面刻有一句說話：「勤勞的礦工，在未開採到礦石之前，不會離開工作崗位。」

「佢啲架撐全部都俾鋼索鎖喺呢間房嘅地面，睇嚟只可以喺呢間房入邊用到，攞唔到去第度，我仲諗住當武器用添。」阿宗一邊舉起工具籃入邊嘅一把十字稿，一邊觀察一邊向我哋講。係十字稿嘅手柄尾段有一個鐵環，被鋼索扣上連接到房間地下嘅另一個鐵環。

［79］
「佢牆上面嘅岩石係送到黎之後用水泥痴上去，唔通我哋要鑿開佢睇吓入邊有冇收埋道具？」阿翔留意到，石頭嘅罅隙俾樂園用水泥固定住。

「如果係咁就簡單啦，你哋行開。」阿宗叫我哋退到安全位置之後，緊握手上嘅十字稿，向岩石牆壁瘋狂揮舞。

彭！彭！彭！阿宗手上嘅十字稿同岩石牆壁不斷碰撞，碎石不斷彈出，水泥亦都承受唔住衝擊，令到依附喺場上邊嘅岩石逐漸剝落，不過暫時仲未有特別嘅發現。

雖然我同阿翔都好想一齊幫手，但係阿宗實在太大份，再加上佢咁大動作揮舞十字稿，喺佢附近一個唔小心俾佢打中都唔講得笑。

就係阿宗努力緊嘅時候，我繼續環視呢個房間，忽然某處牆壁吸引咗我嘅注意力，我即刻行近一望，岩石上表面就好似俾人灑左閃粉一樣，依稀可以睇到佢喺度閃爍，再望房間其他嘅岩石都唔見有呢個現象。

「阿宗，阿宗！你嗰邊停一停手先，你過嚟呢度睇吓，佢呢啲似唔似礦脈啊？」由於阿宗嗰邊太過嘈吵，我都叫咗兩次佢先聽得到。

滿頭大汗嘅阿宗托起十字稿，就行咗過嚟我指着嘅岩石嗰度。

「係喎，你又唔早啲講，原來好攰㗎。」阿宗一邊喘氣一邊對我講。

「啱啱我一講完你就郁手啦，想觀察多陣都冇」阿翔代我回應左阿宗。

「希望今次唔係浪費時間啦。」阿宗講完就再次舉起十字稿向着我所講嗰個位揮落去。

彭！只係一下，表面嘅岩石就被阿宗擊落，露出左裏面晶瑩剔透嘅水晶。

推
聯想到個畫面如果可以拍電影/劇都幾精彩

究竟水晶有咩用

大家有興趣可以一齊估吓

寫出嚟嘅嘢如果你哋聯想到畫面咁就好啦

解毒

［80］
「有料到！阿宗睇住嚟鑿啊，唔好扑爆舊水晶，睇吓可唔可以完整啲 咁攞落嚟。」我一見到就即刻提醒阿宗，免得佢好似頭先咁不停輸出破壞左依個可能有用嘅水晶。

「放心啦，我有分寸。」阿宗向我同阿翔豎起手指公，表示放心交比佢冇問題。

阿宗再次雙手緊握十字鎬手柄，不過今次捉嘅位置比較靠近鎬頭，阿宗用鎬尖瞄準包裹住水晶原石嘅岩石外皮，由頭先打開嘅缺口邊緣慢慢輕力將其剝落。

喺阿宗嘅努力之下，岩石外皮已經慢慢被剝乾淨，露出左裏面嘅水晶原石。

「仲差最後少少。」今次阿宗高舉十字鎬，瞄準水晶原石底部嘅岩石，用尖銳嘅鎬頭鑿去。

彭！噠。

喺鎬頭同岩石相撞爆發出嘅激烈碰撞聲之後，緊隨其後嘅就係水晶原石跌落地面之後清脆嘅聲音，阿宗已經成功將水晶原石完整剝落。

我隨即衝上前拎起水晶原石睇吓到底有咩特別，而阿翔亦都企到我身邊一齊觀察依舊水晶原石。

「點啊，呢舊石係用嚟做咩㗎？」阿宗將十字鎬放到地下之後亦都一齊圍埋過嚟。

我哋依家三個就好似頭先睇規則嘅時候一樣，三個人圍成一個圈仔包圍着舊水晶原石。

呢塊係一塊透明嘅水晶原石，石身晶瑩剔透，除咗仍然粘附住少量岩石之外，整體非常乾淨完美，阿宗喺只有十字稿作為工具嘅情況之下可以開採成咁已經非常之好，亦都因為嗰塊水晶原石咁通透乾淨，基本上就係一眼睇晒，完全搵唔到特別嘅地方。

