話說上次講到TOUR完結要準備回程,喺車上印度仔似乎仲覺得意猶未盡
於是佢就提議不如上山頂繼續睇呀
但嗰時都差唔多11點,兩個馬來西亞女就覺得有少少攰所以就拒絕咗
咁我既然同印度仔同房,陪你癲下又有乜所謂
個導遊送咗兩個團友番酒店後,都好好人咁車我地上山頂
睇番GOOGLE MAP,應該係一個叫Luossavaara嘅位黎,佢隔離就正正係一個滑雪場
上到頂後,都已經FEEL到個位真係好開揚,風大到莫講話腳架,連人都唔係幾企得穩
或者對個導遊黎講呢種程度嘅極光對佢黎講已經睇到厭晒
所以佢幫我地影咗陣相後佢就揸車走了
咁樣睇D光好似近到喺眼前一樣
而我都已經唔知係我冇對焦好 定係風大到吹郁枝腳架搞到影到咁矇
依家只能夠慨嘆自己道行未夠
又係快樂不知時日過,唔經唔覺又到12點,我地就打算離開
咁岩有兩個男人揸住架車衝咗上黎,好似好PRO咁拎住器材搵個靚位影極光
咁既然見到有車,印度仔就膽粗粗問人可唔可以車埋我地落山
可惜人地話後座放咗好多野冇晒位載我地.我地就只好自己搵路落山
一開始佢仲諗住行捷徑,喺啲有積雪嘅斜坡搵路落,真係一步一驚心呀
陪佢行咗一少段後都係搞唔掂,都係行番車路算吧啦,有咩意外就無謂啦
於是我地就一路行一路吹下水,行下行下就用咗接近45分鐘先番到HOSTEL
咁就完結咗特別嘅一日
有人成日會話旅行最美的風景是人,呢一刻我都有少少體會到
有時去旅行就係唔需要刻意咁去跑景點,反而放慢腳步欣賞下路上嘅人事物或者會有更意外嘅收獲
喺呢一日我同一班瑞典小朋友玩成一片,亦都睇到人生第一道北極光,最後本身內向嘅我仲同一個旅途上識嘅朋友做咗樣比較意想不到嘅事,我就覺得呢一日對我黎講永遠都會有一種特別嘅意義