馬其頓軍因為唔認得路,誤以為印度河係埃及尼羅河上游,所以佢哋沿住印度河前行,當去到海邊嘅時候先知道錯咗。於是只好沿住乾燥嘅莫克蘭海岸同波斯灣走落去,因為沿途環境十分惡劣,馬軍死傷嚴重。
當大軍終於到達巴比倫,亞大帝亦已經人心盡喪,失去將士嘅信任。不久之後佢就英年早逝暴斃,好可能係被佢嘅手下毒死。
亞大帝嘅稚子亦被人害死,佢嘅部將紛紛自立門戶,其中大將塞琉古就乘勢喺巴比倫建立國家,是為塞琉古帝國,首都喺今日伊拉克。
亞大帝嘅死亦令到印度西北地區出現咗權力眞空,當時西北係難尼同希臘人、波斯人紛爭之地,屬於三不管地帶。考利底耶兩師徒就喺嗰度揭竿而起,收攏叛軍。
但係佢哋嘅軍事行動初時並不順利,因為畢竟難尼軍人強馬壯。傳說有次旃一世喺戰敗後流落到一個村莊,見到兩母子喺度食飯,個仔用手抓飯嘅正中央結果辣親。於是個阿媽就話:衰仔!你應該食旁邊嗰啲先,冇咁熱丫嘛!
旃一世靈機一觸,覺悟到應該用農村包圍城市嘅策略。佢哋好可能得到喜馬偕爾(印北近西藏)山區居民嘅幫助,喺西北站穩陣腳,一步一步侵佔恆河平原。
掌握中亞技術輸入路線嘅旃一世好快就充分掌握呢個優勢,將自己嘅軍事技術換代更新。倉促撤退嘅希臘人留下嘅軍事資源就好似日本人留低嘅滿洲國一樣咁寶貴。雖然希臘人同印度人同屬雅利安人,但係因為希臘比起印度更加接近文明中心,所以軍事技術更為發達。
旃一世就靠希臘人留低嘅戰車技術,重新編組咗佢嘅戰象團隊,猶如林彪裝備新四軍。
旃一世就係咁靠呢個優勢將難陀王朝擊敗,當時嘅難尼帝國已經有如秦趙高當政時期,反覆嘅宮廷政變已經令到人人離心離德。約喺公元前321年,旃一世攻入華氏城建立孔雀王朝。
![](https://na.cx/i/8SgWinR.jpg)