仲有無人玩他媽哥池？

入手Sanrio！用孖仔即刻破到1000

有冇人用過my meets ?
會唔會有bug影響架？

邊度可以買sanrio！幾錢

我Carousell 買的！二手機要食炒價930

thanks! 少貴

係不過童年回憶是值得的

主角-黑白機到了
好期待

想問買左飾物喺邊禁帶架

menu個箱
但係要成年先帶到

Thx

Sanrio meets? 邊度仲有得買？

旋轉拍賣有，不過炒價都好貴

想問吓會唔會有tg group可以交流吓

自己一個玩手指好耐

唔知點解meet連唔到手機
有冇人可以解答

手提有無開藍牙
如果咩都開晒就試多幾次啦

好似另一個post有人講過
夾公仔嗰批機connect app係難啲
（唔知你係唔係，至少我係）

後尾睇Reddit
啲人教貼住手機背後鏡頭下方
一路移動直到條bar出現就停

跟咗佢做之後
Connect app/ return to tama就好快
但結婚同送禮物就10次中1次咁
睇手機Bluetooth status係有TMGC個名
應該真係批機有啲問題

如果有人知更好嘅方法，請教教我

同埋！！一定要開wifi+location service
都係睇人分享學返嚟

如果黑白+主打養成有邊個型號推介?

黑白機除左日版果埋輔助機以外，
全部都係育成架
基本上睇下你鐘意咩人物咋
因為每版既人物都唔太一樣

v1-v3 比較簡單 所以應該好快悶
你可以由v4開始睇

v4 v4.5評價都唔錯 （有分日/歐/美/港版）
另外日版仲有藍屏紅屏之分
紅屏唔係個個鐘意，因為睇耐眼會唔舒服

v5 v5.5就玩家族既，一養就一次一家三口養三隻咁
5.5貴5好多好多，多左個王子公主

v6 ms價位都幾高 玩樂團既

friends dream 呢隻我無 所以無評語
friends dream town 還可，小遊戲比較多
tamagotchi go 要有買埋成套芯片先係好玩既遊戲

元祖機都仲有分好多，天使惡魔海洋森林機
不過玩起上黎都好難，因為好易死
惡魔機價錢都偏高，天使機日版好平 美版好貴

想一部到位就買v6 評價算係最高既一部黑白機
想平平地試下就買日4 （歐美港版都偏貴）
如果想買全新v6就要起碼兩千蚊 睇花色 最貴上到7千
v4 v4.5全新機會平v6少少 都係睇花色
全新日4可能800內會搵到既

其實買舊tamagotchi機睇價錢就知邊個系列好玩
好玩 花色又靚既 價錢都突破天際

嘩超詳盡，唔該哂真係比想像中貴好多
再問多少少，我睇post話彩機嘅育成成份唔高，主打玩溝種，係咪全部都係定meets mix smart呢啲？

上面果d價錢係我見過姐，唔代表成交價
不過最貴果部應該係柯南id機，炒到上兩萬
但唔代表佢好玩，只係貴在限量同當初要抽選先會有

彩機除左mix meets 以外都係育成
只有mix meets玩遺傳
meets另外又再有分美版on同韓版some
基本內容一樣但外觀花色又唔同（當然內置語言都唔同）

育成彩機每部都各有特點
所以又係睇下你偏好邊種風格同人物..
每部機都有鐘意佢既玩家
4u同ps比較多人鐘意，因為配搭資源機會多好多野玩

彩六 主打可愛粗線條公仔
id 可以玩照相館
idl 可以配搭小鎮機玩拍電影（但小鎮機好肝，非常肝）
ps 配搭各類芯片玩變身 （大部分芯片已破解）
4u 多左好多玩家創作人物供下載黎養成（e.g 角落生物/小新/玉桂狗）
pix 畫面算流暢 但食電
smart touch mon成日比人話好難用 而且玩點比較少

暫時黎睇愈新愈唔好玩
smart好多人都玩一陣就唔玩 寧願玩返舊機

就咁睇好似4U適合啲，一係等多排啲人平放smart買二手試下
同埋我見carousell開始有人放預訂4月先有貨，嗰啲又係新型號黎架？

四月新型號？我唔太知道你講緊邊隻
如果係nano的話我無注意因爲係個別動漫fans向

tamagotchi正傳黎講最新暫時係smart（日本）同pix（歐美）啦

smart keep住出緊新既擴充卡
唔記得黎緊三月定四月會再出兩張
岩岩12月出左兩張新卡（橙黃色同粉紅色）
11月時又有兩張（粉藍色同紅色）
11月限定女團款手錶又有跟一張女團卡
8月抽選白錶果時有跟一張限定卡
所以截至依家為止出左六張擴充卡
每張卡各有唔同人物可以養成 亦有唔同食物同玩具
不過每張卡有限制只可以認三部主機
（當然亦比人破解左了）

想問Smart係咪無得好似meets咁連app交配？