【歷史po】慘過寫印度

當泰姬陵起好，沙賈漢亦都垂垂老矣。喺泰姬陵竣工之後，沙賈漢又計劃喺河對面用黑色大理石起自己個墓，以同泰姬陵構成完美對稱。

但佢始終未能如願以償，1657年佢因為大病，將監國之位交俾大仔達拉·希科。此事迅速惹來其他王子嘅疑忌，佢哋對學者型嘅長兄表示不服(達拉著有《兩海匯合》一書，主張伊斯蘭同印度教和平融合)，二仔沙舒賈喺孟加拉自立為皇，三仔奧朗則布同四仔穆拉德亦都乘機作反。



當沙賈漢病好後就支持達拉·希科擊敗喺孟加拉稱帝嘅沙舒賈，但奧朗則布就同咗穆拉德結盟，加上奧朗則布征戰多年，手下亦有一批精兵。最終奧朗則布打敗父兄，喺1658年登上皇位。



奧朗以異教徒罪名，將主張伊斯蘭同印度教共融嘅大佬達拉處死。象徵住帝國由阿克巴大帝嘅自由主義，走向宗教保守主義傾向。

奧朗將佢阿哥個頭pack箱，仲特別交代要襯佢老豆食飯時交比佢。當沙賈漢滿心歡喜諗住拆禮物，結果一見到個頭嚇到暈咗。



而奧朗嘅盟友穆拉德亦唔好過，奧朗違背同佢平分天下嘅承諾，以謀殺罪名將佢處決。

老父沙賈漢餘生就被囚禁喺一間睇到泰姬陵嘅房間，由佢個大女照顧。相傳沙賈漢曾經口渴想喝水，奧朗就叫佢飲墨水。

沙賈漢於1666年去世，死後同佢老婆合葬於泰姬陵。

喺沙賈漢到奧朗則布嘅時代，印度佔有當時全世界GDP 四分一，超越清朝中國，成為當時最大嘅經濟體。

但係同時阿克巴留低嘅嘅曼達爾沙系統已經變到好似公務員咁累贅，大量得唔到實缺嘅督軍無所事事，佢哋為咗可以建功立業，於是就周時慫恿啲王子造反，成為咗帝國亂源。

而奧朗為咗養住佢哋，就要喺財政上開源節流。開源方面就係開拓領土，奧朗將矛頭指向德干同西南印度嘅幾個蘇丹國，同埋阿克巴嘅盟友拉傑普特人。

奧朗透過打仗將唔少封建領地改土歸流，增加咗國庫稅收，搶嚟嘅戰利品同埋土地暫時滿足咗督軍們嘅口胃。但係咁樣做亦有後遺症，原來被德干蘇丹壓下嘅馬拉塔小諸侯就此壯大起嚟，成為帝國嘅心腹大患。

另外奧朗亦都增加咗針對非穆斯林嘅人頭稅，所持嘅理由雖然係宗教性，但實際上同阿育王尊佛一樣有其政治現實性。阿克巴推行宗教自由政策因為佢需要統戰信印度教嘅拉傑普特人，而到咗奧朗則布時代則改為重用來自西亞嘅宗教學者，同埋波斯灣地區輸入嘅技術人員。

奧朗則布自己亦都以身作則，按照嚴格嘅穆斯林標準生活。相比起佢日日飲酒take嘢嘅祖先，佢好似個苦行僧咁，一日祈五次禱，按照御醫嘅餐單健康飲食同飲清水，令到宮殿開支大大減少。

奧朗則布喺登基後四處征戰，由北打到南。到咗1687年，帝國嘅版圖發展到西臨波斯，東至孟加拉，北達克什米爾。建立起現代印度國家嘅雛型。



奧朗任內鼓勵信奉印度教嘅高官改信穆斯林，但帝國中嘅穆斯林亦都唔係鐵板一塊，佢哋分為伊朗派、突厥派同本土派(改信穆斯林嘅印度人)。三派中突厥派係傳統督軍派勢力，即由巴布爾傳落嚟，來自中亞嗰班人。伊朗派近似元朝嘅色目人，佢哋有比印度先進嘅技術，因而受到重用。而本土穆斯林就好似漢人一樣，對比其他兩派最為弱勢，因此就專出奸佞小人、投機者，以曲意奉承君王見稱。

