日本買樓投資、移居，你問我答

租住先喇，適應咗個環境再考慮買都未遲。
四年喺嚟日本讀大學嗎？

推

lm

Ching仲有冇上水

最近比較忙，少左上連登
有咩問題，盡量解答你

如果喺上年，比較易搵到好嘅盤同價錢比較合理，當時算係買得過吧。
但依家東京都內比較好嘅位置都被大陸佬搶貴晒，新築位置好嘅又要抽又要剩，價錢比較易入手嘅中古，俾你睇到嘅好多都係蘿底橙，唔太建議依家喺東京買。
唔介意其他地方的話，大阪暫時都係一個好選擇，但都要慢慢搵適合嘅單位。
在日本買樓收租，除了位置重要之外，還是建議你買樓齡低嘅比較好。聽到有好幾個連登巴打在telegram 聯絡我，佢地分享返都是被中介水左佢地買啲好舊樓齡嘅中古樓（位置算可以），係疫情其間原租客走左就一路丟空搵唔到新租客，呢個係要注意嘅地方。

巴打，介唔介意講下九州邊個位置？
可以咁講，新築的話，如果塊地業權正常，個位置無咩古怪野、唔係超級偏僻的話，一般嘅建売住宅（即係發展商起好俾你嘅一戶建）發展商自己計埋利潤，賣二千萬左右算是下限了。當然鄉下啲嘅地方，地皮，建築面積都更大，但室內裝修、設備等等都一定是用最標準嘅配置了。
如果你留學後轉working visa ，唔覺得有需要咁急要去買樓住，一來你唔知將來份工返工地點係邊，二來聽你講九州二千萬頭嘅一戶建，位置相信好極有限，亦唔容易賣返出去。
聽到一百萬左右買到全新獨立屋一定係好吸引，特別日圓依家低水，但會建議你再考慮清楚啲先

岩岩望過係2500萬
鳥栖市 近JR 4LDK
簡介同附近環境都幾大路
喺市中心邊陲
留學都係租屋住好啲？
thx

2500萬左右算係合理範圍。
但都係建議你租屋好啲，一個人嚟留學，真係唔駛住咁大喇
同埋福岡市中心租個單位都係好平，等留完學，搵到份工再考慮買會比較好
何況如果你喺日本入到啲大手企業，搵到份好工做的話，喺未拎到永住前，都有機會貸到款。
日本自住樓貸款利息低，收入夠嘅仲可以借足十成，到時買間更好嘅住都唔遲啦

層樓大概幾年度算舊。
如果層樓太舊
日本政府會唔會強拍

橫濱果頭如何呢？

日本唔會有強拍，除非你間屋爛到無得再爛，嚴重影響到周圍嘅居民同道路安全，而又聯絡唔到業主去維修，地方政府先有機會走法律程序去搞。
但多數日本地區政府對呢啲事處於放任態度，因為吃力不討好，唔會搞咁多嘢。

幾多年樓先為之舊呢啲實屬好主觀嘅判斷。
有人認為只要過左新耐震基準（1981年）都可以接受，我個人覺得喺日本超過廿年樓都算係舊了，特別是過了2000年，日本apartment 嘅外型設計，內部裝修同80、90年代相差得幾遠。而呢十年八年嘅變化不是太大，買返樓齡低啲嘅相對上易租出去，租金收得高啲，同啲客都無咁麻煩。當然呢啲係我純粹個人觀察所得，到你要投資時，你自己也比較一下就是了。

橫濱市都好大，睇你講邊區。みなとみらい、中華街個邊啲Apartment 依家都賣到好貴，你計租金回報的話，都係好低。

Thx巴打
BTW原來新築一戶建嘅錢係有包基本裝修同傢俬？
仲以為係成間空屋賣出去

日本你買新築大致上都係有基本裝修。
傢俬正常就唔包嘅，除非佢係示範單位連傢俬出售

Thx ching
同埋想問吓而家日本有邊個行業係有優勢
本身喺香港讀緊乞食科
想去日本讀多科專科之後喺嗰行搵工
順便試吓apply高度人才

唔知你點先認為比較有優勢，但日本作為出口大國，關於製造嘅行業（特別關乎到一啲高端技術e.g.DISCO 專門生產半導體切割機）都有佢一定嘅優勢，農業呢啲隨著AI嘅科技發展，將來都會有好大嘅改變，都係有潛力去發展嘅，只不過係我地作為外國人，能唔能夠輕易進入到呢啲行業去發展。
外國人嘅角度咁睇的話，日本仲係好缺IT人材，有啲IT嘅工你有N3水平佢都接受，呢個行業對外國人嘅接受程度比較高，所以IT行業都係一個好選擇。
不過去到最後，都係揀一個適合自己做嘅行業先最重要吧。

請問福岡 - 大豪公園好唔好住, 打算係博多買間

大濠公園算係福岡比較出名嘅住宅區，環境比較清幽，相對多高尚住宅，買嚟自住的話唔錯嘅