《女朋友全家變咗隻蛋》（５）

兩隻手都忙緊

我哋將饑餓的求導者綁入宿舍一間房入面，然後就喺門外思考應該點拷問。

「學泉叔咁，拔佢指甲？」我說。

「我落手。」沅彤又喺背囊到，拎咗啲工具出嚟。

係摺疊刀同細鉗，沅彤仲特登拎火機燒一燒啲工具，一副專業嘅樣。

「沅彤......你好似幾熟手。」我不禁好奇。

「泉叔琴晚教我。」

「又係教你？佢都無教過我依啲嘢。」

「唔緊要，你要唔要試下？」沅彤拎個細鉗俾我。

「我都係專心問問題。」

泉叔又會教沅彤咁多嘢。

「你可以開始。」沅彤戴上手套，將刀尖對準饑餓求導者嘅指甲縫中。

我收一收拾心情，凝重地盯住求導者：「其他人去咗邊。」

「我...我唔知......嘿！嘢食...我需要水同食物！！！」求導者張大嘴巴，露出乾裂、枯黃嘅舌頭。

「咔」沅彤開始郁手。

求導者應聲而叫，喉嚨深處喊出猶如海量嘅痛楚。

「講啊！」我亦一掌摑落佢塊臉上。

「呀呀呀啊啊啊嗄嘎嘎！！！！！」求導者痛到眼珠反白。

「我都預頭一、兩個鐘會問唔到啲咩，但我哋大把時間。」我喺間房踱步。

而沅彤就似個冷血殺手，一直喺幫求導者嘅指甲進行「手術」。

痛苦嘅叫聲持續咗近二十分鐘，求導者都幾乎無氣無力地哭叫，但佢依然一啲有用嘅訊息，都透露唔到出嚟。

「點解得你一個人喺到？」我試試轉用另一個方式，問。

「我...琴晚......出咗去...搵食物......到返上教育營......所有就唔見哂......」求導者左手掌五甲全脫，五隻指尖都插住一枝幼針。

「食物？搵咩食物，你哋求導者唔係只可以食一麥一米？」我蹲低身，問。

「我...我唔夠...道行......只...只有...精神力......最好嘅求導者......」求導者眼睛無神，飄忽不定：「先...先...先有呢個......定力...」

「講清楚啲。」

「我可以為紅神目付出一切！！但我真係無辦法忍受長久嘅饑餓......」求導者一直滲出口水，一直咁講。

「你流咩口水。」

「因為...我覺得......你會係...一塊，好香軟嘅肉。」依個求導者簡直餓到癲，隻眼一邊望住我，把口一邊嘴嚼緊：「應該...應該......好好食！！」

「沅彤，有冇帶嘢食？」我問。

「你可憐佢？」沅彤喺背囊拎出一條繽紛樂。

「有時唔係得拷問。」我將繽紛樂放喺求導者眼前，說：「要食一啖？」

「......」求導者望住眼前嘅繽紛樂，眼神好似震撼到講唔出嘢。

隨後，先慢慢咁點頭、

不斷點頭、

瘋狂地點頭！

「你認真回答我問題，呢條香滑細軟嘅繽紛樂，就屬於你。」我說。

「知...知...」

「重生會所有人，去哂邊？」

「唔...清楚...」

「點解你會出去搵食物。」

「我太餓...注射營養劑...食草......吸收遊離份子，已經滿足唔到我需求......我犯咗教義......我觸犯咗教條......」求導者越說越激動，幾乎鼻腔流涕：「我唔係一個純潔嘅求導者！！！！！」