［81］
「所以，呢舊水晶喺？」阿宗自己睇唔出當中玄機之後就向我哋兩個發問。

我同阿翔抬起頭你眼望我眼，希望對方可以喺呢舊水晶中參透到啲乜嘢，然而當我哋雙眼對望嘅時候，都可以喺對方嘅眼神中睇得出，大家都係對啲舊水晶原石一頭霧水。

「吓，即係頭先搞完一大輪，原來掘左一舊冇用嘅水晶出嚟？」阿宗見我哋兩個都冇反應就知道我哋兩個同佢一樣冇頭緒。

「我覺得唔會係冇用㗎，佢喺呢度一定有原因，冇理由放舊咁嘅水晶喺度就係為咗誤道我哋。」阿翔喺我手上接過水晶原石，攞近塊面開始仔細研究。

「我都覺得呢舊水晶一定係有用處，只係我哋未發現到啫。」我望向阿宗，向佢表示自己支持阿翔嘅睇法。

「咁一係我哋再周圍留意吓啦，可能真係漏咗啲咩嘅，但係都要睇時間，我哋唔可以浪費太多時間係一個諗唔出嘅迷題上面。」阿宗拍一拍我哋兩個膊頭鼓勵我哋，同時亦都不忘提醒我哋。

於是乎，我同阿宗開始對呢個房間繼續地氈式搜索，而阿翔就負責繼續調查嗰舊水晶原石。

房間其實並唔係太大，我同阿宗再着手探索一輪之後，依然冇更加多嘅發現。於是乎我唯有向成個房間中最可疑嘅銅像落手。

就同我對嗰舊水晶原石嘅睇法一樣，佢咁樣擺喺度一定有原因，純粹裝飾嘅可能性比較低。但係到底呢個銅像係攞嚟做咩㗎呢？

我望住銅像下邊嘅石製平台上刻住嘅字句。

礦工…礦石…工作崗位？！？！

［82］
「我知啦！我知道呢個銅像同嗰舊水晶有乜嘢用啦！！」已經諗出當中奧秘嘅我興奮得大叫出嚟。

「你係咪發現咗啲乜嘢啦？」阿翔攞住嗰舊水晶原石行過黎同我講。佢身後就係同樣聽到我有發現而跟過嚟嘅阿宗。

「你哋望吓呢度，「「勤勞的礦工，在未開採到礦石之前，不會離開工作崗位。」，個矮人礦工銅像背脊孭住嗰個籃喺空架！我哋要幫佢開採到礦石！」我指着嗰段文字同埋矮人礦工銅像背後嘅籃，向阿宗同阿翔佢哋解釋。

「你意思係，呢個水晶就係要開採嘅礦石？」阿翔 一邊講一邊將水晶原石遞向我

「冇錯，我哋要將呢個水晶放入去矮人礦工銅像嘅籃入邊，幫佢完成呢個採礦嘅工作。」我講完之後喺阿翔手上接過水晶原石。

「咁之後佢就會離開工作崗位，即係咩意思？」阿宗問我？

「我都唔知，等我哋將個水晶放咗入去個籃到先，如果我哋係解謎解得啱嘅話，咁我哋就會知到底乜嘢叫離開工作崗位。」我捧起水晶原石，移動到矮人礦工銅像嘅籃上邊。

「我放落去啦。」佢放手之前，我最後再提醒佢哋兩個一次。

「嗯。」阿宗同阿翔兩個一齊點頭回應我。

我放開雙手，水晶原石由我手中滑落跌入去矮人礦工銅像嘅籃入邊。

我哋三個屏息凝神，期待緊跟住落嚟會有咩反應。

時間過咗大概3秒，乜嘢動靜都冇。

「房間謎題已被解開。」正當我哋都以為又搞錯咗嘅時候，一把唔知屬於邊個嘅聲音由房間內嘅廣播傳出。

就喺廣播嘅聲音完咗之後，地面傳嚟一陣陣動，矮人礦工銅像就好似打機嘅時候觸發左機關一樣，向後緩緩移動，露出一個被覆蓋着嘅暗格。

暗道

推

［83］
「叻仔！咁都俾你諗到！」阿宗向我豎起手指公表示稱讚。

「個暗格入邊好似有啲嘢。」阿翔一邊講一邊踎低，伸手入去個暗格裏面。

而阿翔將隻手抽返出嚟嘅時候，手上面仲攞住一張羊皮紙。

「入邊應該係得咁多嘢啦。」阿翔再用另一隻手伸入暗格入邊摸索多一次。

「我哋快啲打開呢張紙睇吓啦。」阿宗講。

呀翔隨即就喺我哋面前打開咗個張羊皮紙。



「呢一個係…地圖？」阿宗遲疑咗一陣之後用問問題嘅方式向我哋講出咗佢嘅睇法。

「應該就係，佢角落頭寫住1樓2樓3樓，應該就係對應住呢個迷宮嘅第一層第二層同第三層，我哋入嚟嗰時咪見到啲門都分開咗三個層數嘅。」阿翔分別用手指指着三幅圖左上角嘅字。