三派嘅黨爭喺奧朗執政時期越趨激烈，伊朗派以虔誠穆斯林自居，攻擊突厥派嘅貴族生活糜爛，而奧朗亦因為想打壓突厥派，亦都走原教旨主義路線，自己都要過埋啲苦日子。



奧朗則布帝國官僚就以以上三派組成，中央集權嘅官僚帝國派佢哋去印度各地去做流官，取代原來嘅封建領主。由於官僚做幾年就會調任，所以一般去到地方都係刮得就刮，對於地方冇乜責任心。因此過去封建領主能夠鎮壓得住嘅動亂，到官僚體制時就再㩒唔住。

奧朗鎮壓諸德干蘇丹國嘅結果，就係令馬拉塔聯盟坐大，就好似大樹被斬灌木吸收陽光茁壯成長。馬拉塔聯盟係各路土司、叛將、江湖豪傑嘅結合體。領袖們大多出身寒微，但就好似希臘人同羅馬人咁自發地建立起聯邦體制。

1674年，馬拉塔貴族希瓦吉喺拉加齊爾自立為王，馬拉塔帝國建立。

馬拉塔人原本係指講馬拉地語嘅人，喺17世紀專指為德干蘇丹當兵嘅人，佢哋慢慢形成一個新種姓。

希瓦吉出身於今日嘅馬哈拉施特拉邦，父親就係為比賈普爾蘇丹打工。佢擅長打山地遊擊戰，利用山區複雜地形同蒙兀兒帝國軍周旋，寫下好多傳奇事跡。

1670年佢為咗奪取德干高原上嘅要塞辛哈加德，於是用繩綁住一隻經過訓練嘅巨蜥，然後派佢爬上去懸崖峭壁，再叫個細路沿繩爬上去固定，然後士兵們進行奇襲，成功奪取辛哈加德。



而為咗同英葡兩國貿易，希瓦吉亦組建咗印度首支海軍。隨著西瓦吉嘅崛起，奧帝喺1660年就開始派兵想剿滅佢，但一直未能成功。

1674年，佢喺拉加齊爾舉行加冕儀式，成為馬拉塔國王。佢推行阿克巴大帝嘅宗教自由政策，令好多穆斯林都為佢效力。



奧朗則布為咗征服佢，喺1681年離開首都，從此再冇翻過去。

奧朗對馬拉塔人進行咗長達廿幾年嘅戰爭，蒙兀兒軍長期喺乾旱嘅沙漠同馬拉塔人打游擊戰，得唔到任何戰果。即使喺奧朗處死咗希瓦吉嘅繼承者桑布，馬拉塔人依舊繼續抗爭。

奧朗雖然自身勤政節儉，但係因為佢四出打仗而大大消耗國庫，事實上比佢生活糜爛同大興土木嘅父祖用嘅錢仲多。

而奧朗因長期留在南部，導致咗帝國北部政治腐敗，部分人開始擁兵自立，大貴族亦都紛紛鞏固自己嘅地位，離心離德。

留名等睇東印度公司

後世皆認為奧朗放棄阿大帝嘅宗教寬容政策，走原教旨主義係帝國衰落嘅主因。事實上佢失敗主要因為中央集權機械無可能長時間運行，阿大帝時代蒙兀兒人(只包括蒙兀兒貴族、督軍，一般平民算唔上係)仲能夠鎮壓得住，到奧朗時代就攪唔掂。

奧朗晚年奔波於錫克教徒(奧朗殺咗9代目教主)、拉傑普特人同馬拉塔人嘅武裝反抗。生活健康嘅佢一直活到88歲，喺從德干撤退回首都途中病死。死後照佢意思簡樸地葬喺一個細墓穴。



奧朗則布死後嘅蒙兀兒帝國被史家認為係衰敗期，佢3個仔為爭奪王位而內戰，最終由3仔巴哈杜爾·沙一世勝出。巴一世繼位時已經63歲，佢在位5年一直都陷入同馬拉塔人、錫克教徒、拉其普特人嘅戰爭中，其中以錫克教徒威脅最大。



巴一世死後兩個仔又為爭位內閧，最後長子賈汗達爾·沙得到貴族支持，殺弟繼位。

賈汗只係做咗一年都唔夠，貴族就支持佢個侄法魯克錫亞將佢推翻，無幾耐仲殺埋佢。



法魯克錫亞由賽義德兄弟推上台，佢哋係當時帝國當時中最有實力嘅將領，佢哋自稱係先知穆罕默德嘅後代，但一般相信佢哋來自旁遮普。法魯克錫亞任命賽義德兄弟為宰相，自始成為咗佢哋嘅傀儡。



