爭取扭轉敗局走成細棋
(細棋指雙方圍的目數非常接近)
聽見廢佬道出他們是掠奪派,波波軍警戒地舉起武器。這是來宣戰嗎?
奇怪.....波波心想,這班掠奪派身上並沒散發危險的氣味,不似來挑釁啊。
站在廢佬旁邊,一位身形略胖、感覺有點像肥媽的短髮中年婦人,立即拍一拍中佬的肩膀,輕聲罵道:「呀——」
在場年輕人一聽她開口,下意識想接著唱下一句。
肥媽對廢佬續道:「都叫你出少句聲㗎啦,唔識講嘢嚇親人喇!」
她轉頭對老闆娘堆起微笑說:「你聽埋我講落去先啦,我哋唔係嚟搞事㗎!」
老闆娘打量二人,邊猜想他們之間的關係,邊問:「你哋成班人拎住武器行過嚟,人數又比我哋多,我哋點敢企喺度聽你哋講嘢?」
站最前排的廢佬和肥媽還好,後排個個握緊武器,隨時衝過來襲擊似的,波波軍根本來不及躲避。
肥媽明白老闆娘的意思,轉身對後面的人說:「留低幾個喺度先,其他人行去後面少少坐低休息,唔該。」
老闆娘與 Niko對望一下,沒想到對方如此爽快。
肥媽壓低聲量開始解釋:「我哋係你哋口中嘅『掠奪派』,但其實大家都係街坊,唔係信哥啲黑社會員工。
我哋都係咁啱落街買嘢遇到喪屍,而避難走上二樓,搞搞下就入咗掠奪派咋!」
肥媽愈說愈不忿,聲音亦愈來愈洪亮,雙手上下擺動,「都怪個衰佬囉,成日唔做嘢,淨係識落街買馬!」
她頓一頓,怨恨地瞪著廢佬,廢佬馬上裝作不知情,低頭逗懷中的嬰兒。
看來廢佬和肥媽應該夫婦關係,而且廢佬顯然是怕老婆性格,好像是 Niko十幾年後的寫照。
站在子濤後方的貝瑩不禁掩嘴一笑,不知道為甚麼,這個場面有點滑稽,波波軍也察覺對方確實不似有敵意,漸漸垂低手。