《慾望樂園》

係喎

對唔住呀晴！係我錯！
而家等我切j謝罪

象徵式兩吋算啦

[65]
一個高大魁梧，厚實而且橫練嘅身影率先進入我嘅視線，都仲未睇個樣我已經知道係阿宗，依種咁高大嘅身形實在太過標誌性。而佢對面嘅，就係當日同而家已經變成客人們收藏品嘅7號對戰嘅11號，兩個人分別挨住等候室嘅牆壁面對面坐低，喺等候室房門被打開嘅同時，兩個人亦都不約而同咁望向我。

「計埋18號你哋呢一組就人齊啦～喺活動就嚟開始之前我會再過嚟搵你地，你哋就喺呢個等候室到相處下先啦～」馴鹿講完之後就離開咗並且關上等候室嘅房門，佢講嘢嘅時候永遠語氣都好似客戶服務熱線嘅接線員，友善又誠懇嘅語氣，再配上商業式嘅微笑。咩叫做人面獸心？佢就係呢一種啦。

「阿宗我哋又見面啦，之前都冇機會唔該你，係我啱啱入嚟嘅時候講關於呢度嘅嘢俾我聽。」阿宗作為我入咗嚟呢度之後第一個提醒我嘅人，難得又再見返佢，我第一時間先同佢打聲招呼。

「係你呀？自從果次之後我都有聽過關於你嘅嘢，聽講你評價唔錯喎，有冇收到好多着數啊？」嗰把洪厚有力嘅聲音由阿宗喉嚨中傳出。

「有係有，兩位副園長俾咗唔少好嘢食同埋改善咗我囚室嘅環境，但係我並唔係因為咁樣而咁落力取悅客人，我咁落力只係因為想生存落去同埋救人。」虎鯨曾經講過阿宗係競技場好受歡迎嘅商品，咁佢知道評價好會有着數都唔出奇，但係我首先要做嘅嘢，佢澄清自己唔係因為咁樣而為樂園賣命。

[66]
「世界上冇免費嘅午餐㗎，佢哋有冇要求你做佢哋嘅專屬商品啊？」阿宗同上次一樣，對住我就好似教新仔點樣生存一樣。

「咩係專屬商品？」我一臉疑惑，對於阿宗所講嘅呢樣嘢一啲頭緒都冇。

「佢哋仲未同你講咩？都啱嘅，如果你死咗係呢場活動，佢哋就盞搞。話俾你聽啦，兩位副園長似乎會互相比拼佢哋嘅業績，而係呢個慾望樂園入邊，最可以產生到盈利嘅就係我哋呢啲人類商品。每當出現評價高嘅商品嘅時候，佢哋就想爭奪嗰個商品嘅獨家代理權，令到嗰個商品只會出現係佢哋負責嘅活動或者服務入邊。從而增加自己嘅業績。雖然佢哋冇同你講過，但係我估佢哋咁做就係想拉攏你。」阿宗用手托住下巴，開始為我解釋。

「咁你呢，你應該都高評價個喎？」我皺起眉頭思考，認為既然係咁冇理由佢哋會放棄阿宗依塊肥豬肉。

「佢哋梗係有問過我啦，不過我兩邊都唔幫，拒絕成為專屬商品，做咗專屬商品當然係多咗好處，但係同時你都會得罪另外一方，拒絕晒兩邊嘅話就因為你對兩邊都仲有價值，反而佢哋唔會對你做啲咩，所以自己諗清楚啦。」阿宗仲除咗有一副好體格同埋格鬥技術之外，亦都有一套佢自己喺呢度嘅生存之道。

