《慾望樂園》

終於可以再推主線

推

推

加油, 出密啲

有文未？
又3日了

有啦有啦，啱啱好準備更新

多謝提供意見

［235］
「好啦～阿宗你等我啊～我好快返嚟，一陣我一定要好好地咁同你。聚。吓。舊～」護士講完之後留左個飛吻俾阿宗，之後道去左搵馴鹿進行交接。

我地一眾人望向阿宗，只見佢面如死灰，雙目無神，用一聲嘆氣回應我地向去投去嘅可憐眼神。

「你…同佢好似都幾熟咁啵。」娜姐帶住一個尷尬而又不失禮貌嘅微笑

「我嚟咗呢個地方咁耐，醫療室呢度都可以話係經常出入㗎喇，個護士似乎好鍾意啲比較高大嘅男人，每次我過到嚟都俾佢騷擾…所以我頭先聽到其中一個獎勵係去醫療室接受治療都真係憂喜參半…」我哋可以喺阿宗嘅語氣當中聽得出嗰種無奈。

我望向同樣身形比較高大嘅阿孝，佢留意到我然後隨即點一點頭，似乎佢都係受害者之一，只不過因為阿宗都喺度，所以有人幫佢吸引火力。

「醫生～我呢邊交接完啦，人齊冇問題～」護士自以為俏皮可愛地向醫生做出ok 嘅手勢。

「你地過嚟啦，我幫你哋安排吓床位先，轉頭我會逐個逐個同你哋進行檢查。」醫生舉起手示意我地跟佢行。

我地被帶到病床區，由醫生安排我地各自嘅病床。

「你地仲行得企得應該就唔會有太重傷嘅啫，你地座住喺床邊先，我檢查過唔需要即時處理嘅會搵守衛帶左你地去沖涼先。」醫生分別示意我地到各自嘅床位，並喺黑色單夾板上嘅文件作記錄。

［236］
我坐到病床邊，輕輕按壓自己受傷嘅位置，自己確認一下受傷嘅情況。

我傷得最重嘅地方就係被黑人打中嘅右手手臂，被打中嘅位置浮現出紫黑色嘅瘀痕，而且明顯腫起，我輕輕轉動手臂，除咗肌肉會傳來痛楚之外，似乎都冇乜大礙。起碼我依家嘅感覺比起之前俾mk阿叔用警棍打嘅時候好得多。

不過我冇咩事其實都真係要多得黑人最後藥效過去而倒地，雖然阿晴撲上嚟就算黑人真係踩落嚟都隔多一層，但喺到時阿晴就一定唔係受少少傷咁簡單…唔得！轉頭有機會要話吓佢先得！

「你係少少皮外傷啫，去沖個涼，番嚟同你消個毒包扎吓好快好番架啦。」醫生嘅聲音隔住病床嘅布簾傳嚟，睇嚟佢已經開始咗檢查。

「知道…」係阿晴把聲，佢冇大礙就太好啦。

跟住落嚟，醫生就逐一為我哋進行檢查，除左阿宗同阿孝傷勢比較嚴重，出現骨裂腦震盪等症狀之外，其餘嘅人基本上都係跌打瘀傷。

我哋係檢查之後分別被帶到沖涼房沖涼，而我喺最後一個接受檢查嘅人，所以亦都係最後前往沖涼嘅人。

過程中我一路留意負責押送我嘅守衛，途中見到嘅樂園職員，但係都見唔到野馬嘅身形，我以經有少少急不及待，希望可以見到野馬問個究竟。

不過野馬似乎覺得而家未係機會，我諗諗吓都合理嘅，如果佢所講幫我逃離呢個地方係真嘅，某程度上佢嘅行為就係背叛緊慾望樂園，都唔怪得佢要咁謹慎。

［237］
不過我相信唔使好耐，佢就會過嚟搵我，始終我已經完成咗佢嘅要求，相信我有一定嘅利用價值，只不過係到底佢咁樣幫我嘅目的係乜嘢呢…似乎我而家可以做嘅就只係得返耐心等待。

「護士，最後一個都已經完成咗清潔。咁呢批商品就交俾你哋先啦，如果有需要你就再通知我哋啦。」負責押送我嘅守衛向護士交代。

「好啦好啦你走啦，我忙緊唔得閒同你講咁多啦。」護士望都冇望過嚟就打發左守衛。

守衛隨即就即刻掉頭離開，似乎樂園嘅職員都唔太樂意對住護士太耐。

映入我眼簾嘅就係一副相當滑稽嘅畫面，護士頭先所講忙緊嘅嘢就係幫阿宗前臂打石膏，但係佢一路打嘅時候，成個人一路挨落阿宗身上邊，飽滿嘅面頰不斷喺阿宗胸肌前面輕輕磨擦。

