《慾望樂園》

暫時都仲係兩至三日，不過最近忙啲，依幾次都係第三日先出文

［161］
來者正喺守衛四人組。

「第十組，你哋已經喺依場迷宮逃脫競技入面落敗咗，我哋係嚟帶你地走嘅。」講緊嘢嘅人就喺Yuki。

我同Alex傾番頭先個場掠奪嘅時間已經足夠班守衛過嚟依到。

「好啦，我要問嘅都問曬，依條就喺我地組嘅鎖匙，快啲去開門走唔好俾其他組搶左去啦，可惜喺依啲地方見到你啦，如果喺外面嘅世界，我一定要嚟多場覆桌。」Alex講完之後攞出佢哋組嘅鎖匙拋向我。

「放心，我一定會贏依場迷宮逃脫競技！」我將拋過嚟嘅鎖匙緊緊咁接住握喺手中。

「唔好再咪咪摩摩啦！！再唔行就俾啲滋味你地歎！」Yuki同行嘅其中一個守衛向Alex 佢地呼喝。

「再見，希望下次可以做吓隊友啦。」Alex向我伸出拳頭。

「再見啦。你講得啱，喺到見到你真喺可惜。」我都伸出拳頭同Alex完成碰拳。

「要行啦。」旁邊嘅Yuki一直都唔出聲，直到我地完成碰拳之後佢先催促第十組。

而且唔知喺咪我諗多左，佢好似喺我地碰拳嘅時候眼神下意識地閃避，就好似唔敢睇到依一幕咁。

隨即Alex同佢兩位隊友就行向前嚟接佢地嘅守衛，喺守衛包夾佢地嘅狀態之下將佢地由房間中帶走，並且關上門，依家房間入邊又得番我，阿宗同阿翔三個人。

［162］
「辛苦你啦Ryan！全靠你我地先攞到第二條嘅鎖匙！」阿翔拍一拍我手臂。

「又會咁啱佢地個副作用會喺咁，如果唔係都仲要靠你去掠奪。」我望向阿宗。

「第8組成功開啟Entrance No.8，第4組因並未持有鎖匙而落敗，守衛將會前往帶走第4組。」突如其來嘅廣播宣佈咗最新嘅賽果。

「第4組咪對我哋用兵捉賊個組囉，我都估到以佢哋最後嗰個狀態遲早都輸㗎啦，我地都喺快啲起程去打開門離開依個迷宮啦！而家剩低嘅小組越來越少，如果佢哋未有鎖匙嘅話，應該好心急咁樣周圍搵緊我哋，遇上佢哋嘅話就麻煩啦。」阿宗嘅提議相當合理，以我哋而家嘅狀態最應該避免節外生枝。

「你講得啱，事不宜遲我哋而家就出發喇。」阿翔講。

「…」一聽到阿宗嘅說話，一股違和感又湧上心頭，令到我突然陷入沉思，思考違和感嘅來源。

「喂ryan！做咩皺晒眉頭冇晒反應呀？你冇嘢吖嘛？」阿翔捉住我嘅膊頭搖一搖我。

「啊冇…我想問你哋，有冇種感覺，硬係覺得好似有啲奇怪？」經過頭先短暫嘅思考，我依然搵唔出違和感嘅來源，但係呢種感覺依然揮之不去。

「感覺有啲奇怪？你嘅意思係邊方面有啲奇怪？」阿宗聽完之後百思不得其解，唔明我想表達嘅嘢。

［163］
「即係我意思係，你哋有冇一種感覺，入到嚟呢度之後，硬係有啲嘢唔對路，總覺得我哋有啲嘢係未搞清楚咁…」我已經盡左全力表達自己想表達嘅意思，但係畢竟就連我本人都未搞清楚到底依總奇怪嘅感覺係咩一回事，於是我亦都只可以講到咁。

「我記得你開頭都講過，話睇完個規則之後有種違和感，但係我暫時都冇同你一樣嘅感覺。」阿翔諗咗一陣之後講。

「今次呢場活動咁大型又咁複雜，又要逃出呢個迷宮，又要面對各式各樣掠奪嘅方法，可能有啲嘢未摸清楚都唔奇怪嘅，不過既然我哋已經有晒鎖匙，倒不如快快脆脆離開依個濕鳩迷宮，咁就唔使浪費腦汁係呢個地方啦。」阿宗安慰我講。