「你頭先話我哋又見面？我好似係第一次見你真人咋喎，對上果次同你都係隔住囚室傾咗兩句。」阿宗一邊講一邊上下打量我。

「就係果次我後來俾人帶咗出去拉人力車，然後跟住客人嚟到鬥技及小型活動長嘅包廂見到你喺競技場出場，仲有11號你都係。」我回答完阿宗嘅問題之後望向左11號。

[67]
「叫我做阿翔啦，11號留返比啲樂園職員叫啦，你哋傾得咁開心就唔驚對方係一陣間嘅敵人咩？馴鹿話我哋係一組，但係佢都冇話過我哋喺一組乜嘢，可能係一組對手呢？」阿翔講嘢嘅語氣相當冷淡，有種槍王入邊張國榮一開頭嘅時候嗰種感覺。

「我諗機會就細啲啦，馴鹿頭先話我哋呢一組已經齊人，啫喺應該唔止我地一組，如果我地嘅分組喺敵對嘅，應該唔會咁早就將高評價嘅商品分埋同一組，佢咁樣嘅分組方法，我地似會係隊友多啲。」我就地而座，開始分析頭先阿翔所講嘅野。

「嗯，Ryan 講得無錯，我都係咁諗，不過以防萬一，如果一陣我地真係敵人，我喺唔會手下留情架，希望你地明白啦，當然你地都唔使對我手下留情，我唔會怪你地。喺依個地方出到場就大家都身不由己，當然啦，到時會恨我都係正常嘅。」就喺我講完之後，阿宗就接住落去繼續講。

「嗯…你一開始都有提過我，我諗我明你咩意思。」我將視線轉移地地上邊，諗起7號嘅下場。

「你地喺咁諗就最好啦。」阿翔講完之後就向等候室嘅閘門方向望過去。

我跟隨住阿翔嘅目光一齊望向閘門，咦？今次冇搵野遮住啦啵。我起身行近閘門透過閘門上嘅空隙望出去，一座相當有規模嘅建築正立於大型多功能活動場嘅場地上面。

有隊友好似好啲，可以多啲戰術運用，打法多變。

Let’s goooo

咁無㗎喇

仲要兩個都高人氣，不過我諗會有人想做佢哋？

咁樣可以多啲描寫，個故事可以有更加多可能性。

戲肉之一嚟啦

多啲位比我發揮

［68］
立於場地上邊嘅，係一個用水泥澆鑄而成，好似石棺一樣嘅長方體建築，由外邊睇落去，可以睇到建築物上分佈住一道道嘅門，有啲位於地下，有啲就喺由樓梯道往中間以及接近天台嘅位置，單憑出邊門嘅分布，似乎呢個建築物一共有三層高，而另外我都留意到，周圍包廂開始有客人入座，睇嚟距離活動嘅開始都唔遠。

「咁重手筆起啲咁嘅嘢…」我一邊望住個個水泥建築，一邊講。

「對佢地嘅收益嚟講，跟本就不值一提。」阿翔回應我所講嘅野。

「你嚟之前我同阿翔已經仔細留意過依棟野架啦，不過我地就冇發現到啲咩特別嘅野。但係照我睇，我諗又會係樂園間中搞嘅大型活動。」阿宗一邊講一邊重新望向外邊。

阿宗嘅推斷無錯，我都係因為野馬同我講我先會預先知道，似乎阿宗都知道好多關於慾望樂園嘅事。

「你介唔介意講多少少，同埋你話又會係，你之前都參加過？」我並冇向佢哋透露我對呢件事嘅知情，我面向阿宗坐返低，等待佢對我嘅回應。以阿翔都好明顯好關心阿宗所知道嘅情報，喺度默默咁注視着阿宗。

［69］
「你望吓我頸圈上面嗰個任數啦，我係第四任嘅13號，我已經喺依個地方差唔多四年啦，我諗現任嘅商品入面我喺嚟得最耐嗰個，呢度大多數嘅嘢我都見過啦。」阿宗用手指指向自己頸圈上嘅位置。

