我去到水晶教堂的門前,看著從水晶玻璃透回來的夕陽,我想起了在迪士尼的那一日。
我看了手中的盒子,黑色絨毛的盒子,這是憶洛最後都想要給我的東西。
我輕輕地打開了,是一隻黑色水晶水滴耳環。我好像沒有看過憶洛戴這一雙耳環,也許,這是她買來準備在甚麼盛宴上配戴吧。
也許,我知道為甚麼憶洛會把這東西寄到這個地方了吧。這雙耳環,就像是這個教堂的縮影。憶洛,你也想和我結婚吧。
我打開了憶洛的信,她最後的信。
「萃臨:
呢到好靚呀呵?我一直都好想嚟呢到睇下,或者,我依家可以用你隻眼望到呢個靚景。
你一定好想知點解我會送呢隻耳環畀你。呢對耳環,係我同你去完迪士尼之後買嘅,我諗住可以係謝師宴戴。但係……之後我諗,或者有一日,我可以戴住呢對耳環,同你嚟到呢到。
依家,我將呢一隻耳環送畀你,至於另一隻,我會自己留住。
萃臨,你睇到呢封信,我希望你真係原諒咗我。我希望你可以放低我,真正咁開始過新嘅生活。台灣或者未必係一個好好啲地方,但你係台灣人又好,香港人又好,我想你可以開開心心咁生活落去。
你記唔記得你應承過我,我死咗之後十年先可以搵第二個女人。依家,我想解除呢個承諾。萃臨,我陪唔到你,但你係一個值得被愛嘅人,你嘅溫柔,你嘅傻勁,你嘅一切一切,都係好值得被愛。
萃臨,搵個愛你嘅人,幸幸福福,平平安安咁過,呢個係我最後嘅願望。
講樣野你知呀,我前幾日發咗個夢。
我夢到我係天堂,但上帝話唔畀我上天堂住,要我幫佢聽啲靈魂講野,講佢哋自己嘅人生。
然後,唔知幾耐之後,有一個老公公嚟到。
佢同我講,佢嘅人生好幸運,佢遇到個佢愛嘅女人,雖然,佢哋兩個無一齊行到最後。之後,係佢最低迷嘅時候,佢遇上咗一個最愛佢嘅女人。
佢話,佢哋兩個都係我最重要嘅人。
好白癡嘅一個夢呀呵,我都覺得自己好傻。
萃臨,我可唔可以要求多一樣嘢?你寫返封信畀我,然後,連埋呢封信,一齊燒咗佢。
萃臨,今次真係最後一次,我愛你。
愛你的憶洛。」
我坐在教堂的椅子上,看著那尚有十五分鐘的夕陽,眼淚早已變成那耳環的模樣,一滴一滴地如這教堂一樣,落在這六呎荒土之下。
良久,我回到車上。
「點呀?」Miss Yung問。
「憶洛想我寫返封信畀佢。」我說。
「你寫咗?」
「未。」我仍未想到有甚麼要對憶洛說。「佢叫我燒埋呢封信。」
Miss Yung沒有回話,只是靜靜地拍了拍我的肩膀。
「我寫完再返嚟,你等多陣。」我說。
「慢慢。」她很溫柔。
我回到教堂,天也已黑了,發著亮光的教堂更顯出眾。
我沉思良久,方徐徐下筆。
「憶洛:
我嚟咗啦,對唔住,要你等咁耐。
憶洛,對唔住,我唔係唔原諒你,只係,我原諒唔到我自己。
咁多年嚟,我無一日唔諗起你,我每一日都想你係我身邊。憶洛,我有好多好多野想同你講。
我想同你講,我係台灣識到好好嘅朋友,張澤凱同Yumi,係我係台灣最落魄嘅時候,係佢哋陪住我,係佢哋帶我一步步過返正常嘅生活。
我又想同你講,我搵到工,我終於變成一隻返工狗,係一份係酒店嘅工,工作量同人工雖然都唔算高,但,我過得幾好,每日見到嚟自唔同地方嘅人,感覺就好似去咗全世界咁。
我想同你講,我養咗隻貓,係一隻係山邊發現咗流浪貓。當時佢重好細隻,依家已經變到好大隻。佢好似有啲似你,一開始好Cool,好惡,但之後,佢都好似你,好黐我。
我想同你講,我失眠,我嚟到台灣之後,一直一直都失眠,每一晚都瞓得唔好,就算瞓得著,都只係瞓得一兩個鐘。
我想同你講,我識咗個女仔,佢叫杜予曦。佢係一個好好嘅女仔,佢細過我,但有啲時候,佢都幾成熟。我好似鍾意佢,唔知點解,佢係我身邊嘅時候,我好似都會瞓得好。係佢身邊,我好似可以返到之前可以鍾意人嘅時候。
我係台灣嘅時候,總係一種不自在嘅感覺,我覺得呢到好似唔係屋企咁,可能係身邊嘅朋友都無晒,可能係因為我同台灣人好似總係有啲唔同。我唔知呢到係咪我的歸宿,我唔知可以同咩人講,我都唔知係邊到可以搵到答案。
但係,我最近好似可以慢慢咁走出嚟,我好似開始搵到自己。
憶洛,或者,我呢世人都唔會可以忘記你。你係我心目中,永遠都有一個位置,一個無人可以取代嘅位置。
我應承你,我會開始過新生活,或者,我可以再一次去愛人。
或者,有一日,我哋會再見。
憶洛,今日係你生日,生日快樂。
愛你的萃臨。」
差不多九百日了 還是這樣懷念
説過在那一邊見 來待我出現
你繼續沿途歷險
我繼續尋求幸福了
那日見
C AllStar——留下來的人
https://www.youtube.com/watch?v=-a02RxrYF24