「阿宗講得啱啊，我哋如果再浪費時間喺呢個地方嘅話其他組就會搵到我哋㗎啦，盡快離開先至係我哋要做嘅事。」阿翔再次催促我哋要起程。

「…嗯，可能真係我諗得太多，我哋都係盡快離開呢度啦。」雖然我依然感到違和，但始終唔可以白白停喺呢間房浪費時間，一陣遇到其他組就麻煩。

「雖然我哋知道啲鐵門喺邊個位置，但係我哋頭先咁樣跑法，已經唔肯定自己到底係邊間房啦。」阿翔攞出地圖打開。

「都唔一定要知道自己係邊間房嘅，我哋只要向着其中一個方向行，行到前面冇門得返埲牆就即係行到迷宮嘅邊緣，到時再沿着邊緣行遲早就會搵到鐵門。雖然呢個一定唔係最短路線，但係唯有係咁啦。」我伸出手指喺地圖上比畫。

「就咁話！今次真係要起程啦！」如是者，阿宗帶頭向住其中一個方向出發。

但係令我地估唔到嘅喺，一行出依間房我地就遇上左另外一組，而且，竟然會喺依到見到佢！！

之後咪有條友提過主角
咩天堂跌落地獄
即係攞key=唔係真係贏lor

有文

由規則度諗既話，可能開完門門後邊都未必係出口？

始終由開始到呢家都好似冇公佈邊組成功逃出迷宮，只係話邊組打開左門

畢竟好難保持速度，某啲章節明顯要特別花精力去寫。
寫作除咗文筆，創意，想像力，世情人性嘅理解，更需要恆心同耐力。

又live左

轉下對手視角
呢個鋪排好睇

樓主加油
等你出文

好快就真相大白

多謝支持！我會俾心機㗎

真係呀
加上有陣時寫到一半會發現咁樣寫會有bug，於是仲要花好多時間諗點樣可以順理成章

［164］
「小心！其他組啲人到咗啦！」就喺作為先頭部隊嘅阿宗一打開門，對面就有一把熟悉的聲音傳來。

聽到呢把熟悉嘅聲音，我即刻一個箭步跟上，穿過房門同阿宗一齊嚟到呢個房間。

同我諗嘅一樣，聲音嘅主人係一個我認識嘅人，而令我感到意外嘅喺，對面組三個人我全部都識！

首先喺擋喺佢地組最前面，正喺到同阿宗對峙緊，留住一頭凌亂長髮嘅高大男人，佢就係我第一次作為人力車車夫被帶到鬥技及小型活動場嘅時候，同阿宗比賽嘅對手—9號。

而企喺9號後邊嘅，正正就喺早排同我喺商品沖涼房有過一面之緣嘅娜姐，娜姐正喺到伸出手保護住企喺佢身後面嘅最後一個隊友。

而最後嗰個，就係阿晴！

「我要使用掠奪卡—…Ryan?!?!」本來企喺最後邊嘅阿晴正高舉掠奪卡向鏡頭準備要使用，但我嘅突然闖入令到佢中途停止咗。

「阿晴！做咩停曬手啊？我哋仲未攞到第二條鎖匙㗎！呢啲機會唔可以放過㗎！」9號聽到阿晴停左落嚟冇繼續用掠奪卡於是即刻催促阿晴。

「但係…」阿晴顯得左右為難。

「我地走啦，趁對方仲未用出掠奪卡！」最後入到嚟依間房間嘅阿翔見狀喺我地身後細細聲講。

「阿晴，連你都喺到…」阿宗同阿翔都移動緊腳步準備離開，但係我反而向前行並且主動展開對話。

「ryan…」阿晴回應我，佢嘅表情顯得相當為難。

［165］
「佢喺你嘅熟人？」9號見狀隨即向阿晴發問。

「喺，對方曾經救過阿晴，算係阿晴嘅恩人。」娜姐表情嚴肅，代替啊晴回答。

「阿晴，你諗清楚啊，呢個可能係我哋最後嘅機會㗎啦，冇人知道如果輸咗會面對乜嘢下場，喺呢度大家都身不由己，你一時嘅心軟可能會害咗我哋㗎。」9號得知大概情況之後對阿晴講。

