唔好做全職補習老師

Outliers

558 回覆

620 Like 38 Dislike

Outliers 2021-09-24 15:49:54

結論
如果你嫌太長唔想睇。結論就係除非你做到你嗰科最top嗰幾個補習老師或者搵到有錢客群，否則唔好做補習。
如果要做嘅話，都要懂得靈活變通。最後搵到錢嘅模式同你一開始嘅教學理念未必相同。

背景
首先講吓我自己背景先啦。我高中開始已經上網解答Econ問題。如果你同我差唔多年紀，又曾經上網討論過Econ，我都幾肯定你曾經見過我。我亦都算係Econ依一科最早開Facebook page嘅人。

曾經做過日校，亦都曾經做過連鎖補習社。最後轉行出去打工，只係放工後、星期六日為興趣做私補。DSE、IB、IAL、asso、大學我都補過，自問算了解依個行業。不過而家已經完全脫離無再做啦。因為太無聊，所以想講返我對補習行業嘅觀察。角度會偏向高中補習市場。

點解做補習？
我自己都認識唔少補習行家。根據我嘅觀察，想全職做補習不外乎三個原因：
1. 覺得賺得多錢
2. 覺得自己擅長依一科
3. 讀乞食科唔知做咩好

首先講吓第一點。好多人讀大學嗰陣都會做私補，勤力嘅話每個月賺1萬以上唔係難事。再努力啲甚至可以每個月賺2-3萬。依筆錢對普通大學生嚟講唔算少。加上2000年代補習風氣盛行，唔少人對補習老師嘅印象就係「天王」、「年薪過千萬」。

不過如果為錢嘅話，補習唔係一個好嘅選擇。首先月薪2-3萬對fresh grad嚟講係唔錯，但係長遠嚟講係雞肋。其次補習天王嘅年代已經過去，而家已經無2000年代咁好賺。下面會詳細講原因。

Outliers 2021-09-24 15:51:43

考生人數下降
影響補習老師收入嘅因素主要有
1. 學生人數
2. 學費

首先講吓學生人數。近十年大型連鎖補習社嘅規模縮細咗好多，最主要嘅原因係考生人數下降。

以前淨係CE已經超過10萬考生，AL有大約3-4萬考生。而家DSE考生人數由8萬下降至約5萬，但係大學學位反而多咗。以前AL難度極高，絕大部分學生都會去補習，而家DSE太淺，學生補習嘅比例自然低咗。再加上出生率下降、移民潮同埋更多人轉考IB，DSE補習市場不斷收縮係必然嘅事。就算你做初中、小學，都同樣會面臨學生人數減少嘅問題。

2012年有21,904人考Econ，2021年只係得12,307人考Econ。如果你規模細，只係得十幾廿個學生，未必會感受到以上嘅轉變。但如果你嘅規模大啲，例如100個學生以上，考生人數下降嘅影響就會比較明顯。如果你係教多人報讀嘅科目（例如英文科）會好啲，如果你教嗰科少人讀，咁就會辛苦啲。

學費
講完考生人數，跟住就講吓學費。
私補嚟講，學費取決於你啲學生嘅階層多過你嘅經驗。

如果你主要做屋村客，就算你有10年經驗都未必收到$400/h，屋村師奶負擔唔起寧願求其搵一個大學生嚟補。就算你講到自己實力有幾勁，佢地都未必會明白，提價能力有限。
如果你搵到有錢嘅國際學校、直資名校客群，就算你年資尚淺一樣可以收到$800/h以上。

因此一開始嘅定位某程度上已經決定咗嘅收入。

唔少新入行嘅補習老師都係抱住祟高嘅教學理念，唔希望淨係收有錢學生，而係想有教無類。
但係日子耐咗又面對金錢壓力嘅時候，又係咪仲堅持到呢？

如果你開補習社，學費需要劃一，唔可以按照學生家境收取唔同嘅費用。因此你間補習社嘅地理位置都會影響可以收嘅學費。
太子、油麻地、灣仔屬於補習社嘅兵家必爭之地，有消費力強嘅名校客群，亦都可以收到唔同地區嘅學生。如果開喺屋村入面，咁學費當然唔可以脫離當地客群。

