[短篇/恐怖故] 魚師 （恐怖好睇就俾負評/唔恐怖就比正評）

究竟我係咪絲呢？定其實係巴呢

我指sally
成間餐廳嘅人都偏坦佢依個可憐人，
就無人理下男主發展到要抹殺sally 依步嘅前因後果。班漁師做左咁多年人，都唔係幫依對男女和平分開，消除大家恩怨情仇。仲要玩鳩男主，特別個和尚，同細路女。根本喺到娛樂咁。(劏魚佬好似算係有啲惻隱之心，某啲位好似見到佢想男主啦啦聲死左去算？)
最後發現原來sally係熟人，熟人就可以偏坦。明明前恩後果唔可以話誰是誰非。佢地需要係打開心扉，承認互相傷害左大家，和平散場吖。
個故都默認左前世今生，佢地做左咁多年人唔覺得咁樣收男主皮，係延續恩怨落去咩。

究竟樓豬構思個故諗左幾耐
感覺每個位都諗過度過先將啲神話歷史放入去 雖然我唔太熟悉 不過都學到野

班魚師覺得食人係幫人 諗真啲都幾癲

（解六）

唔拖唔拖，Delay nomore

樓豬唔想拖，決定趁Lunch衝衝衝，所以唔太貼圖，同埋宗教哲學Terms盡量簡化，大家請見諒

-這是魚鰭，這是魚嘴，這是魚水撥。不過係一條魚。我不斷對自己講。-

係呢個位，男主角之所以講魚嘅器官，係因為男主角心有愧，要非人化無腸魚，唔當Sally係人，刺身先食得落口，所以Sally一直都係人型而唔係變成魚。

-「招牌菜嚟㗎嘛！」小妺妺答得理所當然。-

呢度同樣係指鐵閘暖簾「活」「造」「人」三個字，所以食活人刺身係招牌菜

-你嘅食野，同眾生嘅食相唔一樣。眾生食肉落肚，係消化，你食肉落肚，係消滅。-
-魚師嘅食係接納，食完肉，肉會流轉，落地生根，你食肉落肚，就係斷滅一場，乜都填補唔到。-

再補多啲食嘅觀念。

係佛家同道家之間，魚師其實較為傾側於佛家思想，後面會提到更多，係食嘅角度，魚師睇到十二因緣流轉，死咗會輪迴，生生不息，解人食人，元神奪舍，係直截了當嘅再世為人，人可以重新做(造)人，亦係魚師眼中一件善事。

而男主角為殺人而食，佢眼中人死如燈滅，無手尾跟，唔擔心報應同下世恩怨，所以係斷滅觀，象徵睇唔穿十二因緣真理嘅俗家人。

魚師嘅食同樣係指接納，係魚師故哪吒鬧海中，父母唔肯食哪吒肉，所以果刻佢得唔到父母接納。但得到父母接納係咪人生嘅答案呢？苦苦尋求父母接納，只會令自己長唔透，變返母親腹中胎兒。

到魚師故白蛇傳中，善無畏同長庾願意食白龍，象徵生命入面嘅師長，但得到師長接納係咪人生嘅答案呢？最終白龍變蟹，一下逃入水中，因為人會成長，孩童先要心理上依仗權威角色，但人心態長大後，呢種崇拜就會消退，所以都唔係最終答案。

人去到下一階段，就會尋找配偶，係魚師故莊子試妻入面，莊周同田氏自古相依相愛相食，象徵伴侶之間互相接納，但最終都受唔住考驗，田氏食莊周腦肉就嘔，莊周亦無食田氏，因為已經唔愛，存在主義一直探討人孤獨嘅本質，人可以相愛，但永遠都唔會完全接納同理解。得到戀人接納係咪人生嘅答案呢？你答我啦

到最終，人要尋求嘅接納只能係自己身上尋求，人接納自己，缺損都會變返圓滿，不計男主角被騙食緊Sally嘅肉，單從男主角同Sally分別都食咗自己嘅肉嘅表象去睇，Sally於心無愧，用接納心食自己嘅肉，於是身體圓滿返，而男主角於心有愧，用斷滅心食自己嘅肉，自己都接納唔到自己，生命中就會留下永遠嘅缺損，其實係一種自我懲罰。

