【懸疑】《珍珠奶茶殺人事件》

——第二十三章：偵探遊戲（一）——


宴會桌子上，坐最左的人是白山，然後是何雄心、freeyon、阿邪、眼鏡娘、最後是李加鼎。

而我，則佇足桌前，準備數出疑點，讓眾人討論。

但首要任務，是通過「私刑」的提議。

這樣真的好嗎......?

「我唔反對直接處決既做法。」白山說。

「反正我同個神秘殺手無任何關係，你地私唔私刑係你地事。」李加鼎閉眼靜休。

「有無人反對？」何雄心環視我們，見大家沒怎樣反應，逐向我說：「咁就當通過喇，將時間交比Paddy，偵探遊戲正式開始！」

我呼一口氣，首先把目光望向白山。

說真的，我幾乎對此人毫無印象。

不過，不代表他並無可疑。

我抿抿嘴後開口：「白山，白慄山莊者既團長，身家豐厚而且對李氏家族有深仇大恨，絕對有機會委託老王，要我地殺超蓮。成事之後，由於唔想比錢，索性殺埋我地呢班「劊子手」，再嫁禍他人。」

「嘩...」李加鼎立即瞪大眼睛：「我都諗過架喇，白山你呢個野蠻人係最可疑！」

「荒謬！係我既話唔駛搞咁多野啦！直接殺左你啦！」白山反罵他。

「你唔想背負殺人罪名，先至外判比啲殺手做啫，唔好以為我唔知你份人喎。」

「含血噴人！」

「證據呢喂？有冇證據先？」白山轉頭向我怒吼。

「暫時未有，但唔排除你會有其他同黨。」我簡潔道。

「荒謬！」他又大呼。

「荒謬？」我反問一聲，眼神突變凌厲，踱向白山的背方一直盯著他。

他不安地握著空酒杯，生怕我會做些什麼。

而我最後根本沒對他作任何動作，只是裝一裝兇越過了他，去到何雄心身邊。

「下一個——何雄心，老王一貫既委託人，同李氏家族亦有過節。」我解說：「本身佢既嫌疑最大，不過喺上個受害者妖女死既時候，佢係比我地綁到實一實，理應犯唔到案。」

何雄心頷首：「大家聽到未？」

「佢綁左你你都無諗過報仇？真唔真啊？」Freeyon質疑道。

「我係個通情達理既人，知道佢地綁架我既原意，所以我唔會咁計較。」其實何雄心這句話沒什麼說服力。

「但係你當時確實喺現場喎。」眼鏡娘指著他：「會唔會係你一早已經鬆綁，殺左妖女之後，再綁翻住自己？」

「玩雜耍咩？你玩我呀妹妹仔？」

「如果你有同黨就講得過去喇。」

「如果？你知唔知我當時被救出嚟既時候，頭部傷口有幾大？個同黨會唔會係無啦啦打到我咁先？」

眼鏡娘咋舌，然後陷入空想。

確實，我當初到達現場時他的頭部已經受傷，而且那時他驚恐的樣子該不是佯裝出來的。

何雄心現場唯一可疑之處，就是忽然變得大方殷勤......

