細個嘅時候,好有夢想會幫自己規劃想做啲咩,好有野心。隨住大個所謂嘅夢想知道做唔到就開始冇諗⋯讀中學嗰陣中意韓星好有衝勁去溫韓文,而家大咗嗰種動力就慢慢減退,又唔係唔中意,係唔知點解成個人懶咗落嚟,又唔入腦
幾年前開始做嘢,到而家重攞住一份我都唔知點解自己可以捱到咁耐嘅低人工,每日返工放工返屋企對住電話睇劇/睇書然後食飯瞓覺,又唔會打機。有戲想睇就一個人睇戲,一個人睇演唱會,一個人去旅行,間唔中先約下識咗好耐嘅朋友食下飯(重要多數都係人哋約,比較少主動約)
連心動同想拍拖呢啲感覺,都只係喺睇言情小說嗰陣出現,一睇完就會回歸現實,意識到自己其實好耐冇真係對一個人有感覺。公司嘅男同事全部名草有主,有埋仔女,自己又冇搵啲識人嘅活動去參加,變成噉其實都好理所當然。
其實我唔怕孤獨,只係面對咗好耐現實,又有主觀因素影響,就會覺得冇乜嘢特別出色嘅自己係一粒可有可無嘅微塵,連帶對「生活」都失去熱情,冇乜動力同目標可以令我作出改變。好多時都諗過死呢個問題,只係暫時仍然都冇勇氣。唯一覺得自己幾有衝勁,就係睇偶像同旅行嘅時候,過後又好快回歸現實,繼續渾噩
利申:95 A0 絲