舍爾沙登上寶座後開始想建立一套更穩定嘅政治制度，佢向波斯嘅治國專家取經，進行一系列改革。包括加強中央集權，由國家委派官僚去各地施政。官僚出身五湖四海，包括波斯人、中亞人、甚至非洲嘅阿比西尼亞人喺接受政治同財政培訓之後，被派到各省做流官，原則上幾年調任一次。
另外佢為咗緩解穆斯林同印度教徒嘅矛盾，實行宗教寬容政策，允許印度教徒有宗教自由，並吸收印度教徒喺政府機構中任職。此外亦都廢除各地穆斯林貴族嘅法律特權，以表一視同仁。
喺經濟上舍爾沙亦都有唔少改革措施，由於施政得當，蘇爾王朝好快就興旺起嚟。
但係可惜到咗1545年，舍爾沙喺同拉傑普特人打仗嘅時候，因為火槍炸膛而意外身亡。著草多年嘅胡馬雍復國機會來了。
自從被舍爾沙打敗以來，胡馬雍就一直流亡，佢曾經去過喀布爾，但佢細佬卡姆蘭唔願意交出權力，更加暗中向舍爾沙提出交換----只要舍爾沙交出旁遮普，姆蘭就會交出胡馬雍，但舍無答應到。
胡馬雍被迫帶住少量人馬逃亡波斯，波斯國王太美斯普一世對佢奉為上賓，佢仲喺波斯改信咗什葉派。
得到波斯借兵相助，胡馬雍同胞弟卡姆蘭展開喀布爾爭奪戰。由於卡姆蘭不得人心，手下嘅將領都投向胡馬雍，卡被迫逃亡。
但卡姆蘭亦都兩次成功奪回喀布爾，最後喺1552年佢喺第三次被驅逐後投靠蘇爾王朝，舍爾汗個仔伊斯拉姆將佢交咗俾胡馬雍。
到咗呢個時候胡依然堅守對父親嘅承諾，佢拒絕身邊人將細佬處死嘅建議(其實佢都算係幾好人
)，只係將佢整盲然後流放去聖城麥加，卡姆蘭幾年後死喺嗰度。
伊斯拉姆於 1554 年去世，佢個仔繼位幾日後亦都被刺殺，國家陷入混亂。
胡馬雍乘機召集咗一隊龐大嘅軍隊，喺1555年大敗蘇爾王朝，重奪印度控制權。
不過胡馬雍都算係有福無命享，佢喺第二年就因為喺圖書館仆親碌落樓梯跌死咗，享年47歲。由於佢同佢老豆都鍾意take嘢(胡馬雍食埋鴉片)，有可能佢係食大咗叉錯腳，亦有可能係鄭錦滿推佢落去。
。
。
。
