有無巴絲長期受住胃脹肚脹之苦? (3)

例如呢

食野減速，減油膩

有無巴打有食PPI。早排照完鏡醫生話要食2至4個星期，1日2次 Pariet 20mg。果時開住2星期藥先，未好番先再買黎食。而家食完2星期感覺有好番小小，食野正常番，無咁頂住，但有時食多左都仲覺得脹同肋骨下痛。究竟而家洗咪再keep住食，上網睇其實1日食2次20mg劑量好多，其實洗唔洗減番劑量呢

你地有冇驗過係咪幽門螺旋桿菌？
我之前脹左好耐，睇左年幾中醫冇進展
後來照胃鏡話係幽門
食完抗生素療程好返八成左右
但都要盡量唔食難消化同多胃氣既野
不過間唔中都會脹到訓唔到好辛苦

半年前照過胃鏡咩事都冇 2星期前開始冇胃口 食少少野就飽 日日起身胃脹到想嘔 睇醫生都係俾胃藥 食完冇好轉 唔知點算

食小d先la,

試下睇中醫？

好返好多，好耐冇入依個post，見又有班新人受腸胃病之苦，分享少少個人心得：

１）點樣知自己有咩問題？
＞最直接嘅方法係去照腸胃鏡！壓力都係引起腸胃病嘅主要成因，照完之後你清楚自己腸胃發生緊咩事唔洗擔驚受怕！根據醫生／好多巴打分享，好多時其實係輕微胃炎，唔會有生命危險，但就會令你相當折磨。同樣，清楚自己腸胃實際上發生咩事，先可以對症下藥，根據情況用唔同療法。

２）關於飲食習慣
＞我係針對慢性胃炎（非常普遍）黎講。首先，一定要戒生冷戒辛辣！個人經驗，一食生冷／辣野就會即刻差，之後養個胃幾耐都冇用！另外就係睇返自己對咩食物敏感，例如我係完全唔飲得奶，一飲就會成日作嘔。飲食係令你康復最重要嘅一環，唔好因為一時貪心令自己前功盡廢！另外，建議各位食得幾多就幾多，唔洗為食得少而唔開心，慢慢食，飽就停。我半年前一個快餐店飯要少飯都覺得飽滯，依家已經可以正常食晒成個飯而且唔會唔舒服。

３）關於治療
＞好似我先前所講，第一件事係去照腸胃鏡。如果不幸確診各種嚴重疾病（如　癌症），就交返比醫生處理（唔洗擔心，機會率極低！）。而絕大部份其實都係輕微發炎，依個情況下藥係幫唔到你幾多，要靠自己。唔同情況你可以選擇唔同用藥，長久堅持一定有改善。
＞胃酸倒流／過多：如果你有好嚴重胃酸倒流，建議你一開始用返PPI，依隻藥可以好有效令你胃酸分泌減少。但因為胃酸少左，你消化能力都有機會受影響，所以用藥期間最好食啲容易消化嘅野，唔好比腸胃太大負擔。另外，如果只係間中有胃酸問題，唔太嚴重唔想食藥，可以考慮食梳打餅，都可以有效＂用＂左啲胃酸。胃酸問題一定要正視！因為你發炎嘅時候即係個胃黏膜受損左，如果再有胃酸刺激，會令個傷口唔好，係一個惡性循環！
＞腸胃脹氣：依樣係困擾唔少人嘅問題。根據嚴重程度，可以係經常要喺公眾場合噯氣／放屁，亦可以嚴重到因為氣太多而作嘔（乾嘔）。對我自己黎講依個問題困擾我三年以上，到依家仍然會間唔中發作。平時療養方面，都係飲食習慣要有改善。但當有時真係發作嘅時候，揀一隻啱自己嘅胃藥好重要。我暫時會喺發作得好嚴重嘅時候食胃仙Ｕ／太田胃散（漢方），依兩隻藥都可以好有效咁即時疏通啲胃氣，你地可以試下唔同藥，睇下邊隻藥可以最有效幫到你。
＞中藥治療：我自己本身唔太信，係一開始走頭無路就去睇，結果係有效到我唔敢唔信！揀一個啱自己嘅中醫好重要，有人可以好大改善有人覺得冇幫助，唔同中醫鍾意用唔同藥方，而唔同藥方亦對你個腸胃效果唔同，我諗依個就係所謂＂人夾人＂。如果你試晒所有方法都仲唔得，我絕對建議你試中藥！我睇到依家已經睇左三四年，用藥亦愈黎愈少，希望下年開始可以完全好返唔洗食啦。

希望以上經驗幫到大家！

bro 好詳細講解 支持我同你應該都係咁
補充下，記得食嘢唔好快 戎有氣食物 例如汽水 洋蔥呢d...都係好容易gg
一feel到唔舒服就記得那個星期少食多餐 餓唔死就得

幽門螺旋菌真係要食抗生素先好得返，但依家好多人胃功能弱，成日消化唔到胃脹同痛

大豆，南瓜都係，食多啲椰菜

1日1次夠啦，你問下醫生啦，好返應該停

但又未好番哂一食濟小小既野就黎料

PPI唔係萬能藥，治標唔治本。食緊期間最好都係減少食量，因為會消化唔黎。完成療程再睇下成果如何。咩藥都係假，飲食係最重要。

呢幾日食多左辣野 而加又無乜胃口

另外各位有冇飲過咩茶可以消滯? 想買返啲看門口，暫時諗緊薄荷茶

食完PPI 都仲係咁 有氣谷住咁，肋骨附近有時痛，可以點搞？照過鏡話係十二指腸潰瘍同胃竇炎，但應該算係輕微，點解食左2-3 星期都未好

照完成PPI療程，之後開始食療吧。你有冇食少啲野架? 量好重要，食太多消化慢，個胃負擔又重左，更加容易唔舒服。要醫好發炎係一條漫長嘅路，可能要以年計，唔好諗住食藥就可以好返，食完藥先係真正嘅開始。

之前食完第1～2個星期PPI 覺得好左小小，又食多左之後就脹番同痛。而家食番小啲架喇果時醫生話情況食2到4個星期，而家仲有1星期就叫食哂成個療程

巴打你胃病左幾耐？ 好折磨，我差唔多反反覆覆都半年，係前排發現瘦左6kg先去照，仲諗住照完食完藥就搞得掂

用一個比喻(唔係100%正確，但可以幫助你理解)

假設你食野太快咬損個咀，最快康復嘅方法都係要藥膏/用啲痱滋貼斷絕個傷口同外界接觸，你依家幻想下你個胃就係生左粒痱滋，但係胃唔同咀，我地冇得比藥膏佢，亦冇得搵膠布封住個傷口，相反，每日佢仲要接觸大量胃液胃酸，你話佢要幾耐先好返?

咁我地可以做嘅，就係盡量唔好刺激到個發炎嘅傷口。可以點呢? 唔食辛辣食物係基本，另外就係培養一個好嘅飲食習慣，我地冇得控制個胃唔分泌胃酸，但係我地可以控制佢幾時分泌同埋份量，有良好飲食習慣，個胃習慣左，自然會喺適當時候(例如每日固定食飯時間前)先分泌適量胃酸，對個傷口影響自然較少（唔係完全冇影響，但相比你空肚下大量胃酸轟落去已經好好多）

希望你會有大概了解

巴士解釋得好詳細 睇黎真係要改善飲食習慣。個病搞到唔想同fd 出去食飯，成日驚食濟，又樣樣都唔食得咁

胃脹到係咁嗝氣，搞到瞓唔到