「阿孝…但係我真係唔想同佢做敵人…」阿晴顯得不知所措，雙眼開始通紅。

「Ryan，喺場競技開始之前我都同你講過㗎啦，喺呢個地方，曾經嘅朋友變成敵人一啲都唔出奇，我哋而家爭少少就贏㗎啦。」阿宗勸喻我離開。

「唔得！我做唔出啊…等我仲以為紅燈區已經係最慘！原來競技活動係殘忍咁多架…」阿晴揼低頭，眼淚水一滴一滴咁跌落嚟。

「唔得！我唔可以就咁走咗去㗎！最少…最少俾我幫埋佢哋搵到多條鎖匙先！求吓你地！幫下我！」我擰轉頭向身後嘅阿宗阿翔講。

「阿晴！我知你好唔想咁做，但係你繼續咁天真嘅話，遲早喺呢度生存唔到落去㗎咋！」娜姐擰轉身雙手搭着阿晴膊頭。

「Ryan！你咁樣意氣用事會連累晒成組人架！」阿翔捉住我隻手，似乎準備夾硬嚟都要拉我走。

「Ryan，你係一個善良嘅人，只可惜有陣時天意弄人。我哋嗰條鎖匙只可以喺你哋嗰組度搵到！」阿孝講完之後攞出一張羊皮紙。

［166］
「呢一個係我哋喺迷宮入邊搵到嘅提示，鎖匙一共只係得11條，目前為止已經有四組集齊兩條鎖匙離開咗迷宮，四組因為冇鎖匙輸咗，頭先仲有一組因為掠奪卡嘅副作用而輸咗，每一組一開頭會派一條鎖匙嘅話即係而家就得返我同你兩組，頭先阿宗話你地爭少少贏，即係你哋而家攞住兩條鎖匙啦，如果我哋想贏嘅話，就必須要喺你哋手中搶過鎖匙！」呀孝將羊皮紙打開，上面畫有同我哋手頭上一開始獲派嘅鎖匙一模一樣嘅圖案，然後下方有一行文字寫住total：11。

睇到呢個真相嘅我一時間唔係好接受到，我既想贏咗呢場競技，然後喺野馬嘅口中得知逃出呢度嘅方法，但同時我又擔心如果阿晴輸咗，唔知會面對啲乜嘢懲罰。

「Ryan！就算你會怪我都好我都要做㗎啦，我明你唔忍心同對方成為敵人，但係依家情況就係如果對方要贏我哋係唯一嘅敵人！我哋兩邊都冇得揀㗎啦，就算夾硬嚟，我都要捉你走！」阿宗講完之後從後抱起我，準備強行帶我離開。

「阿晴！既然你唔忍心嘅就等我嚟啦！」阿孝轉身行去阿晴，並且喺阿晴手中搶去嗰張掠奪卡。

「阿翔！走啦！」阿宗見狀就抱起左我準備同阿長一齊衝出呢間房間。

「我要使用掠奪卡—…」阿孝已經講到一半。

真係冇辦法改變呢個狀況啦咩？我同阿晴兩組只可以贏一組？

去到呢個咁緊急嘅情況，我嘅大腦就好似進入咗精神時光屋一樣，明明現實只係過咗零點幾秒，但其實我已經諗咗好多嘢。

可能開咗門先係真正嘅戰鬥

唔通可以share鎖匙

［167］
「由天堂跌落地獄個種希望變絕望嘅瞬間，可以最大地滿足到客人玩弄生命嘅慾望。」「商品以小組型式進行比賽，以於迷宮由出口逃脫為日標。」「今次將會有34名商品參加我哋嘅迷宮逃脫競技」各種各樣關於依次迷宮逃脫競技嘅資訊係我大腦中回憶，而我終於成功搵出咁多資訊嘅關連之處！

