【急】正在賣樓，個買家突然失業要求退返啲訂畀佢，你退唔退？

利物哂大浦 · 2021-02-04T10:33:07+08:00

有個friend 賣樓，之前已經同買家deal好，兼上律師樓簽哂合約，收咗10%訂約＄80萬，原本等下個月正式交吉，今個星期agent打嚟，買家突然話有事要取消交易，仲想酌情拎返訂金...個agent都同我個friend講，咁情況賣家殺訂合情合理，佢只係盡責任轉達買方說話，話其實唔使睬買方，佢自己都會照追佣金... 一直以來，我個friend都只係透過agent同買方deal，雙方都冇對面聯絡電話，點知今朝我個friend出門口返工，就被買方（一對男女）喺大厦門口截停...開頭對男女仲死哂狗，話剛剛兩個人一齊失業，銀行批唔到按揭，又話筆錢係佢哋血汗錢，嚟緊要嚟開飯交租...blablabla，個女嘅仲流哂馬尿，求我個friend同佢哋傾...我個friend本來都有少少心軟，不過一來冇理由咁倉猝話傾就傾，二來真係趕住返工，就同對男女話一切留返透過agent處理啦... 對男女呢個時候開始變臉，語氣開始差，話咩做人最緊要有良心、有啲陰質錢袋咗會有報應、你有個女咁細個你都想教佢做好人...blablabla，係咁跟住我個friend行咗半條街咁講，最後我個friend不斷重覆話佢冇嘢講（好似入狗屋咁），一切交agent處理至甩到身。我個friend之後越諗越不安，因為對男女提到佢個女（應該係睇樓時見過佢一家），佢已經即刻叫老婆同個女出入唔好行正門，驚對男女騷擾佢哋... 可以想像對男女唔會就咁罷休，大家有冇意見我個friend可以點做？