香蕉可可
2020-10-21 18:44:31
喺櫃入面,只有我同Elisa嘅呼吸聲。
我哋聽住原本急促嘅步伐,嚟到門口之後變得緩慢,彷彿大局經已交由對方掌控咁。
「嗒......嗒......嗒......嗒......」腳步聲嚟到隔火層到。
不明嘅腳步喺外面徘徊,佢來來回回嘅聲音,就好似搵緊我哋咁。
呢個時候,我隻手已經拎住手電筒,如果佢一打開嘅話,就即刻開燈。
眼睛習慣黑暗嘅情況下,無論係人定蛭子都一定會受到刺激。
「噹......噹噹......」佢疑似拎咗某啲鐵製嘅嘢?
「明......」Elisa捉到我隻手好實。
宜個位靜焗到連彼此嘅呼吸聲,都聽得好清楚。
「嗒......嗒......嗒......」
最終,腳步聲接近緊呢到。
睇嚟出面嘅人發現咗個櫃,而且準備要打開嗒......
就喺我做好應戰準備嘅時候,我聽到佢搞緊道櫃嘅門,但係就無開到......
「呯......咚咚......」唔知佢做緊咩。
我心感不妙,正想一嘢踢開道門還擊嘅時候,道門......
踢唔開。
「呯」
「呯」
「呯呯」
「喂!!!」我無論點樣踢、點樣推,道櫃門都好似鎖死咗咁。
「點解開唔到嫁......」Elisa聲音都顫埋。
出面嗰個人,佢拎嘢插入咗櫃門嘅拉柄到,令到我哋困喺入面出唔到嚟!
「呯」
「呯」
我無論點叫,出面嘅人都無俾過反應,仲慢慢咁離開。
留低我同Elisa被困喺呢個連企起身,想移動都做唔到嘅地方......
「啊啊啊啊啊!!!!!!!」
掉入深淵嘅絕望感,徹底吞噬咗我哋兩個。