「下個！」我喊：「Freeyon，李氏家族大仔，喺......」

「等等先，我並無呢一個仔。」李加鼎突然中止我的說話。

Freeyon先是錯愕，遂走向李加鼎身旁：「爸爸，做乜野事呀？個兇手唔係我啊......」

「唔係你？你成架跑車比人地車房閉路監視器拍到啦，仲抵懶。」

「我係比人偷車架！爸爸你知啦，超蓮係我地屋企人，家族既事我一向好上心，我又點會......」

啪！

一記響亮的耳光。

Freeyon右臉瞬即通紅，他驚訝失色的摸著臉頰，仿佛人生從未被掌摑過。

「爸爸......」

「家族？我剩係知你同何雄心有枱底交易，將我地啲錢轉哂比人。你自為咁樣可以另起爐灶，其實比人當水魚咋，我無你呢個咁廢既仔！」李加鼎勃然大怒。

「爸爸！唔好呀，對唔住啊爸爸！」Freeyon見事情敗露，倏即跪在地上，眼淚鼻涕熟練的變出來。

我們其餘的人宛如看戲一樣，怔怔看他們二人上映父子情仇，何雄心更是津津樂道，一臉「我最期待的畫面出現了」的模樣。

「哈哈，何雄心你果然夠賤呀。」白山拍案叫絕。

「拿，唔好用個賤字呀，我咩都唔知架。」何雄心詐傻扮瘋，暗暗偷笑。

我繼續說：「無錯，佢最大嫌疑就係架車喺案發現場。殺人動機方面，有機會因為超蓮既死而報仇，不過之前Freeyon曾經同我講，話佢恨不得超蓮死，所以動機變相細左。」

「垃圾！」李加鼎聽罷往下跪的Freeyon再踹一腳，他馬上踉蹌倒地。

「下個啦，我覺得唔係佢。」眼鏡娘盤腿托頭。

「嗯，我都係咁諗。」我把目光往右一移，垂頭喪氣的阿邪就在眼前。

他一洗以往傻乎乎的角色設定，神態凝重。

「阿邪，同我一樣係受委託既殺手，喺之前老王同喪堅死既時候都喺現場附近。而妖女死既時候，何雄心更話聽到有人講「好想奶你」，呢句正正係阿邪既口頭禪。佢有機會為左委託金背叛我地。」

「我發誓我真係聽到佢講「好想奶你」。」何雄心道：「咁肉酸既野平時根本無人會講。」

「係呢個二五仔都唔奇啦。」白山不感興趣的說：「成日口口聲聲話要加入翻我地，話會對李氏家族落手，可能就係咁樣，特登講呢句說話證明係自己殺人囉。」

「白山，你咁樣唔合邏輯啦。」李加鼎也持有意見，反駁著他：「佢目標係我地既話，點解要殺自己人先？點解要刻意爆出自己身分？」

「委託金。」我答他：「呢個有機會係佢既殺人動機，但點解要自爆，我就唔肯定，反而我覺得可能有人想冒充佢，混淆視聽。」

阿邪依然沉默以對，不抗辯亦不承認。

「冒充佢既人，你都係想話我啫。」旁邊的眼鏡娘說。

我慢慢走過去，捉住她的椅背，有點為難的開口：「眼鏡娘，你已經係我最相信既人。不過問題係，你的確有嫌疑，而最重要係你貪錢。」

「我？」眼鏡娘站起來，近近的跟我對視：「我係貪，但我絕對唔會做出中飽私囊（委託金）既事！」

「我只係照直講。」

猛地，她從胸口掏出利刃，端到我的喉嚨前：「如果我要錢，我直接咁做就得啦，何必搞風搞雨？」

「...」

此時，何雄心站起，插嘴進來：「唉啊，Paddy你又係唔啱既，點可以懷疑呢位妹妹啵？」

「又係你頭先叫我講哂所有人既疑點出嚟既...?」

「唔需要喇...我聽左頭幾個人講之後，加上我溫習過案件既詳情之後，其實我已經知邊個係兇手。」

「咩話？」我驚呆。

「兇手...就係你呀，李加鼎！」

輕輕一推

好似冇講李加鼎個嫌疑喺邊？ 雖然大家都知

今晚講btw其實兇手就快揭曉了

點入行

唔明

——第二十三章：偵探遊戲（二）——


「我？哈哈胡說八道。」李加鼎瞪著眼笑：「呢個叫Paddy既受害人都未講到我，你憑乜野質疑我先？」

何雄心雙手交疊胸前：「我分析過呢單連環殺人案架喇，兇手每次殺完人都會用奶茶留低信息，而超蓮亦係死於奶茶，所以呢個肯定係你為左報復而留低既信息。」

「兇手擺明係故弄玄虛啦。」

「咁你點解釋另一樣野？Paddy同我講，妖女死前一日，佢將所有閉路監視器既記憶卡攞左出嚟，但係第二日只有大門果部無啦啦插入番記憶卡，仲咁啱影到Freeyon架車......講真，你地富豪啲車，外人邊有咁易偷啊？擺明係你好憎Freeyon，所以搞咁多野想嫁禍佢啦！」

「我點會咁做？」李加鼎怒氣醞釀：「佢雖然係衰，但始終係我個仔......」

「拿，我地頭先個個親眼見到你點對個「仔」架，拳打腳踢喎。」

「你...你......」

我想我知道何雄心會忽然對我這麼好了，儘管我曾經綁架了他......

