（七）
Sally從櫈落地，走過小妺妺背後，向我遞上紙巾，我接過來抹手，Sally就開始掃我背脊。
「點解會哽親，咁論盡架咩？好大粒蟹和尚喎！」又開始找錯處了，她最愛每件事都捉壞人。
我覺得喉嚨劇痛，實在沒好氣答她，生理上如是，心裡面如是。
「好彩我勸返蟹哥哥出黎咋！」小妺妺出口攞埋尾彩。
「如果唔係會點？」Sally追問。
「會食哂你啲腸！漁師幫眾生兵解，骨肉散盡，元神就會化形成為花蟲鳥魚等等形相，第一個典故入面就係變蓮花，而白龍就變成螃蟹，魚師再將形相入菜，煮比其他人食，元神就可以係口腹之中重塑肉身。蟹哥哥本身就係蛟龍，入到你肚仲唔咬到你腸穿肚爛咩！」
「有無咁恐怖！」Sally的反應很大。
小妺妺的話我不知應否全信，但至少也得信邪，不信邪我現在就不會坐在這裡了。
至於Sally，我說過她迷信。
「其實我食到有啲驚，不如我地埋單先？」她又轉而向小妺妺講：「搞到咁唔好意思，如果你已經準備咗野食，我地俾埋全數吖！」
小妺妹與師傅一個對望，又向Sally點點頭：「唔緊要！我地舖頭都唔好意思啦，唔會收你地錢！」
我開口：「唔洗埋單，我抖抖就可以再食，最多請你地遲啲再上菜。」
「吓，但要咁堅持咩？」
「我想食，陪我食到最後。」我語氣堅決。
Sally有點發嬲，掃我背脊的手一個彈開，坐回自己位置，開始飲今晚第一啖綠茶：「成日咁硬頸，我唔知你！」
小妺妺不怕氣氛緊張，合上菜譜在先，再說道：「埋唔埋單你地慢慢諗，既然唔急上菜我就食晚飯先。」
Sally幾啖飲完一杯茶，又從熱水喉斟滿一杯水，打開裝抹茶粉的自助木罐起勢潷粉落杯。
「長庚⋯⋯長庚⋯⋯」小妺妺兩手拱在嘴前做一個大聲公形狀，用撒嬌的語氣呼喚著，「我想食香魚！」
師傅沒有點頭，沒有回應，眼尾望了望小妺妹一下。
我心寒，望向Sally。
她專心吹涼滾水，兩眼就被水氣焗得越來越紅，見她一聲不哼，我又覺心煩勝過心驚。
這時師傅揭起他身後角落一塊蓋在架生上面的黑布，布下傳來攪動水花的聲音，到師傅把布收好，我才得見被蓋住的是幾個白漆鐵盤，因為幾個盤身都與我水平高度，我只聞水聲，見不到盤中是甚麼在翻騰。
我從後側邊見到師傅把食指伸出舉到下巴高度，大概是在對魚豎手指。
盤中物十分聽話，水靜一時。
突然「噗通」一聲，師傅伸手入其中一個盤，抓出六條黃鰭黑背，白肚紅側的魚仔，再用另一隻手逐一將魚放置在我們前方的竹砧板上，雖然壽司吧檯的頂部有高度阻隔，但只要我坐直腰骨，仍能輕易見到六條魚仔頭尾全部，一間一間，整齊直躺在砧板表面，完全不見抽搐彈跳。
要不是魚嘴開開合合，我還以為魚是死的。
這時師傅轉個身，手拿竹籤一支，把魚仔的一邊眼逐粒篤穿。
「點解師傅要咁做？」Sally放下茶杯，望住個真，她未重新開聲，所以講話時有點沙啞。
「一陣燒香魚果時，呢邊眼睛會向內望到自己身體，拮穿咗唔洗嚇親，咁就唔會痛。」
甚麼道理。
「你講到似層層，魚師究竟係咪真？」我忍不住問，隨即又覺得講錯野，如果小妺妺質疑我唔信又點解要返來，我就自己攞嚟衰了。
「當然真！好多時俗家人見到魚師，唔知同神仙有乜分別，就起廟供奉，香港都有漁民拜天后娘娘啦！」
「天后都係魚師？有啲格硬黎喎！」她沒有說破，我放了個心。
「咁直頭叫魚師廟嘅話無得格硬啦掛？象山、大陳同宜蘭都有魚師廟！」
「係咪台灣嗰個宜蘭？但象山、大陳又係邊？」
「象山大陳都係浙江，大陳拜張志和，象山拜嘅其實係長庚，不過象山人都未必知，佢地叫長庚做魚師大帝。長庚係果度解過一條鯨魚我食，村民後來用剩返的骨頭起咗一座魚師廟。」小妺妺兩手托臉，凝望住師傅，笑得甜蜜：「而同一屋簷下，仲有一尊女菩薩叫魚師娘娘。」
師傅又望了小妺妺一眼，然後回頭取多幾支竹籤。
這時師傅拿起一條香魚，從無壞的一側魚眼底把竹籤伸入，在同一側的身體穿出一次，再刺入，最後在同一側的魚尾將籤刺出，在籤頭撐穿魚皮之時，我見尖尖插住一個黃色小球，似乎是魚的某種內臟。
我看著覺得痛，不禁「嘶」了一聲，好像是自己被拮穿了。
「唔會痛架喎，魚師係入籤時係魚眼底穿過，出入嘅地方都係魚身體嘅天然竅孔，魚望唔到嘅話根本無感覺。」
我看住六條香魚乖乖被貫穿，每次最後都從裡面篤出一粒黃色器官來，雖然過程無血流出，但點會唔痛。
魚嘴如常開合，然後就咁被放在一個燒烤爐架上，師傳扭開煤氣掣，兩排赤紅熱浪就吞沒了魚。
「竹簽串入去魚都唔痛，咁監生火燒痛啦掛？」Sally問中我心裡質疑。
「都唔痛架！頭先師傅幫咗香魚兵解，元神都唔係度，得個軀殼係唔會有痛苦！」小妺妺講到煞有其事。
沒多久香魚燒好，師傅在長碟上撒上鹽粒，再將魚仔條條排好，遞到小妺妹面前。
香魚香魚，明明是魚，卻有青瓜香氣。魚身曲住串燒，就曲住上碟，魚嘴張開，好像未死，浮在碟上游水一樣。
這時師傅從他頭頂懸空的架上取下一支生酒，打開樽蓋，把剛才六粒從魚體內篤出來的黃色物體丟入樽中，我看著黃物在透明美酒中展開，經過玻璃的折射，再在我眼裡現出真身。
那是六盞金黃胎菊。我的腦海亂七八糟。
漁師幫眾生兵解，骨肉散盡，元神就會化形成為花蟲鳥魚等等形相⋯⋯
小妺妺用筷子夾起一條香魚，直接咬開魚頭，擠得一嘴香油，又斷斷續續地說話了：「以前魚師係河邊生火釣魚，用直針代替鈎，魚會自己將身體撲上針，求魚師幫自己火解。」
「能被魚師分解烹煮，係一種運氣。」
「能夠被食，係一種福份。」
