《慾望樂園》

係我嘅錯 更新得太慢
有興趣可以去第三頁睇番［23］佢喺嗰度出場
角色太耐冇出場都係我安排得唔好

哦呢個19號

同之前描述既性格有的唔同，不過OK

我覺得都make sense

一開頭對住MK阿叔惡啲都人之常情嘅
佢後尾帶商品去做嘢嗰度，同依家性格其實差唔多㗎

冇咩嘢，可能個性唔夠特出。無記憶點記得佢。

［98］
「你講19號？喺咪想知點解佢有頸圈又着住守衛衫呢？」阿宗一下子就講出左我最在意嘅地方。

「我都有聽過關於佢嘅事，我嚟到佢已經喺咁嘅情況啦，我淨係知佢一開始好似都係一個普通嘅商品，於是喺商品之間有啲人會叫佢做叛徒或者走狗。」阿翔將佢所知嘅嘢講咗出嚟，似乎佢都對19號嘅情報有啲興趣。

「我哋行住講啦，點啊？我地落唔落去啊？」阿宗重新將注意力放返落去條樓梯度。

我諗翻起頭先啲守衛未嚟之前，阿翔問我嘅問題。

「落去啦，阿翔雖然講得有道理，但同樣我哋唔知佢哋會唔會上咗嚟，或者樓上會唔會落咗嚟，雖然咁講冇乜說服力，但我嘅直覺覺得落去好似好啲。」我的確幾堅信一條路走到黑嘅道理。

「咁就唔好嘥時間啦，起程啦。」阿宗隨即就走落樓梯，而我同阿翔都即刻跟上。

一落到去迷宮嘅1/F，我哋四圍觀望，發現呢間房同頭先落嚟2樓嗰間其實一模一樣，分別就只係對於上邊嚟講條樓梯係通向下邊，而對於下邊嚟講條樓梯就係通向上邊。

「咁啫喺又要再揀絛路行啦。」阿宗圍住樓梯行左一圈，確定冇其他特別嘅嘢。

「似乎就係啦，應該依類嘅房間就只係俾我地通向其他樓層用嘅。」阿翔佢嘅睇法同我一樣。

阿翔講完之後就自動自覺攞出地圖比我睇，似乎我已經俾佢地默認左做負責決定前進方向嘅人。

［99］
「行依邊啦，其餘3個方向嘅房間都太接近其他組入嚟嘅位置啦，好可能喺俾佢地探索過嘅，行依邊我地搵到嘢嘅機會會大啲。」我用手指喺地圖上邊指住1/F左邊數落去第三行第二個房間。

我地三個已經培養好左默契，當我決定好前進嘅方向之後，阿翔就會將地圖收好，然後阿宗就會做先鋒行去我所講嗰個方向嘅門，幫我地先確定前面嘅情況。成件事十分之有效率，都好彩阿宗喺到，於是我地組從來都唔洗擔心會出現冇人願意行頭而停滯不前浪費時間嘅情況。

「嗯！冇問題，我哋可以入去啦。」阿宗將門打開，確定入邊冇特別之後向我哋招手示意。

於是我哋三個就穿過房門去到嗰個房間，而我今次順手將門關上。

一入到去房間就好似去咗幼稚園playground一樣，地面鋪咗彩色印有唔同圖案嘅泡沫拼圖地氈，牆上面低處嘅地方鋪左防撞軟墊，而較高嘅位置就痴咗一啲乘數表、英文字母表又或者係一啲卡通可愛動物嘅圖畫。地面上放住一啲小朋友玩具同埋公仔，另外仲有一個圖書櫃，裏面放咗一啲圖書。並且用軟膠將所有尖角位包裹住，圖書櫃旁邊就放有一個大嘅籃，裏面都仲放有一啲玩具。

「嘩，呢度亂到咁，會唔會已經俾人探索過啦。」阿翔望到呢個環境，擔心我哋會浪費時間搵一啲唔存在嘅嘢。

「都好難講嘅，但係如果佢係仿照小朋友playground去佈置嘅話，啲嘢周圍擺到咁亂好似都係正常嘅。一係咁啦，我哋都照搵一下，如果搵完一次冇特別我哋就走啦。」就係阿宗講完之後，我哋就開始着手喺呢個房間搜尋。