一個鐘Lunch Time 好快，做社畜好橙，稍後再解，大家請包涵。

G持 以為樓主又比長庚解左
好多參考資料
學到野 有趣 繼續等你出解篇

新年快樂
新一年繼續支持

樓主呢

樓豬又俾魚師解左？

解七

-忽然響起男人的一聲呼喝，食堂裡頓時金光大作，又立即熄滅-
-我轉身，只見小妺妺半個人爬上了檯面，一手捏住師傅的嘴-

-「哥仔，你一陣落到街要照下鏡啦，頭髮都亂哂！」-

呢兩度係講緊長庚想及早了結男主角條命，唔想再折磨佢，所以打開嘴展現金鏡比男主角照，塊鏡係樓豬的設定中都係一塊同天照神話有淵源嘅器物，本來好大塊，日漸磨鏡，就損耗成可以放入口嘅大細。因為係正文無比相關線索，所以樓豬就唔揭曉住，留返啲小樂趣，日後寫其他連帶故事先提起。

長庚、天照、和尚三位魚師性格各異，長庚本來係寶勝如來，解人以度化眾生為首要目的，本意要男主角及早再世重新做人，所以唔希望男主角有太多折磨。

而天照本來就係因為伊奘冉尊被負心人背叛而由元神蛆轉生，最憎恨就係負心人，而係之後關於天照食花浪的描寫中，更見佢心狠手辣嘅性格，所以佢自然會當玩弄男主角為餘興。

至於蟹和尚，佢本來就係龍，同人之間絕無惻隱之心，更加唔會可憐男主角。

-姐姐你飲多杯啦，菊花露好清涼-

Mandy 去咗邊呢？之前講過，Mandy嘅元神已經成為咗錦鯉，而軀殼飲哂六朵元神菊花，就比六條香魚借殼投胎，分裂身體變成跑落街嘅六位小朋友。

唔痛架，上星期就解咗佢元神出嚟，所以頭先佢無叫過，一啲都唔痛！

-你問個身體定元神？身體有好主人架啦，佢地應承過我同長庚會好好做人，大過咗唔會好似Mandy咁黑心。-

魚師除咗幫人投胎，亦會幫畜生道眾生投胎人道。

之前第七章寫到：

「這時師傅揭起他身後角落一塊蓋在架生上面的黑布，布下傳來攪動水花的聲音，到師傅把布收好，我才得見被蓋住的是幾個白漆鐵盤，因為幾個盤身都與我水平高度，我只聞水聲，見不到盤中是甚麼在翻騰。

我從後側邊見到師傅把食指伸出舉到下巴高度，大概是在對魚豎手指。」

又提到：

「香魚見有人探頭，紛紛把頭朝向我，後來又像失去興趣似的各自望開。」

可見香魚好想比魚師揀中黎燒，快啲做人！

當男主角估到Mandy出事，而自己對腳都唔好得去邊，佢就知自己無得走，唯一希望返去問Mandy去咗邊。

返到舖頭，長庚同天照將Sally嘅內臟做返壽司，而蟹和尚就扶Sally隻手夾壽司，食返自己嘅肉，生返出嚟。

-「傻更更！你耳仔插住兩支針，又點聽人地講野？」我卻聽到Sally的聲音。「Mandy無架啦，無咗架啦。」-

-我轉頭，看著她，腦海一片空白。-

-「你後唔後悔？答我。」Sally問我。-

-我輕輕點頭。-

係呢度，男主角明明耳仔插住針，但都聽到Sally把聲，之前講過，元神鰤魚係對男主角念念不忘嘅部分，男主角食咗魚嘅腦天肉，就感應到Sally元神。

而作為無腸魚，則係除卻元神鰤魚之後剩返嘅Sally，到底無腸魚有無元神係身，文中應該無提過，但保食同八百比丘尼都試過將元神多次分裂，所以就算無腸魚本身仲有元神係身體入面都唔出奇架