「咁你哋求導者嘅職責係？」宋文德教會我事情嘅真相係唔可能直接得出，只能夠一步一步從旁推敲出。

既然信徒同求導者有階級之別，咁職業都一定有區分。

「為迎接紅神目降臨......」求導者稍為露出欣慰嘅表情。

「雖然我唔知你哋嗰個係真神，定係假神，但你哋掂到我女朋友......我都一定會報仇。」望住佢哋一個二個虔誠嘅樣，我就忍唔住憤怒。

至少，如果重生會唔存在，咁外父就唔會誤入歧途去搵八赤刀，間接令到全家變蛋。

「但我唔純潔......」求導者一秒前仲係好欣慰，下一秒就陷入瘋狂：「神將會拋棄我！！！」

「你唔係處男？」沅彤無故地拎出一把交剪。

「我...已...經，進食過...俗世......食物......靈魂唔夠...高上......」

我同沅彤對望一眼，都知道呢個係線索之一。

「你意思係，求導者受限制唔能夠進食其他食物？」

「為...為咗...除去六感......除去精神層面外嘅肉身......一切一切！我哋需要長期忍受饑餓、無盡嘅饑餓，直至儀式來臨嘅一刻......」

「你叫咩名。」

「我...唔記...得......」

「你以前係做咩，有冇家人。」

「唔記得...唔記得......我已經無哂一切嘅記憶......」求導者表情漸漸陷入絕望，不自覺地傻笑：「我哋全部嘅性...性命...都係為...紅...神目...而誕生。」

如果佢連以前作為「人」嘅記憶都失去哂，咁應該就係完完全全被洗咗腦。

我將繽紛樂斷開一小塊，拋入求導者個口：「沅彤。」

我向沅彤下達指示，就轉身離開。

佢應該明我講咩。

求導者不可置信地，輕輕細嚼嗰一細塊繽紛樂：「香...濃...幼......滑...好...好...味......嗚噫！」求導者想吞下去嗰陣，先發現吞唔到落食道。

因為，沅彤已經用索帶紮住佢頸喉嘅位置，令食管收縮，連氣都喘唔到一口。

「嗚...噫！噫噫...噫嗚嗚──」求導者發出難熬嘅無聲叫息。

為咗平靜佢，沅彤用隻手掩住求導者眼睛，得佢失去任何感官。等到求導者嘅掙扎減少，先一同離開房間。

「咳咳噫！！」求導者咳出嗰一細塊繽紛樂。

斷氣前，目光凝滯喺嗰塊朱古力上。

我哋返到宋文德所在嘅禮拜堂，只見佢靜靜咁坐咗長櫈上，閱讀緊一封又一封嘅信件。

「問到嘢？」宋文德聽到推門聲，就直接問答案。

「問唔出啲咩，佢應該係夜晚嗰陣，出咗去搵嘢食，唔知道重生會嘅人一早走哂。」我說。

「我呢到有事實證明咗，我哋做嘅事，已經觸動到「重生會」。」宋文德拎某封信件，交俾我哋睇：「呢啲係信徒寫俾主教嘅信，因為佢哋唔可以直視面對主教，所以只可以寫信去知會對方，咁啱俾我搵到禮拜堂放信嘅位置，睇嚟佢哋走得好急。」

「致尊偉的主教：
近日，不斷有「重生會」成員失蹤，懷疑有外人入侵教會。失去聯絡者包括：鎖羅盆內村守夜人、母長，還有個別接受了任務的信徒。

直至昨日，連掌管財政的幹部成員亦消失不見，有鑑於事態嚴重，特此前來致信

「第一求導者」預視會內有教徒狼心不軌，不撤離的話，重生會將引致不可挽回的局面。

通往樂園之扉的儀式將至，請務必處理。

教育營導師上」

「佢哋好快意識到危險，好謹慎。」宋文德喺我哋手上收返封信：「而且信中所講嘅「第一求導者」......好有可能，就係嗰個特別可以睇穿人嘅求導者。」

「有冇講哋去咗邊？」我說。

「無。啱啱上過重生會網站睇，佢哋連網站都關閉埋。」

突然，宋文德撳住太陽穴嘅位置，眼睛好似刺痛咁迫使佢合埋。

「文德？」沅彤留意到佢有異樣。

宋文德閉緊眼睛，眼角緩緩流出一滴血淚。

「無事......」當佢再次開眼，隻眼又好似發炎咁款。

忽然，外面傳嚟一陣腳步聲。

我靠近門邊去望，居然發現為數十人左右嘅信徒，返咗嚟教育營！佢哋手上拎住各式近身武器。

我可以大致猜出佢哋想點......