他是希望借著我，對李加鼎置諸死地。

「不過咁喎。」眼鏡娘不同意何雄心的說法：「你話你曾經聽到有人講「好想奶你」，按道理李加鼎應該唔會講架喎。」

「好簡單啫，因為有共犯囉！」

「咁共犯係...？」

何雄心咧嘴一笑：「迫供佢咪得囉。」

說罷，何雄心的管家和保鏢從我剛才進入宴會廳的走廊出來，他們手持鐵通，步步進迫李加鼎。

「做野！」何雄心喊。

李加鼎喝一聲：「你敢？」

話音落下，大門便衝進一群戴黑超的西裝保鏢，保鏢手上皆拿著手槍。

乍看兩邊兩邊勢力相當，各有近十幾人。氣氛頓時殺氣重重，眾人臉色僵作一團。

「睇嚟都係傾唔到啲咩架喇。」白山卻歡呼大笑。

我一聲不吭，只是回想著方才的一切對話。

李加鼎說過，兇手是為了故弄玄虛。

深層一想，的確沒錯：閉路監視器拍到Freeyon的車子、奶茶留下的文字、何雄心曾經聽到「好想奶你」......

所有線索，明顯地想讓我懷疑所有涉案人。

但是，抽離一點去看，故佈疑雲的這人必定很了解我們，才能留下各種誤導性的信息。

若果...由開初的時候，我們已經是進入了兇手的圈套裡。

讓我們對「神秘的委託人」有所誤解，一直往他的方向追尋。

這麼說，兇手有可能是......

砰！！！！

猛地一記槍響，響徹整個宴會廳，所有人霍時肅靜下來。

「警察！！全部咪郁！！！」

有近三十個刑警闖了進來，當中包括吳Sir，警察馬上圍成圓陣包圍我們。管家和保鏢們見狀，唯有先收起武器。

除了何雄心、李加鼎和白山以外，我們所有人也大感驚訝。

原來警方知道我被何雄心帶到這裡後，一直侍機而行。

吳Sir慢條絲理走到李加鼎旁邊，堆起笑容：「幾位大人物，做咩事共眾一堂啊？」

「咪就係幫你班無用既警察查案囉。」白山不留情面道。

「咁你地又查到啲咩啊？」

「阿Sir，拉佢啦。」何雄心指著李加鼎：「我地得出左結論喇，兇手係佢啊。」

「你講咩啊？無憑無據，一尾靠估！」李加鼎雙目圓睜。

「一人少句先......」吳Sir耍耍手，向同伙打個眼色：「我地今日嚟，首先係要捉左殺超蓮既犯人先。」

下一秒，幾個警察來到我、阿邪和眼鏡娘身邊，把我們抓住。

吳Sir瞥見了我，走來我身前瞪著我說：「你隻頑皮既誘餌，我比次機會你，你竟然唔好好合作，仲要唔承認殺左超蓮。」

「證據呢？」我問：「你點知道我地三個殺？」

此時的我正被其他兩個刑警抓實兩膊，吳Sir輕輕彎下身子，從我口袋裡掏出手機，再在我的眼前晃了晃。

「查出嚟，等到幾時？一個星期？一個月？一年？」李加鼎說話特別有份量。

「而且兇手好大機會就喺度，如果就咁放左佢走，仲點會有第二次咁好既機會？」眼鏡娘說。

「哼！」吳Sir似笑非笑：「咁你地傾唔傾得出兇手係邊個先？你地又唔係偵探，又點可能靠住幾句說話知道邊個係兇手吖......」

「唔係喎，我諗我知道兇手係邊個。」

眾人聽到我這樣一句，不禁以驚奇的目光望著我。

吳Sir更是立即被打臉，下巴跌了下來。

「你吹水架咋嘛？」

「緊係唔係啦。」

「好，咁你講。」吳Sir不份氣的揚揚手，示意捉住我的刑警放手，續說：「而家所有嫌疑人都喺度，你指佢出嚟。」

我微微點頭，環觀宴會廳內的每個臉孔，他們皆以緊張的神色回望我。

「兇手就係......」

我舉起手指，往吳Sir的方向堅定的指去。

「我！！！！？？」

吳sir？

係自己人嘅嫌疑好大, 唔排除老王其實未死, 幕後主腦都係佢.....

追到live 聽住a7x睇故先