對唔住大家，我衰仔抵打

返工，讀書、Part time、Online Course追堂、投稿截稿，原來做人真係會散

宜家Power up返，等我努力解埋佢

好犀利

少癲

解八

-若有人在基督裡，他就是新造的人，舊事已過，都變成新的了。-

樓豬引用聖經，因為「新造的人，舊事已過」好應魚師嘅哲理。

而且基督係聖經入面，教魚夫彼德捉魚，趕鬼果時試過又將鬼從人嘅身體趕到豬入面，又係晚餐派自己血肉比門徒食，當基督被追捕時，又一手醫好追兵馬勒古嘅斷耳，唔通

《After you've gone》

分享一下，樓豬引用的版本係由Ruth Etting演唱，佢啲情史都係好勁，Etting前夫Moe Snyder係黑幫份子，Snyder成日威脅Etting啲合作人，四圍同人打交，槍不離身又以用槍嚇人為樂，Etting同佢離婚後，同Myrl Alderman一齊咗。

Snyder威脅要殺Etting，先脅持咗Alderman，再一齊去搵Etting，當佢知道佢同Etting嘅女Edith都係屋入面，就叫埋Edith入房，要殺哂三個人

之後當Snyder對Alderman開槍之後，佢就話自己已經報咗仇，就叫Etting報警。

Etting入房拎槍，Snyder又係搶奪之下整跌咗，之後呀女Edith拎起支槍射Snyder，不過又射唔中。

呢件事之後，中間又夾雜Alderman前妻出場，打官司告Etting危害佢同Alderman嘅婚姻，最終係Snyder審判期間，Etting同Alderman正式結婚，據Etting講，Alderman自此每晚都會帶住支槍先訓到

現實故事仲癲過寫故

-伊奘諾尊同伊奘冉尊-

呢度係指日本諸島誕生嘅典故，如果換一個常見嘅名，伊奘諾尊就係伊邪那岐命，伊奘冉尊就係伊邪那美命，兩個名啲字太易混淆，樓豬打故都打錯埋。

個典故唔係火影忍者啊

總而言之，父神同母神生嘅後代都成為咗日本諸島，而生到火之迦具土神，就燒傷下陰而死。父神追母神追到黃泉國，當時父神偷睇到母神腐爛容貌，嚇到逃跑，母神羞怒追殺，到泉津平坂/黄泉比良坂決裂。

黄泉比良坂算唔算分手名勝

母神話：「愛也吾夫君，言如此者，吾當縊殺汝所治國民日將千頭。」

父神就話：「愛也吾妹，言如此者，吾則當產日將千五百頭。」

意譯就係伊奘冉尊要一日殺伊奘諾尊一千個子民，伊奘諾尊就話咁我一日生一千五百個人。

後來伊奘諾尊要洗眼，左眼就洗出天照大神。

樓豬將典故改寫，就將天照寫成伊奘冉尊嘅元神蛆轉世，再對伊奘諾尊豪言被負心人害死一千世、一千五百世、一萬世都唔會同佢交歡。

打字打到兩點，打住咁多先

最尾講講果把天沼矛，魚師故中伊奘諾尊用天沼矛從伊奘冉尊身體解出一盤火蟒，將矛擲於海中後，又比東皇網到，然後贈予徒弟，其實就係暗指哪吒火尖槍，火尖槍又名紫焰蛇矛，《封神演義 - 哪吒現蓮花化身》是咁寫的：

哪吒叩首，拜謝師父，上了風火輪，兩腳踏定，手提火尖鎗，逕往關上來。詩曰：
兩朵蓮花現化身，靈珠二世出凡塵。手提紫焰蛇矛寶；腳踏金霞風火輪。
豹皮囊內安天下；紅錦綾中福世民。歷代聖人為第一，史官遺筆萬年新。