1718年，不甘被擺佈嘅法魯克喺德里聚集咗7萬大軍，但係不敵賽氏兄弟。皇帝被廢黜同監禁，最後被整盲之後再勒死。

印度人好似好鍾意整盲政敵

賽義德兄弟從此成為蒙兀兒帝國嘅眞正話事人，以造王者嘅身份廢立君王。賽氏兄弟擁立法魯克錫亞堂兄弟拉菲·烏德·達拉加特為傀儡皇帝。

佢堂叔尼庫斯亞爾喺阿格拉被另外一派軍閥擁立為皇帝，賽氏兄弟戰勝，並將阿格拉洗劫一空，連泰姬陵都遭到佢哋盜墓，得到大量財富。

拉菲好快病死咗，由兄弟沙賈汗二世繼位，但沙二世好快又病死咗，賽氏兄弟擁立先王堂兄弟穆罕默德·沙。



穆罕默德·沙喺得到海得拉巴國王阿薩夫·賈赫一世嘅幫助，穆沙將賽氏兄弟毒殺，並委任阿薩夫·賈赫一世為相。

穆沙希望重振蒙兀兒帝國聲威，喺1725年借海得拉巴之力與馬拉塔帝國開戰，但係蒙軍接連被馬軍打敗，馬軍更喺38年攻入首都德里，皇帝穆沙被迫求和，除咗割地同賠錢，更加給予馬拉塔佩什瓦(首相)巴吉拉奧一世摩臘婆總督之職。

之後到1739，首都德里又遭到波斯阿夫沙爾王朝洗劫，屠殺咗兩萬人，連沙賈漢打造嘅孔雀寶座都俾佢哋搶埋。




波斯軍事天才納迪爾沙喺廢黜前朝薩法維建立阿夫沙爾王朝後，為咗得到蒙兀兒嘅財富而進軍印度，衰弱嘅蒙兀兒當然不敵，波斯人更加佔領咗印度西北不少領土。

此戰後帝國威望一落千丈，馬拉塔人乘機奪去中部不少領土，而東部省份孟加拉喺1740年代就開始實質獨立，拒絕再向中央上貢。

孟加拉嘅背叛對帝國係一個致命打擊，富裕嘅孟加拉雖然地方唔算大，但就如同江南一樣係帝國嘅奶牛，當孟加拉嘅賦稅仲可以運去首都，搖搖欲墜嘅朝廷先可以勉強維持落去。從此蒙兀兒勢力範圍只淨低首都一帶，而且窮途潦倒。



波斯嘅納迪爾沙於1747年遇刺，阿富汗嘅艾哈邁德沙·杜蘭尼乘機獨立。佢建立咗杜蘭尼王朝。翌年佢渡過印度河，攻占咗拉合爾。

蒙兀兒首相阿薩夫·賈赫一世率軍迎戰，雖然擊退咗阿富汗人，但自己亦因為年老多病去世。一向依賴佢嘅穆罕默德·沙因為受到驚嚇，無幾耐亦都病死咗。

Lm

薩法維帝國1736年收皮
蒙兀兒去到1750年得返德里附近土地
得返Ottoman 仲係大國可以同歐洲鬥

18世紀嘅ottoman都已經末落緊，17世紀末最後一次遠征維也納失敗之後已經唔再係歐洲國家嘅威脅

此後蒙兀兒就一直處於風雨飄搖之中，穆罕默德·沙死後由兒子艾哈邁德繼位，佢後嚟俾阿薩夫·賈赫一世個soon費羅茲·姜格三世廢黜，艾哈同母后被整盲同囚禁。

費羅茲擁立艾哈堂叔，第八任皇帝賈汗達爾·沙之子阿拉姆吉爾二世繼位，並由費羅茲做宰相。

為咗進一步壓制王室，費羅茲喺1757年串通馬拉塔人圍攻德里，從此挾天子以令諸侯。阿二世長子沙·阿拉姆不甘見父王受辱，喺59年出逃投靠阿富汗人(佢同杜蘭尼王朝有聯姻關係)，費羅茲為咗斬草除根，將前皇帝阿二世同一啲皇族殺死。改立奧朗則布曾孫沙·賈汗三世登基。

1761年，阿富汗人打住勤王旗號同馬拉塔人喺德里附近嘅帕尼帕特打咗場仗，結果阿富汗人獲勝，阿軍喺扶植沙·阿拉姆二世為皇帝后回師坎大哈。



自此蒙兀兒皇帝就由馬拉塔人嘅傀儡變做阿富汗人嘅兒皇帝，而印度次大陸亦淪為各路諸侯嘅修羅場：錫克教勢力以旁遮普為中心，覆蓋印度西北；拉傑普特人嘅小王公由西北延伸到東方；富饒嘅東方由蒙兀兒留低嘅藩鎮統治，佢哋有錢但係唔打得，經常被錫克、阿富汗、馬拉塔吊住嚟打，總係要靠進貢了事；而南方就係馬拉塔聯盟嘅天下，但佢哋就算唔係同外人打仗，自己都經常爆發內戰。