「咪住！！！！！！！！我哋仲可以兩組一齊贏㗎！！！！」我嗌得聲嘶力竭，甚至打斷咗阿孝嘅說話。

「你聽埋我講先！！我唔會走！你聽完如果都係覺得要掠奪我哋嘅鎖匙到時再掠奪都唔遲！！」趁着阿孝俾我打斷咗使用掠奪卡，我繼續乘勝追擊。

「Ryan！唔好意氣用事啊！我哋已經可以逃離呢個迷宮㗎啦！阿宗仲唔快啲抱佢走！」喺阿翔眼中我一定係傻咗。

「咪住先！我哋仲有張掠奪卡㗎嘛！你哋想嘅大不了咪再搶番返嚟！更何況！我哋根本就仲未可以喺呢個迷宮入邊逃離！呢個係一個局啊！」係我講完之後，阿宗終於放返我落地。

「阿孝，咪住先，不如聽埋佢講先！」娜姐聽到之後都幫我一齊勸喻佢嘅隊友。

「我梗係聽啦，佢哋仲有掠奪卡，而家不利嘅係我哋。」阿孝喺呢個環境之下依然非常冷靜。

「喺一個局？Ryan 你咁樣講係乜嘢意思？」阿翔明顯對我所講嘅嘢感到非常疑惑。

［168］
「大家聽我講，集齊兩條鎖匙打開鐵門根本唔係離開迷宮嘅方法。」見大家因為各種原因終於都要聽我講埋先，我即刻深呼吸一口氣，整理好語調，向佢哋解釋我發現嘅嘢。

「ryan，點解我唔係好明你講咩嘅？打開鐵門行咗出去咪離開咗迷宮囉，如果唔係佢規則叫我哋搶鎖匙去開門嚟做乜嘢啊？」阿晴緊握雙拳，將手舉到胸前，並且膊頭用力收緊，好明顯佢仲比頭先嘅情況嚇親，而顯得非常之緊張，而且阿晴滿臉疑惑，唔能夠理解我咁講嘅理由係咩。

「冇錯，首先有問題嘅地方就係規則。」我將一開始馴鹿俾我哋嘅迷宮逃脫競技規則表重新攞出嚟，並且向在場咁多位展示。

1.商品以小組型式進行比賽，以於迷宮由出口逃脫為日標。

2.每組會獲派一條鎖匙。

3.鎖匙可以用於打開各小組入場時的門，當有小組透過上述門離開迷宮後，門將被再次關上。

4.一旦有小組用鎖匙打開門，並未持有鎖匙的小組亦隨即落敗，將由守衛帶走。

5.除非鎖匙已被帶走，否則必需由小組內其中一人保管。

6. 鎖匙的奪取只可以通過迷宮略奪卡上或房間中的特定方法。

7.迷宮內藏有機關及道具，包括上述略奪卡。

8.時限為三小時。

「大家望吓呢個規則表嘅第一點同第三點。」我用手指着我所講嘅地方。

所有人見我咁樣講，亦都稍為放低戒備，行近我望向規則表。

［169］
「第一點個到講我地依場競技嘅最終目的係由迷宮嘅出口逃脫，而第三點就講話鎖匙喺打開我地入場時候嘅門，跟本冇講過出口就喺個道鐵門！」我望住佢地等待佢地嘅反應。

「都可能係佢解釋得唔好啫，會唔會喺你過份解讀左佢嘅意思啊？」阿孝向我提出疑問，但明顯佢嘅語氣同眼神已經話左俾我聽佢覺得我有道理，只係想我提出多啲證據。

「首先，佢第一條好具體講明喺要由迷宮嘅出口逃脫，而唔係由迷宮逃脫，同依種表達方式明顯喺講緊依個迷宮喺有專門嘅出口，而唔係是但搵個地方就可以離開。仲有嘅就係，你哋入嚟嗰時有冇留意，外面鐵門係有個門牌寫住Entrance。」我相信咁樣講已經可以解答到阿孝嘅問題。

「係呀！我記得入嚟嘅時候，出邊係有塊牌寫住Entrance NO.9！」阿晴聽到我咁講之後，帶着崇拜嘅眼神向我講，而佢似乎亦都放鬆返唔少。

「冇錯，你哋係第九組，所以係Entrance NO.9。我哋係第三組，所以我哋入嚟嘅時候喺Entrance NO. 3。」我向阿晴點一點頭之後講。

「仲有！每次有小組用鎖匙打開鐵門嘅時間廣播都係話打開咁Entrance，跟本個啲鐵門重來都唔係迷宮出口，而只係迷宮入口！」就係頭先咁緊急嘅情況一絲靈感湧入我大腦之後，我就將一切都諗通晒。

「咁但係由鐵門離開嗰啲小組廣播都冇講佢哋輸咗啊？？雖然…」娜姐講到一半，自己都覺得自己講嘅嘢係有疑點。

最近都係三日先更新一次，要大家等咁耐唔好意思，等我忙埋手頭上嘅嘢，會盡量回歸返以前兩日一更嘅節奏