後記:
嗄‧‧‧吧吧嘎!嗨!
感謝大家睇到故事嘅結尾。
對於結局,杜明嘅前路其實就如同佢身處嘅大海一樣,係一片茫茫大海,唔存在任何事與物,置身千年之後嘅世界,有嘅可能只係一份盼望。所以故事再寫講幾多嘢、再解釋落去,都無辦法描寫佢無奈同淡然嘅心境,再寫落去就會變做長氣。加上琴日打文打到太頭昏腦脹,所以將佢同迪加生活落去嘅展望作為結尾。
既然事實經已發生,未來嘅路都總要前行,再怕落去人都係要生活。畢竟去到好似杜明嘅情況,佢除咗淡淡咁接受命運,再嘆一口氣外,仲可以有咩舉動?
杜明走唔到同酒店浮上水面,係我一開始設計嘅結局,我寫結局向來唔鐘意好或壞,我更鐘意嘅係「未知」同「希望」,無一個既定嘅答案。
角色嘅命運以後會係點,無一個人或者讀者會知,但就即管試下走落去,就好似我哋嘅人生咁。
唔係一件事,就可以判斷到好壞。
我寫依個故事其實係有一段心路歷程,其實由構思到真係落筆只係一個星期左右,初初想同墨說嘅名去寫依個故事,畢竟成日轉帳號好煩,但都係嗰句,如果一啲讀者係為咗我個名而睇故事嘅話,咁就無咗個意義。如果要驗證自己嘅故事係咪了得,最好嘅方法就係用第二個帳號試試手,當然我上咗講故台七年,亦都寫足七年,都已經摸熟寫作吸引人追睇嘅手法同技巧。
一開始我設計依個故事嘅諗法,因為題材上我選擇驚慄、懸疑,所以依個故事手法一定要夠「快餐」。何謂快餐手法?一開波唔需要太多技巧、伏筆同文筆刻意俾人睇到,讀者撳入嚟係為咗最快知道發生咩事,唔係砌字砌到幾靚。盡快整好個故事框架,例如主角入咗酒店,即刻遇到奇怪嘢,佢一路所見所聞,佢內心嘅感受,佢嘅難題。
再者,就後唔好過重嘅描寫,太仔細嘅描寫同解釋,唔會勾起人嘅畏懼,但如果你將情感寫得最直接、最直白、最當下嗰種感覺,讀者就會好容易理解同代入到,簡單上嚟講就係容易消化。
例如,殺死陳哥同王姨,我無花太多筆墨講點樣折磨到佢哋生不如死,只係講Elisa同杜明用最簡單粗暴嘅手法拎菜刀殺死佢哋,但呢種手法正正係「簡單得令人可怕」,原來一條人命可以就咁無咗。
為咗拎啲恐怖嘅靈感,我成日上網睇下啲恐怖圖片,例如Jeff同「Elisa」,一開始我其實都有少少驚,但為咗資料搜集,我自己都慢慢麻目咗,依家半夜再睇啲返圖或者去沖涼都無咩感覺。但有恐怖嘅材料係未夠,要識好好運用佢,令佢喺故事入面有存在嘅意義。
除此之外,我盡量結合大量現實世界嘅事情,故事盡量做到近真人真事,但又近劇情片嘅感覺,有一啲讀者都睇得出,呢個故啲角色無咁深刻,因為我都好少特登去重寫,都係個句,當你對一個角色有咗情感,知道哂佢所有背景內心,佢身上嘅「未知」就會消失,而未知往往係人類最害怕嘅事物,所以我寫呢個故,其實最難掌握嘅,就係要掌控「未知」,我要俾一個感覺同情緒,係呢個世界隨時都會崩塌咁。
恐怖故我其實從來唔係我寫開嘅嘢,但係我上網睇好多年故,始終發現恐怖故係最引人入勝,最著名例子當然係有心無默嘅《西營盤》,於是蛋故就成為我第一個試驗品,但我始終覺得太偏近劇情向,明顯係一個小說世界觀,於是我就寫咗呢個酒店故出嚟,可以叫做練下筆。
酒店設定同構思方面,點解我會揀人類未來係「深海時代」呢?因為海係佔據地球唔知幾多%,然後我好鐘意玩嘅一隻遊戲入面,有個角色曾經講來未來會係「深海時代」,再加上地球真係全球暖化緊,於是就設定咗依個故事走向。
本來我想用神怪去解釋穿越嘅原因,但一嚟呢個故事嘅設定近科幻,又講未來、又講自給自足嘅能源設備,如果突然整隻神明之類嘅嘢去解釋,我過唔到自己個關,於是就出現咗「粒子加速器」,成個升降機槽,就係一個垂直嘅粒子加速器,而部機廂就係防粒子幅射貫穿嘅安全室,諗到依個設定之前,真係燒爆咗我個腦,但作為懸疑嘅故事,你總要一個說服到人嘅解釋,又唔可以太過突兀,最好舖定小小伏筆。
有啲讀者可能有啲疑惑,點解有啲嘢唔解釋埋,因為好多時嗰件事,係主角唔會突然去接觸了解去知道個真相,但我哋可以用常理去推測:
以下係我印象中,讀者們嘅提問。
問:點解阿曼當初喺五樓唔第一時間入去,要等電梯落返一樓接杜明先入去?
答:安全起見,要有個白老鼠喺1樓上嚟,試咗係咪真係穿越到去現世先,否則唔成功但阿曼又入咗去嘅話,就變相困喺1樓到浸死,所以阿曼走前同主角講咗聲多謝。
問:走廊畫作係咩人畫?
答:未來人,用作紀錄事情
令好多讀者驚嚇嘅,應該就係Elisa嘅身份同後事,喺呢到我就唔詳解太多0,你哋應該可以自己聯想到佢嘅結局。
最後,就係我嘅感想。
我覺得好攰,因為要寫嘢嘢太多,但諗諗下我要做嘅,都不過淨係寫嘢,所以又唔係太辛苦。
寫嘢其實唔難,最難係你過唔過到自己個關。
即係你明知寫完個段劇情出嚟,自己都覺得唔好睇嘅,咁就算寫幾多字去堆疊字數係無咩意思。
因此,我奉行少有少出,多有多出,最緊要都係自己開心就夠。
我個腦其實又有新故事嘅題材,但出嘅話應該都會係下年,因為好似有少少忙忙。
如果想我分享下寫故事技巧嘅話,都可以同我反映下,雖然大家應該想睇故事多啲,同埋我都無咩資格教人
最後,如果想知道我動向,可以Follow以下嘅嘢:
IG:maksyut20030164
FB:墨說
故事嘅最後,
杜明望住個海,
心裡哼起咗首歌。
https://youtu.be/svZQdc2U5jY