終於睇咗季報,對比JD同巴巴6-9月季度業績,其實都幾出乎我意料之外
原來JD商貿收入大過巴巴 (6-9月總收入:2238億 vs 1712億。註:JD將零售同物流拆開兩大項,巴巴將物流計入商貿之下),但相關盈利只有巴巴三分一 (72億 vs 256億),即係JD係做薄利生意;
巴巴季度盈利對比上年同期由23.6%跌到15.0%,但其實JD都由3.81%跌到3.22%(註:JD係零售加物流得出條數),即係話經濟環境係差咗好多,所以高利潤嘅商貿傷過薄利商貿;
JD新業務連未分項損失共蝕46億,佔商貿(即零售加物流)賺嘅錢(72億) 64%,上年同期只有36%,即係越燒越勁;巴巴其他業務蝕106億,佔商貿盈利(256億) 41%,上年同期係56%,即係有啲cut loss,減少損失重點係數碼娛樂同未分類項目,而創新一項係蝕多咗,唔知係咪改變佈局專注多啲研發,唔再搞咁多媒體野,始終阿爺打壓
JD條數都唔係好(其實佢只係無大行預期咁差),反映巴巴差於預期可能反映咗大陸經濟而家嘅情況嚴峻過大家預期,其實巴巴解業績時都有類似解釋
要諗嘅係,JD仲係燒錢狀態,仲要而家商貿其實利錢細咗,佢本身做薄利多銷,燒錢發展其他業務風險其實唔細,而巴巴壟斷紅利似乎已經過去,但雲業務似乎就快可以轉盈,而且燒錢有所收斂,財政仍然健康,捱過大陸經濟下行風險應該不成問題,但無可否認就算對佢有信心呢幾年都要捱價,因為本身佢嘅生意同大陸經濟週期高度相關,而現在正值經濟低潮,加上之前嘅事端,被一沉百踩下,短期股價唔會靚絕對係合理,但咁亦都係價值投資值得留意嘅時刻
當然,搏唔搏係個人決定,本身單睇新聞講巴巴條數我都有啲驚,但攞咗季報比較埋JD我就定返,因為條數似主要受經濟週期影響,咁就值得留意多一段時間,睇佢營運抗壓可以有幾強。
話阿爺打壓巴巴,數字話比大家知其實全民皆傷,有能力唔死自然可以笑到最後,而我覺得巴巴似乎仲係身體健康過JD,個底夠厚而且營運上都穩健啲,time cost呢啲野,你每秒鐘都賺到錢就緊係唔好浪費時間討論價投啦