［100］
「19號佢個名叫做Yuki，應該差唔多係兩年前左右嚟到呢個地方嘅，不過只係隔左好短時間，我諗大概係一兩個星期？佢就突然間着起守衛嘅制服，做起樂園嘅守衛。」阿宗一路檢查地上邊嘅公仔，一路突然間回答起我頭先問佢知唔知關於19號嘅事。

「咁但係佢點解無啦啦會變咗守衛嘅？」喺圖書櫃度調查緊嘅阿翔問咗我本身想問嘅問題。

「我都唔知呀，就算我喺度年資咁耐都好，我都只係一個商品，呢個樂園有好多嘅嘢我到而家都唔知。」當阿宗講到自己已經喺度年資好耐嘅時候，喺佢語氣中多少帶有一點唏噓。

「或者如果嗰時我肯做專屬商品我會知多啲嘅，ryan如果你做咗記得放啲料俾我呀。」阿宗望向我，用開玩笑嘅語氣同我講。

「你話做咗專屬商品會得罪另一邊㗎喎，我真係要諗諗先啦。」大家開始建立默契之後，我哋之間嘅對話都變得輕鬆得多。

「阿！係啦仲有一樣嘢呀！喺Yuki啱啱入嚟嘅時候，有一次佢同你一入嚟嘅時候一樣係困咗喺我隔離嘅囚室入邊，同你一樣都係好慌張㗎。」阿宗突然停低手上嘅動作，似乎一段幾乎忘記嘅記憶突然進入佢腦海。

「咁嚟到呢啲地方無啦啦俾人困住，係人都好慌張㗎啦，我都係咁，呢度個個都係咁㗎啦。」阿翔唔明白到底呢樣嘢有幾值得阿宗提起。

「冇錯個個都係咁，我喺度咁耐已經聽過好多次，每一個人都好似ryan你嗰陣咁，好慌張咁向周圍見到嘅人問呢度係邊度，你哋要對我做咩。但係Yuki入嚟嘅時候，除咗問呢啲嘢之外，仲係咁問「我家姐呢？你哋將我家姐帶咗去邊？」同埋好大聲咁樣叫一個人名——Suki。」似乎呢段記憶已經俾阿宗遺忘咗好耐，阿宗記返起就好似發現新大陸一樣。

唔通家姐係高層

不知不覺，已經第１００章。

懷疑家姐係副園長

仲未講點樣係天堂落地獄好似冇人話過開到門=贏咗

推

賣個關子先

多謝大家支持
多謝淫棍哥你俾嘅意見

越來越多疑團被挖掘出嚟

隨着主角小組喺迷宮嘅推進，過多排就會真相大白

Thank you very much

快啲出文就係最好嘅多謝

[101]
「Suki 就係佢家姐個名？咁阿宗你有冇見過佢家姐？」聽到依到有樣嘢令我非常在意，於是我停低對玩具籃嘅搜索，轉身望向阿宗發問。

「冇，一次都冇。雖然我唔知佢家姐喺呢度嘅編號，但係我從來冇聽過一個叫Suki嘅人，亦都冇見過yuki身邊出現過類似佢家姐嘅人。可能佢根本冇入過嚟，又或者可能已經一早死咗。」阿宗一邊答我，一邊用手將啲公仔壓扁，睇吓入邊會唔會收埋啲乜嘢。

「咁就奇怪…佢講到佢家姐同佢一齊俾人捉咗入嚟咁，如果佢家姐喺依個地方死咗而佢仲好似依家咁為樂園賣命，咁佢哋嘅關係似乎唔值得佢一開頭咁為對方緊張…」我講出成件事解釋唔通嘅地方。

「好出奇咩？好多時你以為幾好嘅關係，係利益或者生死存亡嘅面前根本就不值一提。為左生存，唔好講喺幫害死至親嘅人賣命，分分鐘佢會喺樂園守衛都喺靠出賣佢家姐。」阿翔雖然講緊嘅時候手上面依然搜查緊嗰個圖書櫃，但係佢嘅語氣同埋字裏行間中可以聽得出，佢講嘅時候有少少抑壓唔住嘅激動。