十把刀 2021-09-24 15:52:09

Lm
估唔到你都會完全退出呢行

溯源 2021-09-24 15:52:21

做個學生嘅ptbf仲好賺

Outliers 2021-09-24 15:52:36

平庸嘅日校老師搵錢都多過二線補習老師
戴頭盔先，做日校都好辛苦，要處理好多行政工作，人事關係又複雜，遲早又要宣誓又要做國安教育。唔係人人接受到做日校老師。依度撇除依啲因素，純粹以一個金錢至上，唔介意以上因素嘅人嚟討論。如果你接受唔到做日校老師，咁你可以skip咗依段唔好睇。
如果你係某科目一線嘅補習老師或者你開補習社請人返嚟教，你人工當然有可能高過日校老師。但如果你唔係一線補習老師，長遠嚟講人工好容易跑輸一個平庸嘅日校老師。

而家入行做日校老師容易咗好多，日校老師嘅起薪點超過3萬，人工會隨住年資而上升，又多假期又有福利。無招生壓力，教得差又唔會扣人工。
而且隨住你年紀增長，吸客嘅能力都會下降。到你變成一個地中海大叔嗰陣，喺日校已經嘆緊高人工，但係做補習嘅話啲學生見到已經唔想聽你講嘢啦。

我知道有好多以前喺遵理、現代、英皇教過嘅老師而家都去咗日校教書，甚至有人近年先讀PGDE。行行出狀元，如果你就係狀元，咁當然無問題啦。但如果你做唔到狀元，咁就算你好叻好勤力，收入都很可能比唔上另一行平庸嘅人。

補習轉行困難
做補習係好難轉行，就算想轉做日校老師都唔容易。
如果你曾經喺大型連鎖補習社做過，返日校教書應該都唔會太困難。
但係私補或者屋村補習社嘅經驗日校一般係唔承認。
如果你目標係做日校老師，應該一畢業就報PGDE、報日校老師或者TA。做私補或者屋村補習社只會令你距離日校老師越嚟越遠。

如果你一畢業做其他行業，你任何時候都可以辭職做補習。
但你一畢業就做補習，時間耐咗就好難轉做其他職業。

Outliers 2021-09-24 15:52:48

補習等於創業
2021年香港人入息中位數係$18,000。對一個fresh grad嚟講靠補習月入2-3萬好似唔錯，但係長遠嚟講係雞肋。
首先全職私補連入息證明都無，你想申請信用卡、借按揭買樓都會受影響。
喺私人公司打工，就算你hea做間公司都要出糧俾你。就算間公司蝕錢破產，大不了咪搵過另一份工。
但係全職私補或者開補習社等於創業，無時無刻都要擔心收生，想hea吓又驚流失學生，手停口停，無假期無福利，面對嘅壓力唔會細過返工。

講完金錢因素，跟住講吓第二個做補習嘅原因，有唔少人想做補習係因為自己擅長自己讀嗰科。我相當理解，因為我一開始都係咁。

入行門檻低
DSE嘅難度比AL低好多，有實力嘅老師好難differentiate from其他老師。以我比較熟悉嘅Econ嚟講，拎5**大約需要91%嘅分數。求其一個5**學生去教，都教到7成以上嘅題目。求其一個有幾年經驗嘅補習老師都教到8-9成嘅題目。就算你係依個科目嘅權威，有幾多題目只有補你先答得啱？依個世界唔係人人都aim 5**，對於aim level 4嘅考生嚟講，可能求其一個5**學生去教就得。

近10年社交媒體嘅興起亦都令補習老師嘅入行門檻低咗。以前補習老師需要喺報紙、巴士、地鐵落廣告先多人認識。而家求其一個大學生開ig，整幾張圖、自製幾段Whatsapp對話讚自己已經可以爭飯食。依個亦都係大型連鎖補習社嘅規模縮細咗嘅原因之一。