「至於啲箭嘴…」阿翔縮開手，皺起眉毛開始思考。

「我諗有機會係講緊門口嘅位置，我哋入嚟嘅時候係2樓入嚟，然後我揀咗正對面嗰道門，跟住就係呢間房搵到呢張地圖，對應返2樓嗰張地圖，如果呢間房就係map 嗰間嘅話，咁下面個藍色箭嘴就係我哋頭先入嚟嘅Entrance No.3，而且我哋喺等候室嘅時候我有仔細觀察過呢個迷宮，我記得佢啲鐵門嘅分布大致同呢張地圖都係咁上下。」我用手喺羊皮紙上邊比劃，同佢哋兩個解釋我嘅睇法。

「我諗ryan你講得啱，咁我哋就知道所有鐵門嘅位置，當我地攞到第二條鎖匙之後，就可以直接搵出最近我哋嘅鐵門離開呢個迷宮，唔使好似盲頭烏蠅咁四圍鐘，盡量避免遇到其他組俾人搶返走條鎖匙嘅風險！」喺得知依張地圖有幾重要之後，阿翔眼中流露出掩藏不住嘅興奮。

［84］
「咁但係三樓個個呢？個箭嘴喺迷宮入邊嘅？仲要間房寫住guard room。」阿宗指住佢所講個個箭嘴，講出自己嘅疑惑。

「…規則到話一旦有小組用鎖匙打開門，並未持有鎖匙的小組亦隨即落敗，將由守衛帶走。我估依間應該係佢地嘅房，然後佢哋帶人走就會喺嗰度帶走？」阿翔眼中頭先嘅興奮消失得無影無蹤，思考左幾秒鐘之後用帶有詢問我哋意見嘅語氣講。

「唔知道呢，你呢個推斷都合理嘅，我哋依家都係唯有假設住喺咁樣先，或者之後我哋又會搵到關於呢個迷宮嘅線索，到時可能就會明白。」我回答阿翔。解釋得通嘅理由並唔只依一個，只可以話阿翔講嘅假設可能性係最大。

「冇錯，唔肯定嘅嘢就唔好理住啦。唔可以嘥時間喺呢啲會鑽牛角尖嘅位置，雖然我哋攞到呢個地圖都好有用，但係真正幫到我哋離開呢個迷宮嘅係鎖匙，我哋要快啲搵到掠奪卡先得喇。」阿宗提醒我哋。

阿宗講嘅嘢相當有道理，而我哋亦都決定繼續前往下一個房間。

「Ryan，你繼續揀一道門啦」阿宗再次將前進方向嘅選擇交俾我。

「嗯。」我簡單回應完阿宗之後，開始思考應該行邊個方向。

「…以而家嘅形勢嚟睇，我哋身上冇掠奪卡，除非咁岩嗰間房間有規則所講嘅特定方法，如果唔係我哋遇到其他組嘅時候只有機會成為攻擊嘅對象。所以喺攞到掠奪卡之前，應該要盡量避開其他小組。阿翔你俾多次個地圖我睇吓。」我簡單咁分析左而家嘅情況，而係呢個時候，頭先嘅地圖就大派用場。

［84］
「我哋嘅右手邊係另外兩組入嚟嘅位置，而且距離我哋而家嘅位置比較近，相反左手邊只係一隊，同埋距離都比較遠，向左行嘅風險比起向前同向右都低得多。」我喺地圖上面用手指比劃。

「就咁決定啦，冇特別嘅我哋快啲起程啦。」阿宗講完之後隨即就望向左手邊嗰道門。

係呀翔將地圖收返好之後，我哋就行到左邊嗰道門前，將門打開進入下一個房間。

我作為第一個打開門進入房間嘅人，差少少我就以為自己搞錯咗方向睇錯地圖。因為我見到嘅係同一開始入嚟迷宮嘅時候嗰個房間一樣嘅結構。

空蕩蕩嘅房間，其他三面牆都係實木房門，燈光嘅佈置同埋攝像機都同一開始嗰間房一模一樣。因為我打開嘅嗰道門都係實木房門，以及擺放喺房間正中間嘅一個木箱同埋旁邊嘅一大抽鎖匙，我先知道自己冇行返去起點。呢個房間結構嘅落差同頭先個礦坑房間實在太大。

「呢間房幾乎乜都冇嘅。」就連阿宗亦都因為太大嘅落差而忍唔住講出口。

亦都因為呢個房間實在太過空蕩，於是乎地面嘅木箱同鎖匙成為咗我哋唯一嘅焦點，我哋略過左對房間嘅探索，直奔木箱同鎖匙而去。

就係我攞起木箱，阿翔攞起鎖匙，大家都準備一探究竟嘅時候，突然傳來扭門柄嘅聲音，一道實木房門隨即被打開。