而阿宗唔知道佢係反抗失敗，定係知道自己需要接受治療而被迫接受。反正佢就攤喺病床邊一臉無奈咁樣承受住呢一切。

反觀另外同樣受傷比較嚴重嘅阿孝就喺醫生正常嘅醫療手法之下，接受緊治療。簡直係一個天堂一個地獄。

我行返埋我張病床，途中仲可以見到娜姐，偷偷地望住阿宗恥笑佢。以及阿晴見到我返嚟之後伸手同我打招呼。

我返到病床瞓低休息，沖完涼之後個人乾爽咗的確非常舒服。

「你見唔見到阿宗啊，好彩我都唔算嚴重，食啲消炎藥止痛藥就冇事…」我對面床嘅阿翔見到我返嚟之後細細聲同我講。

我望一望自己病床旁邊放着嘅止痛藥同消炎藥，向阿祥點一點頭表示非常認同。

驚護士會呷醋搞鳩晴b

仲未有得同娜姐晴b 3p

仲未有文

推

暫時喺佢眼中阿宗吸引過主角

［238］
經歷完咁緊湊而且耗神又耗體力嘅迷宮逃脫競技，依家沖完涼換上一套乾淨嘅囚服，仲有一張舒服嘅病床，各種各樣嘅不可抗力使我好自然地平躺到病床上邊。

當我一放鬆身心，睡意就迅速地咗佔據我嘅大腦，眼皮緩緩落下，似乎經歷完頭先咁多嘅事之後我嘅身體確實係需要啲休息啦。

「起身啦懶訓豬～豬仔夠鐘要食野架啦～係咪要我好似錫公主咁錫醒你啊～」一把聲音傳入我本來已經進入深度睡眠嘅大腦，並且成功引發出我作為動物最本能嘅恐懼感覺。

個種恐懼迅速將我由睡眠中喚醒，就好似你發咗一個好可怕嘅惡夢一樣。我由睡眠中驚醒，擴張咗嘅瞳孔加上天花板嘅燈光令我冇咁快擘得大眼。透過眼皮之間嘅罅隙，我見到一個巨大嘅身影，佢好似喺度俯視住我。

嗰個身影唔知點解係五顏六色嘅，而且好似變得越來越大，好似慢慢咁係到靠近我咁樣，我嘅意識仲未係好清醒，大腦不繼嘗試理解嗰樣嘢到底係咩嚟。

隨住嗰個身影嘅越嚟越靠近，我大腦嘅越嚟越清醒，我嘅雙眼對周圍嘅光線越嚟越適應，我終於都睇清楚到底嗰個五顏六色嘅巨大身影係咩！

［239］
嗰個五顏六色嘅巨大身影就係護士本人，佢正嘟起嘴唇瞌埋眼，準備錫落我度。護士耷低頭令到佢下巴同條頸幾乎用為左一體，頸上嘅肥肉被擠壓得好似頸巾一樣圍住佢嘅頸部突起。而我睇到嘅五顏六色就係護士面上面嘅濃妝豔抹，過量嘅腮紅、藍色嘅眼影、紫色嘅唇膏再加上閃粉嘅高光。種種嘅化妝品加持之下不單止冇令護士變得比較動人，反而係增添左唔少嘅詭異。

我見到眼前呢一幕，所有嘅睡意已經被恐懼趕到冇雷公咁遠，取而代之嘅就係強烈嘅求生本能。

「醒咗！醒咗！早晨啊護士我醒咗㗎喇！」我雙手抱頭，連忙表示自己已經清醒，唔需要特別嘅叫醒服務。

「蠢豬嚟嘅～咁聽話咁老實嘅咩，你扮吓瞓咪可以呃到我個香吻囉～」護士見我已經醒咗，亦都企番直個人，雖然佢講就咁講，但係語氣好似有啲落手失敗嘅可惜。

「你啲嘢食到啦～左副園長有安排咗特別伙食俾你啦～你成日都有呢啲着數嘅？唔通…你會成日服侍左副園長？」護士嘅語氣流露出羨慕。

聽到佢咁講，我即刻望一望自己嘅餐枱，今次似乎比起上一次仲要豪華，德國鹹豬手、芝士忌廉焗薯、燒海蝦、仲有簡單雜蔬，飲品係一大支嘅德國黑啤，甜品仲有一個焦糖布甸。

「唔係啊，學你話齋，可能因為我幫佢賺得多錢啫。」我敷衍回應護士，希望盡快打發佢離開。

［240］
「通常越係賺得多錢嘅商品都越係快喺我呢度個太平間出現㗎～不過你唔使怕～我到時又會好似頭先咁樣錫你一啖，可能真係好似童話故事咁會錫返醒你呢？好啦我出返去做嘢先你快啲食飯飯啦。」護士講完之後向我嘟起嘴唇隔空錫左一啖，然後就轉身離開。

「唔得，真係千其唔死得…」喺護士行開多少少之後，我忍唔住自言自語。

「我頭先一路都喺度睇住，護士爭啲走用嘴唇啜走你啦。」阿晴嘅聲音突然由床邊角落頭傳出嚟。

我沿着聲音嘅方向望過去，原來亞晴踎咗喺牆邊，偷偷地打開咗少少我呢邊床位嘅布簾，喺角落頭偷睇住頭先嘅情況。

「嘩！你偷偷地踎喺度做乜嘢呀？」我望住阿晴鬼祟嘅眼神問佢。

「頭先護士派飯，我記得你上次有好嘢食，咪諗住睇吓你今次會唔會都有囉，仲諗住如果護士真係錫咗落嚟，我就唔同你講等你面上邊留住佢個唇膏印添。」阿晴捐過布簾，偷望我嘅餐盤。

「哇！你今次仲豐富過上次嘅！明明我哋一齊贏㗎喎，點解得你有㗎？唔公平啊！」阿晴得知我嘅配餐之後，委屈得扁起嘴。

「咁你個餐盤係啲咩？」雖然我都知自己呢個係特別配給，但係我都好奇佢哋食嘅係啲乜嘢。

「餐肉腸仔煎蛋飯，仲有啲豉油汁，飲水，冇甜品。都好過平時嘅。」阿晴死死地望住我嘅餐盤，由佢嘅語氣鐘可以聽得出，自從佢過咗嚟睇到我食咩之後，佢餐飯已經冇咗吸引力。

個護士真係好恐怖

護士先係big boss

推

搞到我都想食返隻德國咸豬手