解九

-保食-

後來天照冷靜下來，後悔莫及，得聞豐葦原中國有一位名叫保食的魚師，解食一人後，嘴中能分出千萬元神，便拜訪求食之

首先豐葦原中國唔係我地宜家講嘅中國！而係指緊嘅日本土地，而原文都不太難明，如果有興趣可以睇睇：
一書曰：伊弉諾尊勅任三子曰：「天照太神者，可以御高天之原也；月夜見尊者，可以配日而知天事也。素戔鳴尊者，可以御滄海之原也。」既而天照大神在於天上曰：「聞葦原中國有保食神，宜爾月夜見尊就候之。」月夜見尊受勅而降。已到于保食神許，保食神乃廻首嚮國，則自口出飯。又嚮海則鰭廣鰭狹亦自口出。又嚮山，則毛麁毛柔亦自口出。夫品物悉備，貯之百机而饗之。是時月夜見尊忿然作色曰：「穢哉，鄙矣！寧可以口吐之物敢養我乎？！」廼拔劒撃殺。然後復命，具言其事。時天照大神怒甚之曰：「汝是惡神，不須相見。」乃與月夜見尊一日一夜隔離而住。是後天照大神復遣天熊人往看之。是時，保食神實已死矣，唯有其神之頂，化爲牛馬，顱上生粟，眉上生繭，眼中生稗，腹中生稻，陰生麥及大豆小豆。天熊人悉取持去而奉進之。于時天照大神喜之曰：「是物者則顯見蒼生可食而活之也。」乃以粟稗麥豆爲陸田種子，以稻爲水田種子。又因定天邑君，即以其稻種始殖于天狹田及長田。其秋垂穎八握莫莫然，甚快也。又口裏含繭，便得抽絲。自此始有養蠶之道焉。保食神，此云宇氣母知能加微。顯見蒼生，此云宇都志枳阿鳥比等久佐。

樓豬講返人話先，超簡短版，月神月夜見尊係日神天照大神細佬，天照派月神去見保食，保食口吐食物宴請月神食，月神覺得唔受尊重，就一劍斬死保食。

係魚師故入面，保食吐嘅事物就變成元神，於是食咗天照個頭，幫佢吐出一萬條人臉魚，然後天照嘅義弟就一劍斬死保食。

不過，保食係咪真係比人斬死咗呢？
樓豬比啲提示，覺唔覺保食寶勝好啱音

呢啲額外故事位，有機會寫前傳之類講返童女天照同長庚嘅故事，或者可能會係其他作品提返，有關天照義弟，仲有魚師同劍俠嘅恩怨可以提，但我知道純古典仙俠故事好難係連登生存，樓豬要諗諗點想用易代入的題材包裝

仲想解埋流水長者子嘅佛家故事，但仲有兩分鐘完Lunch Hour，如果寫故可以搵食，我都唔想返工

下次再補完解九，唔補正衰仔，到時你地就解鳩我啦

咁撚仆街請人食嘔吐物都有嘅

(解九)補

流水長者子

原典出自《金光明經．卷第四．流水長者子品第十六》，太長，樓豬都係貼Link吧：
https://tripitaka.cbeta.org/T16n0663_004

原本故事簡述：
流水長者一日見到成千上萬的魚群困於沼澤，於是向國王借大象運水救魚，之後又佈施食物比魚群，最終為咗度化萬魚，流水長者就對萬魚講授十二因緣法同教佢地誦寶勝如來嘅名號，萬魚往生後，升上天道成為一萬天子。

而流水長者就係佛陀釋迦牟尼(釋達多)的前世。

樓豬係魚師故入面改成長者無緣借象運水，唯有以缽運水，寶勝如來就點出長者為「流水長者」、缽為「隨緣缽」(即現在蟹和尚的缽)。而係寶勝如來度化萬魚時候，唯有一條魚唔肯放下執著，摟住萬世的業不放，於是寶勝如來就考驗佢，要呢條魚講出寶勝如來十個名號，幫佢消解九千一百九十八世嘅業力，於是魚就剩返802世要還。

寶勝如來將魚拍成蝶，蝶就化成田氏(倒數802世)，田氏再化成淡海(倒數801世)