Outliers 2021-09-24 15:52:59

你做其他嘢一樣會做得好好
好耐之前喺Netflix睇咗一套紀錄片，講有啲印度家庭好重視教育，移民去美國之後努力訓練子女英語串字能力，結果喺美國著名嘅串字比賽Spelling bee取得全國冠軍。
取得冠軍嘅小朋友以Spelling bee教練作為職業，訓練更多印度小朋友參加串字比賽......
睇完之後我有啲感慨。本身我以為得到冠軍嘅小朋友會喺其他領域取得成就。估唔到都係做返Spelling bee教練。

你擅長自己讀嗰科，只係因為你讀書時期擺咗好多時間落去。唔代表你天生就係要做補習。
如果你花時間喺其他領域，一樣可以做得好好。

開補習社得唔得？
唔少外行人覺得做私補儲到一班客就可以開補習社，跟住就可以穩定地有高收入啦。
其實私補同開補習社好唔同。私補嘅學生唔一定帶到落補習社，招生模式亦有所不同，更加唔洗講租金壓力。

如果你自己開補習社，咁你未必會一個星期補足7日。空咗出嚟嘅timeslot可以搵其他導師合作或者租場。
不過正如上面所講，社交媒體興起之後，導師已經唔需要靠補習社獲得知名度。
有實力嘅導師開個ig自己搞就得，唔需要靠補習社。租場業務會有得做，但係以往連鎖補習社嗰種模式就已經式微。

Outliers 2021-09-24 15:53:11

補習真係無得做？
上面講完DSE補習、大型連鎖補習社無得做。咁有冇其他方向可以發展呢？
補IB有得做嘅，家長消費力都幾強。不過依啲家長多數鍾意單對單嘅私人補習，接受唔到一班幾十人嘅教學模式。
補asso/大學生就唔太可行，因為學生付費意願好弱，多數只係臨考試嗰一星期搵你補幾堂。各個courses之間內容差異又大，吃力不討好。

喺屋村開補習社，請一堆廉價part time提供類似托兒嘅功課輔導服務都會有得做。不過我自己唔太熟悉依方面。
而家大陸禁止補習，喺上水、天水圍、屯門開拓大陸人市場或者會有得做。
不過你上堂要講普通話，仲要自我審查唔好講政治嘢，否則學生家長報國安拉你都唔出奇。

補習中介無得做，去中介化係大勢所趨。咁多年嚟唔同嘅模式亦都有人試過，但係都談唔上十分成功。

要以私補作為職業，就一定要建立固定客源。例如我聽講DGS嘅學生多數都會搵同一個老師補英文。
如果某間學校每一屆嘅學生都係補你，咁就唔需要每年擔心收生問題。我見幾個企得穩嘅行家有唔少學生嚟自同一間學校。
不過依種客源都唔係必然維持到，可能過十年八載啲學生突然轉補另一位導師都唔出奇。

至於網上視像補習，我覺得對私補老師係好事，唔需要再走嚟走去。
但係隔住個mon教學會更加困難，留住客戶嘅能力會低咗。

網上賣片我覺得可行，亦都有唔少人做緊，但係最大困難始終係考生人數下降。

結論
以前風光嘅補習天王已經唔存在。
補習依一個行業雖然唔會消失，但係搵食會艱難咗。

如果你係依個行業嘅狀元。環境改變之下你嘅收入很可能會少咗，但仍然豐厚。
如果你靈活探索唔同嘅經營模式，亦都可以有唔錯嘅收入。

如果你未入行，希望你諗清楚先決定入唔入行。希望依篇文幫到你。
如果你覺得自己讀乞食科唔知做咩好，做其他職業會輕鬆過做補習。
如果你睇完之後仍然決定入行，要尋找自己嘅特色同定位，咁你先會喺依一行企得穩。中間摸索嘅階段唔容易捱。
希望你會捱得過。

愛港之聲 2021-09-24 15:57:37