各路諸侯為咗打贏對手，爭相喺歐洲人手上買入先進武器，並引進歐洲軍事顧問。而戰亂亦令大量平民相繼走難去歐洲人控制地區，導致原先喺歷史邊緣嘅葡萄牙、荷蘭、英國同法國商館勢力，急促澎脹起嚟。

lm

後來因為好多反婆羅門教嘅不同教派喺印度東部興起，首陀羅地位得以提升，而代替佢哋塾底嘅人則被稱為達利特。

達利特即不可接觸嘅賤民，佢哋從事同死亡、排泄物、血污有關嘅工作，包括:屠宰師、夜香師、清潔師、鞋匠師、殯儀師同理髮師。





…

真白卡

歐洲人當初為咗打破穆斯林對環印度洋貿易線嘅壟斷，進行咗航海革命，葡萄牙人達伽馬喺1498年經非洲好望角到達印度，開展咗歐洲人對印度次大陸嘅征服之旅。

葡國人喺1530年嚟到孟加拉灣，佢哋喺吉大港同薩德岡率先設立據點。隨後荷蘭人、英國人、法國人甚至丹麥人都喺印度設立商館，佢哋之間鬥爭不斷，但係因為蒙兀兒帝國崩潰出現權力眞空，勢力被動地擴張起嚟。



歐洲人嘅商館有啲喺荒地開發，例如今日孟加拉嘅首都達卡。有啲本來係有主之地，由歐洲人透過契約形式向土王公租用，就好似伊斯蘭政權容許基督徒同猶太人自我管理一樣。



歐洲人以貿本主義角度去經營佢哋嘅印度殖民點，佢哋講究成本效益，唔似穆斯林同印度教王公咁要霸佔好多領土，為咗降低管治嘅行政成本，佢哋寧願交由本地王公去做代理人。好似威廉堡(今日嘅加爾各答)同喬治堡(今日嘅清奈)就只有幾百人嘅護衛隊，依靠先進嘅歐洲武器，守衛港口附近嘅方寸之地。



英國人最終喺競爭中戰勝其他對手，例如孟買同今日孟加拉嘅達卡本嚟都係葡國人開發出嚟，後都交咗比英國人。佢哋喺蒙兀兒皇帝手上得到特許狀，成為最大嘅歐洲人勢力。

英國東印度公司為一個股份公司，佢因為喺1600年獲得伊利沙伯一世授予印度貿易特許狀，因而組成。英東公司喺經過幾次股份架構重組，最終喺查理二世時代被授予新嘅特許狀，批准佢對非基督教國家擁有外交同軍事權利。

英東公司就此得到準國家嘅地位，雖然喺面對歐洲王室仲要稱臣，但就可以同印度嘅王公平起平坐。

英東公司首個據點位於印度西岸港口蘇拉特，到1640年因為葡國公主同英王查理二世結婚，孟買亦都作為嫁妝比咗英國，到1668年由英東公司承租。1687年英東公司將總部從蘇拉特搬到孟買。1690年，公司開發加爾各答。

隨住印度陷入軍閥混戰，各地難民爭相湧入英租界，因為所有軍閥都畏懼洋人船堅炮利，對洋人嘅保護地一般都兜路行。



大量人口湧入造就咗殖民地嘅異常繁榮，經濟發達又再吸引更多印度本地人移入，慢慢租界入面印度人仲多過歐洲人。歐洲人根據經濟原則認為你班難民走入嚟要我哋保護，好應該交番多少陀地費，呢種稅收制度就係印度殖民地嘅基礎。

除咗要納稅之外，印度人喺租界打工亦都要好似外勞咁攞勞動執照。由於佢哋係難民，亦都冇政治權利，連二等公民都不如。



英東公司主要貿易嘅貨品係棉花、絲綢、靛青、硝石同茶葉。當佢嘅生意喺印度越做越大，同印度土邦嘅財務糾紛就越來多，當印度軍閥冇錢還，英東公司就開始派一啲武裝收數佬進駐，慢慢變成好多土邦嘅太上皇。

