外借大埔重拾信心 中村冀創奇迹報答球迷
01月20日(一) 15:12
日裔港將中村祐人季初由傑志外借至和富大埔,這亦是他相隔一年後重投這支地區球隊。如今中村更有機會代表大埔,歷史性首度出戰亞冠盃外圍賽,這對於重視情義的他來說,絕對是別具一番意義。
上季效力傑志的中村祐人,雖然為球隊贏得足總盃,但礙於風格與球隊踢法不符,中村去年的表現其實不算太亮眼。及至今季因轉換新帥而被借走,得以重投一支對他來說有很大意義的球隊——和富大埔。2016至17年球季,中村為球隊上陣26場並貢獻5入球,季尾更贏得菁英盃冠軍,雖然翌季屈居港超聯亞軍,然而中村效力大埔的兩年,已可謂是他的生涯高峰。
與兩季前相比,大埔的陣容如今已變得面目全非,實力亦無疑較之前遜色,但中村認為有一樣本質在大埔隊內依舊存在:「大埔就好似一個家咁,當我經歷低潮嘅時候畀機會我返嚟呢到。而今季我嘅表現好轉亦都多得大埔幫我重拾信心,所以我想報答番球會。」當中,他特別感激一些人在他陷入低谷時伸出援手:「好感激李太(贊助商和富社企其中一位負責人李麥潔娉女士)同球迷一直嘅支持,佢哋令我喺大埔感受到家嘅溫暖,我好想展示實力畀佢哋睇,為大埔而戰!」
大埔將於周二(21日)晚歷史性首度出戰亞冠盃外圍賽,作客馬超球隊吉打。中村坦言,在亞冠盃上陣是他其中一個夢想:「上季喺傑志因為受傷錯過咗亞冠盃外圍賽。今季終於有機會,我好期待呢場比賽。」雖然賽前「綠戰士」一直被看淡,但中村仍希望懷着信念,為大埔踢出好波:「雖然近況唔好,但我認為只要夠團結,我哋係有機會創造奇迹,聽日嘅比賽我會拚盡120%嘅力,為大埔全力爭勝!」
From: on.cc