DAY6 續
得閒更埋剩低少少嘅DAY6
係月台影番落去嘅神戶動物王國,佔地真係唔大,就咁望都唔會覺得係動物園
搭番車出三宮站食嘢,食RED ROCK牛肉飯
佢係神戶三宮附近都多分店,我就揀咗呢間係三宮站行5分鐘就起到嘅分店,不過呢間嘢係二樓,啲樓梯斜到仆街
因為係神戶動物王國食咗嘢,所以就嗌咗唔記得細飯定係中飯
都好食嘅,下次再去試另一款薄牛肉片個隻
本身原定係去明石大橋,但因為天氣麻麻,個日食完飯又有啲眼訓(飯氣攻心?),所以就返酒店抖下算
係JR站月台係會睇到隔離阪急嘅車經過
山陽電鐵3000系
搭JR就當然搭新快速返去
好似第一次坐225系新快速
大阪站落車,對面去高槻嘅321系
係附近兜咗陣,專登唔行平時行開個條路,發現原來呢邊旺好多
呢到間TOWER RECORDS都有IZONE簽名POSTER
計埋九州個次好似見過3次
係FAMILY MART買咗啲嘢返酒店食
終於破例買咗炸雞嚟食
我覺得FAMILY MART係最好食
另外買咗呢兩個。。。其實排便暢通,只係以防萬一
抖咗陣就去日本橋行下買下巴士
當然係可以搭御堂筋線起難波再行過去
但搭咗好多次搭到有啲悶,決定搭到去動物園前站再轉堺筋線去惠美須町站落車
咁啱搭到阪急直通運轉嘅車
再一次讚嘆阪急啲車真係好靚
日本橋
其實都係去SUPER DEN DEN LAND到買嘢
另外去咗NAMBA CITY下面間書店到睇嘢,呢間書店入面有一大個位賣好多鐵道周邊
朝聖下難波團嘅舖頭
又去咗間激安到兜,咁啱個日難波團有劇場公演
係難波到行咁耐就係等夠鐘食國產牛
出發之前搵燒肉舖見到好多台仔BLOG推薦,又話抵食,又坐得舒服
咁就決定去試下
不過呢間嘢其實唔係幾啱一個人嚟食
首先BOOK位個時得本町呢間俾一個人嚟食,其他分店都要兩個人或以上。其次佢所有枱都好大張
一個食真係羞恥度MAX。同埋又唔係獨立個室隔開,所以就會見到隔離左右都好開心咁食但得你自己一個毒毒食
不過撇除上面嘅嘢我覺得嘢食質素都幾好嘅,又好多唔同款式揀,4000円嚟講都值嘅 (香港出去食燒肉都200幾蚊啦,仲要唔知俾咩肉你)
我大約嗌咗三ROUND
佢呢到都會有中英MENU,所以唔駛驚睇唔明
基本上你指圖俾啲STAFF睇就得
任食嘅部分係唔包甜品
甜品淨係可以揀一款嚟試
雖然係唔錯,不過下次去獨遊都係食一人燒肉算
等有人陪先再嚟呢到食
DAY6 完