嚴格來說,是他的住所鬧鬼。事發於八月初某晚九點多,有人按門鐘。他沒叫外賣亦沒約朋友過來,透過防盜眼看出去是空無一人。
當他坐回梳化繼續玩手機,外面那「人」又再出現,並改為敲門。
叩、叩、叩。
說真的,直到此時他仍以為有人在捉弄他,始終他有很多朋友,應該說是酒肉朋友吧,常上他家弄得花天酒地。
甚至試過有喝醉的朋友突然帶女生衝上來,故此有人弄無聊的惡作劇也是可能的事。
他這次沒有應門,默默打開 Whatsapp 等待誰 Send Message 來主動自首。
結果那緩慢的敲門聲持續了大概半分鐘才停下,他並沒有收到任何訊息或電話,甚至連外面那人也悄然消失,沒吭一聲。
「咁可能真係飲醉酒啦,」我插話,「以為 Alex 間屋係自己屋企,但用鎖匙又開唔到門,咪狂撳鐘想返屋企啫。」
赤子略帶慍色呢喃,「點解佢從來唔同我提起呢件事呢⋯⋯」又再大口大口喝啤酒。
紅茶無視她,回答的我問題,「過咗幾個鐘,凌晨一、兩點嗰陣,出面又嚟過。今次唔係敲門聲,而係急速嘅拍門聲。」
「啪啪啪啪啪啪!」紅茶手掌快速拍打枱面,似在模仿那節奏。
她說:「唔係好大力,聽得出好急,好似有急事搵 Alex 咁。佢有打去叫看更上嚟睇,但上到嚟就無咗拍門聲。」
「會唔會係追數呢咁?聽講佢爭人錢。」我嘗試問:「係咪敲門叫佢出嚟望下自己屋企俾人淋紅油呀?」
紅茶斷言道:「就算賭乜賭乜輸好多錢、買乜買乜追女仔用好多錢,佢都一定唔會還唔到。佢屋企人好有錢㗎,最後一次見佢先聽佢講想換新樓,又買過部新車。」
赤子補充道:「依家都唔興淋紅油啦。」她打量我的眼神似在嘲笑我見識不多。
「下?但我同事話佢似係還唔起錢喎。」
「佢成日都咁㗎,爭人錢、還錢、爭人錢、還錢⋯⋯每次唔係屋企人幫手,就係佢喺唔知邊度抽啲錢嚟還,所以我都幾肯定佢唔會俾錢債糾紛搞到咁,更加肯定佢唔係自殺。」
不是自殺,便是他殺。那麼兇手豈不是⋯⋯?
我驚訝問:「咩話!真係他殺——」
「——咪先,」赤子擺擺手打斷我,「講埋鬧鬼單嘢先。」
紅茶續道:「Alex 不以為然。點知幾日後凌晨時分,外面又有拍門聲!」
Alex 當時正睡覺,被拍門聲吵醒後,肯定自己意識十分清醒,沒吃藥或喝酒,也肯定不是在作夢。
這次不再是輕力拍門,幾乎是大力大力用拳頭打落門上似的,甚至是肉眼見得到大門被撞至震動的程度。
奇怪的是,夜半發出這麼嘈吵的聲音,竟然沒任何人投訴。
Alex 住在這裡已經好幾年,從來沒遇過鬧鬼,對於門外發生的怪事,完全摸不著頭腦。
他再次打給樓下看更請人上來。
等待期間嘗試窺看門外情況,看看到底是誰三番四次登門騷擾。
結果門外⋯⋯
——————————————
更係未加完的,會再出
鬧鬼呢單嘢之前上過新聞,下篇會講。
另外,我曾經出過Post講「赤子紅茶」,呢度拎個名嚟玩下,大家開心下