「會咁做嘅人都只係一啲懦夫！」一諗到阿翔講個種人，我厭惡得脫口而出。

「「會咁做嘅人都只係一啲懦夫！我冇爆到你出嚟啊，夠唔夠兄弟先！」「但係佢地話如果你講同黨出嚟，酌情考慮要你重讀依科就算，你唔講可能要退學㗎…一係我去自首啦。」「阿翔你傻咗咩，夾埋出貓喺我嘅主意，本身我哋夾好咗畢業之後一齊做生意呀嘛，我有冇個學位有乜所謂！你有咁咪一樣，你快啲讀完畢業好過啦。更何況我哋識咗10幾年，你唔係要我出賣你掛～」」就喺聽完我講之後，阿翔諗起一段對話嘅回憶。

[102]
「…唔知你仲可以保持住呢種諗法幾耐呢？要喺呢個地方生存，唔係咁易保持得住，而且會令人好蝕底。」阿翔突然好似hang左機咁停左成個人幾秒，然後回過神之後用好平靜嘅語氣講。

「就算死喺度，我都唔要抬唔起頭咁生存。」我嘅語氣相當堅定。

「…」阿宗聽住我同阿翔嘅對話，並冇參與亦冇作出任何嘅回應。

話題嘅結束令到房間內回復平靜，周圍只係傳嚟我哋翻箱倒櫃嘅時候發出嘅聲音。

亦都係因為咁，實木房門門柄扭開嘅時候傳來嘅聲音顯得特別清晰，我哋三個即刻意識到，有其他組嘅商品即將嚟到呢個房間，並且一齊轉身望向聲音嘅來源。

被打開嘅喺通向1/F第四行第二個房間嘅實木房門，對方同樣喺三個商品一組嘅小組，由兩男一女所組成，兩個男人一個肥矮一個高瘦，肥嗰個去到賤肉橫生，瘦嗰個去到面黃肌枯，共通嘅地方就係睇落俾人嘅感覺都係毒撚，而女人雖然長相一般，甚至可以話喺低於平均，黑眼圈同眼袋令佢睇落非常之殘，但拍埋兩個男人之下竟然顯得眉清目秀得多。

而今次並冇好似我地之前遇到地中海阿叔個組嘅時候咁雙方都陷入僵局，企喺兩個男人後面嘅女商品一見到我哋，就奸狡咁笑起上嚟。

「唔使搵啦！呢間房張掠奪卡喺我呢度呀！」女人將一張同我哋之前見過嘅一樣，白色背景印有黑色劍嘅卡片展示出嚟。

[103]
「我要對佢哋使用掠奪卡—兵捉賊」唔俾我哋有太多反應嘅時間，女人隨即就像嗰張掠奪卡，舉向鏡頭，並且大聲讀出要使用。

「掠奪卡—兵捉賊已成功使用，發動者係第4組，發動嘅對象係第3組，兩組嘅成員喺掠奪卡效果結束之前均不得離開此房間。第四組將會成為兵組，而第三組將會成為賊組，每回合各組需要派出一位成員，1分鐘之內只要兵組成員成功用手掌觸碰到賊組成員將視為兵組成員贏得該回合，如果1分鐘內兵組成員未能用手掌觸碰到賊組成員將視為賊組成員贏得該回合，最多將進行三個回合，如果兵組成功取得兩個回合勝利，將成功掠奪對方嘅迷宮鎖匙。」好快房間內嘅廣播就作出反應，向我哋宣佈掠奪卡嘅發動同埋內容。

雖然聽落好似係公平嘅遊戲，但係事實上喺呢個房間入邊咁細嘅空間，捉人嗰個比起被捉嗰個輕鬆得多，我地要喺呢一個最多得百幾呎嘅房間避開佢哋成分鐘實在唔係咁容易，更何況呢個房間幾乎冇遮無擋，就算我想好似之前對戰MK阿叔嘅時候咁秦王繞柱都做唔到。

「肥仔，你去做第一個啦，只要輕輕掂到對方就得啦。」嗰個女人對肥矮嘅商品講。

「你話過我贏到一局嘅話會被我摸你個胸，你講過要算數啊。」肥矮嘅商品帶着一念淫邪嘅笑容，滴住口水咁行咗出嚟。

「唉，避得頭先個阿叔避唔到呢個女人，等我嚟先啦。」阿宗講完正想起步行出去嘅時候，俾阿翔一手擋住。

「等我嚟啦，呢啲咁嘅肥豬，我知道點對付。」隨即阿翔就行到對方面前。

「雙方嘅人選已經決定好，第一局將於3秒後開始，3，2，1。開始！」廣播傳出第一局開始嘅倒數計時。

睇完，又要再等

好睇

樓豬個個應該係畀？

等睇下篇