第三章
即使Quinlan Vos唔係喺陵廟出世,但係呢度喺佢由細到大生活嘅地方。佢跑過每一條走廊,穿過每一條柱;喺圖書館入面瞓過晏覺、喺冥想堂入面學識寧靜;喺應唔應該比試嘅地方撩交打、做架兩,佢通通試過。每一個絕地總會嚟過呢度。對Quinlan嚟講,每一次跳上梯級,行入寬敞嘅大堂,都好似返到自己屋企咁。
佢好滿意今次同老友拍住上破獲Sheb嘅黑市交易。可惜,佢哋一上返飛船,一切嘅滿足瞬間幻滅。回程Coruscant途中,Desh——全名Akar-Deshu——凝重咁同佢講述Dooku向Mahranee發動滅星。Vos都唔知可以講啲咩安慰佢。而家成個星球落入分離主義軍手上,所有Mahran都會被視為極端分子,就地正法。一星一族人,不出幾個鐘頭經已淪陷。
Vos同Desh報到嘅時候,Kenobi回應中嘅焦急,並唔係因為機件問題;隱隱晦晦嘅用字更令Vos決定連見議會嘅靚衫都唔換就去見佢——查實家下呢件見老友都有啲失禮。啱啱打完場交,成身都污糟邋遢,明明最好沖返個靚涼。唔怕,佢捉到Obi-Wan出嚟問清問楚之後實有機會。
就算佢而家出任務幾個月到一年都話唔埋,呢度個個都識得佢。Vos見返熟悉嘅面孔,笑得好開心。佢不停咁同人擁抱、擊掌、握手,連佢都有少少擔心自己會......
「同平時一樣,遲大到,」Kenobi帶諷刺嘅口吻咁講。