「就好似啲商場間中會有推廣活動，馬會有新年金多寶一樣，慾望樂園都會搞啲活動嚟吸引客人消費，通常都會涉及到好多商品參加，但係每次都會死好多人，而且就算冇喺活動中死咗，失敗嘅商品多數都冇咩好下場。如果你哋想要一陣活動嘅情報嘅話我就唔知啦，佢每次呢啲大型活動嘅玩法都唔同，上次我參加嘅時候好似係有一套好紅嘅劇集叫魷魚遊戲，果次活動就係將嗰套野啲遊戲搬出嚟玩。」阿宗可以話毫不保留咁將佢所知嘅嘢話俾我哋聽。

「我都知道你講嗰次活動，有客人同我提過樂園舉辦左魷魚遊戲呢樣嘢。」阿翔接着回應。

而阿翔呢句說話引起左我嘅注意，咁睇嚟佢喺度嘅時間都唔短，而且點解客人會向佢提起嘅呢？

「如果真係我所講嘅大型活動嘅話，咁我哋一定要打醒十二分精神，佢同我哋平時嗰啲活動唔同，為咗比客人全新嘅刺激，無論係規則嘅複雜程度定係困難度都高咗唔少。」阿宗嘅表情開始變得嚴肅起嚟。

咔，而就係呢個時候，等候室嘅房門傳來開鎖嘅聲音。

房門被推開，來者正喺頭先將我帶嚟呢度嘅馴鹿。

［70］
「所有小組嘅商品都已經到齊啦～活動好快就會開始，由於今次活動嘅規則比較多，我哋樂園好人性化咁整咗張規則表俾你地～趁住仲未要出場，你哋好好地咁研究吓啲規則啦～」馴鹿一邊關上房門，一邊由褲袋攞出一張摺埋咗嘅紙遞向我哋。

由於我對馴鹿非常之厭惡，由佢入嚟等候室個一刻我就倔住佢。而佢喺留意到我視線嘅情況之下，繼續帶住嗰個笑容同友善嘅眼神同我對視。

而阿翔就起身由佢手上接過嗰張紙。

「你哋唔使理我㗎啦～由你哋出場之前我都係喺呢間房待命，你哋要商量要討論嘅就自便喇～當我唔喺度就得㗎啦～」馴鹿企喺等候室門前，雙手重疊放喺跨前，睇落就好似豪宅嘅管家咁。

「我地睇吓張紙嘅內容先啦，早啲知道可以提早做定準備。」一直都坐喺度嘅阿宗手撐膝頭，猛然企起，企喺度嘅阿宗身形更顯高大，差唔多1.9米嘅身高，再配合佢嘅身材簡直同巨人一樣。

就喺阿宗講完之後，我亦都行近阿翔。

我地三個人圍成一個細圈，望向阿翔手上嘅紙，而阿翔就喺我地面前慢慢打開張紙。

1.商品以小組型式進行比賽，以於迷宮由出口逃脫為日標。

2.每組會獲派一條鎖匙。

3.鎖匙可以用於打開各小組入場時的門，當有小組透過上述門離開迷宮後，門將被再次關上。

4.一旦有小組用鎖匙打開門，並未持有鎖匙的小組亦隨即落敗，將由守衛帶走。

5.除非鎖匙已被帶走，否則必需由小組內其中一人保管。

6. 鎖匙的奪取只可以通過迷宮略奪卡上或房間中的特定方法。

7.迷宮內藏有機關及道具，包括上述略奪卡。

8.時限為三小時。

搶匙賽

即係啲小組只要唔搶其他人既嘅匙，而直接開門，就可以大家一齊贏？

如果和平便沒有娛樂性，冇娛樂性下場都唔會好，所以一定要搶人地果啲

呢樣真係

然而樂園並唔會俾啲咁嘅事發生

冇錯，所以樂園唔會咁容易比冇娛樂性嘅嘢發生

又唔可以殺其他對手，如果唔係之後再有大型活動會比所有商品針對，到時就仆街，我自己咁諗

好睇
推