live

終於live 到講東印度公司

見到第一句就知要留名

英國東印度公司嘅財政官透過進駐各個土邦，好似公司醫生咁幫佢哋執返靚盤數。對於冇錢還嘅土邦佢哋唯有以股代債，英東公司嘅勢力範圍越嚟越大。

英東公司嘅職員眼見打份牛工都冇幾多錢，而印度土邦王統治大量順民又唔打得，都起咗彼可取而代也之心。佢哋為自己嘅私利，假公濟私咁以公司名義攞咗好多未受認可嘅保護地。

因為人都係愛墮落嘅，英東職員好多抵受唔住誘惑，違背基督徒一夫一妻嘅原則，娶咗大量印度或者波斯嘅女子，過住三妻四妾嘅幸福生活。佢哋利用英印兩地嘅技術落差從中取利作威作福，享受曬兩邊嘅好處。佢哋亦都慢慢咁東方化，成為咗一新種姓英印人。



當英國總公司得知英印人嘅違規行為，不禁搖頭嘆息。總公司訓斥佢哋叫佢哋專心搵錢唔好攪咁多嘢，並勒令歸還土地。

但係呢啲情況始終未能禁絕，英東嘅保護地依然以進三步退兩步嘅模式不斷擴大，威廉堡同喬治堡慢慢巨大化為帝都加爾各答同馬德拉斯(清奈)。



隨住英國人口植入嘅仲有英國嘅司法制度，本嚟英國人嘅法院只係為英國人服務，但一啲聰明嘅印度人見到英國法院較公平又唔用肉刑，紛紛走去搵英國人幫佢哋申冤。而英國司法系統起源就係王室用來開發財源嘅工具，對於有錢比訴訟費嘅人來者不拒，英國人同印度人就此建立起一個司法保護關係。

第三個亦英國影響力增強嘅原因係大量政治難民嘅移入，喺各地鬥爭中嘅失敗者紛紛湧入加爾各答等地，佢哋希望得到英國人撐腰收回失地。

而呢班政治難民嘅政敵亦都唔傻，知道托英國佬大腳有著數，亦都去英租界進行遊說工作。好快戰爭嘅兩方都變咗英國嘅被保護者，英國嘅仲裁權就變到同管轄權難以區分。



呢個現象並唔係設計而成，純粹係演化出嚟嘅結果。英東公司因為保護能力比蒙兀兒同各路軍閥都要強大，導致佢哋嘅臣民都投靠英國人，自然而然就形成咗一個非正式帝國。當呢個帝國發展到一定程度，就開始同印度當時嘅三大勢力發生衝突。

當時喺印度有力爭雄嘅有三大勢力：西北依然由錫克教打骰，西部有馬拉塔聯盟掌管，當中以瓜廖爾嘅辛迪亞家勢力最大，而南部則由邁索爾王國把持。

喺呢三大勢力中間，就有孟加拉、奧德、信德、比哈爾諸藩鎮，仲有已經風燭殘年嘅蒙兀兒皇帝，佢已經淪為逐食天子，喺各路節度使間流浪乞食。

錫克教因為喺德里以北，對南印度同沿海地區嘅爭霸唔太介入。但馬拉塔同邁索爾嘅鬥爭則牽動咗整個南印度，甚至將歐洲人牽涉其中。

各路軍閥為咗得勝，都紛紛攪洋務運動，爭相購買歐洲人嘅武器同埋聘請歐洲人做軍事顧問。土邦之間嘅鬥爭好快就演變成歐洲人嘅衝突，當中以英法兩國關係最為緊張。

1754年歐洲爆發咗七年戰爭，餘波亦都波及到印度，1757年因而爆發普拉西戰役。開戰導火線係孟加拉節度使西拉吉得到法國東印度公司撐腰後，藉口英國拒絕停止建築防禦工事，因而進攻加爾各答。由於加爾各答只有幾百名守軍(由百幾個英軍同各路歐洲民兵組成)，所以輕易就比西拉吉攻陷。

當英東公司知道加爾各答陷落，就派出克萊武上校率領一隊由英軍、歐洲人、印度人組成嘅3千人軍隊，而孟加拉就有萬五騎兵同三萬五步兵，仲有幾十台法國東印度公司送嘅大炮同40名法國炮手，睇落軍力十分懸殊。



但英東公司其實早已經收買孟軍將領，令到實際只有5千人作戰。戰事喺今日西孟加拉邦嘅普拉西發生，由於英國經過工業革命改良軍事技術，大炮比法國嘅射程遠；戰爭過程中曾經落大雨，法國炮手又無將大炮遮蓋，以致停雨之後唔用得，孟軍因而大敗。

戰爭只係進行咗一日，英軍喺戰爭中只有少量傷亡，戰敗嘅西拉吉被處死，由英東公司扶植傀儡節度使。

好耐冇見