又兩點，屌，返工先

睇解先發現咁多宗教性嘅野

(解九)補

-淡海與無腸魚-

半夜再補多集先做兼職野

花浪淡海嘅原典出自《播磨國風土記》，原文得幾句：

腹辟沼 右 號腹辟者 花浪神之妻 淡海神 為追己夫

到於此処 遂怨瞋 妾以刀辟腹 暖於此沼 故

號腹辟沼 其沼鮒等 今無五蔵

所以原文故事好簡單直接，淡海神追逐丈夫花浪神直至腹辟沼，心中怨憤，就切腹明志，所以腹辟沼就有一種無腸魚出沒。

係魚師故入面，就變成劍俠花浪對天照色心起，斬死天照丈夫，然後又厭惡自己妻子淡海不夠美麗，最終淡海切腹明志。

考考大家，天照將花浪元神鎖係肝臟，再曬成瓊玉，你地估下塊玉係咩名

-當上介錯人，從後解頭，留下一點皮肉連繫-
-跌下來的頭就會望到脇差刀的反光，立即死亡-

日本切腹文化大家應該都唔陌生，好似下圖咁，企係後面為切腹者斬頭了結痛苦嘅人就係介錯人，介錯做得好嘅境界係斬頭之後亦留低皮肉牽連，而脇差即係一種日本小刀，可以用來切腹。

所以當魚師幫人介錯，切腹者連頭被斬都唔知，既唔覺被斬頭而痛但又唔會死，正因為唔知，但當人頭仍有皮肉牽連，個頭一跌就會望到刀上反光，知道自己原來無頭，就可以安寧上路。

以下再講講男主角被解過程：

一開始小妺妺唔想男主角亂講野害死Sally，所以解咗男主角條脷。

她剛才一定不止解走了我的舌頭，我叫不出聲。

當男主角想捏死小妹妹，小妹妹就當住男主角面前解佢對手，男主角知痛想叫，叫唔出，就估中咗自己唔止條脷俾小妹妹解咗，至少喉嚨聲帶都無咗，所以知咗就開始氣管流血。

其實真相係成個下巴都解咗，後面元嬰論有提到「大人會講野，bb仔唔講，所以下巴喉嚨同條脷都要解。」。

「喂，你氣管流血啦，心定啲得唔得！」她把我的一隻斷腕塞入氣管，讓肉和氣管互相擠壓止血，我以為會抖不到氣，但卻仍然能吸氣，想必她在我往下的氣管位置又開了孔。

「又出血嘅！哥哥仔你好煩！」她又將我另一隻斷腕塞進兩根鎖骨中間對落。

小妺妺叫男主角心定啲，因為佢估中先會流血，之後小妺妺將斷腕塞入氣管流血個開口，塞住唔比氣管再流血。男主角發現自己仲抖到氣，即係再直落仲係有開口，於是又估中咗，再出血，小妺妺又再塞住佢。

這時和尚把蟹蓋遞給小妺妺，小妺妺又讓我看了蟹蓋入面兩個擴張收縮的小洞。

「呢次我用蟹哥哥個缽仔同你開窿抖氣，你無得曳啦！」

蟹和尚個隨緣缽就好似打機Portal咁，而兩個擴張收縮的小洞，即係兩個支氣管切口(下圖藍圈示意)。

我全身軟倒，蠕動的力氣都沒有。

「嘩，呢個我知，Dorsal Vagal！樓上個細蚊仔教我嘅！」

男主角最終個身體停咗機，就好似人比車撞之前嚇呆咗唔郁或者動物假死嘅狀態，即係Dorsal Vagal State(上圖藍色Area)，當一個人受嚇到極點，而逃跑或戰鬥本能都救唔到自己(紅色Area)，就會進入凍結狀態。男主角無腳逃跑，用手反抗就連手都解埋，自然就變成咁。

有一種講法認為，係自然世界如果你遇上危險，走唔到，打唔贏，個人放軟假死，可能令攻擊者失去興趣，而且放軟身體亦能儲蓄力量同避免受傷，所以亦係一種求生本能嚟。

打字打到一點半添，兼職文件做唔做好呢

樓豬決定標題延續(解九)解到最尾，以提醒自己如果棄故正衰仔，如果走數大家到時就解鳩我啦

過左排番來終於睇到

未睇哂啲解說
魚師奪舍咁原本個人會點

留名

lm