[短篇/恐怖故] 魚師（恐怖好睇就俾負評/唔恐怖就比正評）

素衣 2020-11-19 00:42:29

其實覺得噁心多過恐怖，但真係寫得好好
同埋男主角點都要留低食落去好反人性，正常都走夾唔抖吧？但睇佢去廁所果段又好似知D野咁所以要食落去？
留名推其實我係
支持高質作者

怡紅墨魁 2020-11-19 19:52:49

我召鷙鳥從東方來，召那成就我籌算的人從遠方來。我已說出，也必成就；我已謀定，也必做成。

（十）

「俾條魚望住我點食？」我暫時把壽司放回碟上。

這時師傅拿起黑布，立即蓋起那幾個白漆盤與那個魚頭，而小妺妹則豎起手指要我收聲。我覺得莫名奇妙。

「點解我唔講得野？」我問。

「一陣你講多咗，佢聽到又知咗，就會死。行下好心唔該！」小妺妺細聲講。

「聽到都會死？無照鏡喎！」我也跟住她細聲。

「會！比干就係咁衰多口問人先死！」

「哦⋯⋯」香港人都睇過封神榜，比干和無心菜的故事我知，但不知又關魚師事，我有一秒想開口追問故事，但不想在這刻顯得太無人性。「咁我係咪食埋呢碟就走得？」

「仲有一盤刺身，但你要快手食咗呢碟先，魚師切嘅魚肉唔會氧化，但放耐咗有菌，塊肉發炎就唔食得。」

呢個時候我突然想起一個必須要搞清楚的事，便問道：「點證明？」我不是在問上一個話題的事，但小妹妹一定明白。

「你食到最後一道菜咪知！」

上星期小妺妹說過，如果想求魚師幫忙，就一定要食到最後，食完為止，我好像明白她的意思，但不敢去明，心中祈求自己心多。

事到如今，我不敢得罪魚師，就算不安，也只能遵守承諾。

我把壽司放入口中嘴嚼，魚腦碎在我的上顎散發住冰涼，我食不出腥味，只嚐到魚脂香，而魚肉更是油脂飽滿，在入口的一刻，軟肉就融入飯中，不分你我，好似一層薄魚肉網住了飯，又在裡面生根，每嚼一下，飯團裡面都會食到鰤魚肉的纖維。

「好好食！你食咗未？」有一剎那味覺的迷惑了我，我對住小妺妹的另一邊說話，突然想起，Sally不會答理我，我就在小妺妹和師傅的注目中尷尬低頭，望住檯面吉碟，沉默良久。

師傅開始準備最後一道菜，他蹲下打開雪櫃，取出一截鮮紅的刺身，一手抹淨砧板，把肉放在上面，拿起一支圓木棍，在刺身的一端輕輕滾動，竟捲下一片薄如紙的肉膜來。

「嘩！師傅唔洗用刀嘅？支棍係咩嚟？」我裝作驚訝，以趕走心中的胡思亂想。

「只係普通棍，魚師用眼解魚，用刀用棍都只係掩眼手法啫。」小妹妹答得平淡，神情倒很得戚。「以前魚師宮本武藏就用船槳幫有緣人兵解，揩一下額頭就可以將頭骨解開，後來佢徒弟權之助悟道之後，就用棍解人。長庚果時係江戶學整早鮨，啫係宜家嘅箱壓壽司，咁啱遇到魚師權之助，就學咗用棍解魚嘅技巧。」

「終於講到日本！我以為中國先有魚師，但唔明點解你地又會做日本菜。」

「咩中國？大唐宋國大邑商，我無講過中國啊？況且我都提過善無畏啦，佢係烏荼人嚟架喎，至於中國，文革時期好多人比人批鬥，魚師就暗啞底幫人兵解，如果成為批鬥對象，就跳入長江水解變魚，等人食咗再奪舍，宜家共產黨一日存在，我一個名都唔提得。」

「咁仲有其他遠少少國家嘅魚師？」

「有啊，不過各地文化唔同，未必會叫魚師咁解。」小妺妺越講越興起，又開始講故事：「以前有一支民族叫馬薩革泰，住係宜家嘅阿富汗附近一帶，佢地食生魚，解海豹，好多都係魚師，當族人老果陣，就會將老人家解開，放出牲口形相嘅元神，煮嚟比大家一齊食，在世嘅人就可以同先人同在。

你又有無聽過居魯士二世？」

我無鑽研歷史，所以誠實搖頭，小妺妺講故事幫我分心，我求之不得。「你講啦！聽緊。」

「居魯士二世，猶太經書講法譯做古列，猶太先知以賽亞就預言過佢變成鳥從東方來，當時居魯士以為係比喻佢打贏巴比倫，釋放猶太人回國建聖殿。

後來居魯士係攻打馬薩革泰時，就逼到馬薩革泰嘅王子兵解，王子嘅元神化成鷹，飛返去將件事話比女王知，女王托米莉斯就同居魯士決鬥，將佢個頭解落黎裝落袋，唔比佢見到自己身體，然後日日餵佢飲人血。

後來日子耐咗，居魯士歸化咗，都成為咗一位魚師，輾轉之下變成一隻白蝴蝶，飛咗去東方世界。」

小妺妺講故事點到即止，眼甘甘望住我。

「即係點？哦⋯⋯」突然想起她講的上一個故事，原來兩個故事是接埋的。

「哈，即係上菜囉！」小妺妺一笑，跳落櫈子，鑽過壽司吧檯的橫板，經過過廚房，揭起竹簾。在她走進走火通道前又轉過頭講：「呢道菜食嘅係無腸魚嘅刺身，等我拉佢出黎比你見見。」

聽到是魚，我鬆一口氣，看住師傅將刺身一棍一棍捲下來，再用手指棉力將薄片推出棍的未端，擺在盤上如同盞盞嬌艷紅花，誘惑著我的口舌。

「我帶無腸魚出嚟啦，你睇下！」

竹簾揭起，把我嚇到連人帶櫈反落地。

「屌你老母！屌你老母！屌你老母！」我失控大叫。

小妺妺牽住無腸魚，魚眼位置被白布帶綁住，兩個耳朵位置都插住一手掌長的長針，魚的腹部是一個挖空的大洞，甚麼內臟都沒有。無腸魚著住豔紅色的龍鳳裙褂，頭戴黃銅鳳冠，在小妺妺的牽引帶領，朝我碎步走來，每走一步，魚頭上的翠珠金釵都在搖擺。

「我唔會食架，你無講過最後一道菜係咁！我淨係知你地幫到我，但我根本唔知你地係咁幫人！」

「幫人？哥哥仔！幫你又係害人架啫！」小妺妺蹲下來看我。「不如幫人，幫埋你啦！」

怡紅墨魁 2020-11-19 20:20:15

斬啦斬啦，好好味架！