「已經護送咗主教同儀式必須嘅求導者離開，依家我哋守喺宜一到，等第一求導者所講嘅叛教者返嚟，佢哋一定會返嚟......」對眾教徒講嘢嘅，正正係嗰日替母長代上早課嘅教育營導師：「話唔定......佢哋趁我哋護送主教嘅空檔潛入咗，所有人依家搜索所有區域！」

「外面有十幾個信徒返咗嚟，準備搜索呢到。」我說。

要貿易咁出去都應該唔太可能，因為個導師企正喺中間，到時大叫一聲就千兵萬馬來相見。

三個人，打唔過個人，所以我哋企咗喺禮拜堂道門嘅左右兩邊打算伏擊，邊個一入嚟就偷襲佢。

無幾耐，有個拎鐵鎚嘅教徒行入嚟，喺佢仲未反應得切嘅時候，沅彤就拎塗上咗哥羅芳嘅白布掩住佢口鼻，我負責捉住下身，對方發唔到聲之餘，短短六、七就暈埋。事後，沅彤順手喺嗰名教徒頸上綁緊一條索帶，不出一會對方就臉色發紫，應該缺氧而死。

宋文德將佢條屍拖去一邊，等另一個受害者入嚟。下一個信徒照板煮碗咁殺害，我先慢慢意識到生命嘅脆弱，可能只在於一門之隔。

但對方都唔係蠢，見到連續兩個信徒入咗禮拜堂之後有入無出，就開始對入面感到疑惑。

「啱啱係咪有兩教友入咗去？」重生會導師接近禮拜堂門外，呼叫眾信徒：「全部人過嚟依到。」

好快，合共八條友就聚集到禮拜堂門外。

「去講台嗰邊。」宋文德突然指示我哋。

我哋見再躲藏一邊亦無謂，就一齊退到講台禮拜堂嘅位置，同外面嘅佢哋拉開一段距離。

「呯」一名信徒用力將門推開。

重生會導師一見我哋，就拍拍手笑道：「果然，果然，有老鼠混入咗「重生會」。」

「殺出去？」沅彤簡單問一句。

「我諗......都要。」我亦拎上八赤刀。

原本諗住只係用嚟殺兔嘅刀，恐怕今日要用嚟殺人。

但對方有八個人，我哋基本上無任何贏嘅可能。

「企正喺個圓光入面。」宋文德說。

我望一望地下，宋文德講嘅圓光應該就係陽光穿透禮拜堂嘅圓窗，再經過折射打落地面嘅圓形光狀。

「點解要咁做？」沅彤唔明。

「捉咗你哋之後，你哋會理解到痛楚嘅真理。」教育營導師呈現出詭異嘅笑容，揮手示意信徒上前襲擊我哋。

呢個時候，宋文德轉身扭一扭講台上掛住嘅橢圓形紅十字徽章，呢個係重生會嘅標誌！但呢一扭，居然令成座禮拜堂發出機關運作嘅聲音，然後我哋三個所企嘅位置，竟然慢慢下降......

「呢個係......」我愕然。

「多虧我隻眼......」宋文德有些苦澀咁淡淡一笑：「令我臨時發現到「真相」。」

一撳入嚟check就見到有文

文德要死了

直覺宋文德會悲劇收場

萬花筒寫輪眼

Live 口一

有排都未死

好精彩

好好睇

今晚仲有冇

加速

仲有冇

唔好死啊你

加速