《人脈關係篇》識人好過識字，問題係你點識人？
識人有咩好？一句說話，可能你就會有一張大單；一句說話，你會有份好工；一句說話，你成本平左30％；一句說話，你既煩惱一掃而空。
我相信識人好過識字呢句野，連大澳一個八十歲既阿毛都識得講，但絕大部份人都係識唔到人，甚至連字都唔多識。
打開你既電話簿，首先你識幾多人，其次你識幾多對你有用既人？
每個人都有n個facebook friend，咁又點，有時唔係講數量取勝，就好似球賽入面定勝負既從來唔係射門數，而係入門數，但你射得多，入既機會都唔會差得去邊。
唔好怪我太現實，請將識朋友，同識人分開，從來都係話識人，唔係識朋友，如果你將朋友一套套落識人度你會寸步難行。
就係因為你錯將朋友同人搞亂，所以你會覺得呢個人唔啱咀型識唔到，又或者呢個人太功利你唔想同佢熟，又可能佢唔多理你你都唔想同佢聯絡。
識商業朋友，其實好簡單，第一，你係佢心目中係一個可以利用既人！第二，你亦覺得佢總有一日可以用到。簡單講，互相利用。
互相利用聽落好難聽，不如我用另一個講法，互相合作、互相幫忙之類會唔會良好少少，但說到底都係一種利用，但呢種利用，係公平既，比起所謂友情，更明買明賣。
咩係友情？有事你要幫手，佢要毫不猶豫咁幫你，咁就為之真兄弟，但亦係佔左人著數，用友情代替利益，犧牲完之後你覺得你既友情唔會有變化咩？所以唔好諗住搵真兄弟，真朋友幫手，如果你仲想有呢個兄弟或者朋友的話。
識人第一步，出街
你係屋企，係無可能識到人，請盡量出街，出席行業聚會、興趣班、講座、朋友生日等等，每出現係一個新地方新群組，你都有機會識到人。
有咩場合，之後詳述
識人第二步，自我介紹
第一印象，係最影響一段關係，請好好練習一段屬於自己既介紹，唔好隨心，唔好搞笑，唔好懶有性格，清楚講出以下幾點。1）點稱呼你 2）點解會出現係度 3）你係做乜野既
唔好睇少呢幾點，大部份人連介紹自己都唔合格，你點講就係點既人，叫自己個名都唔清楚既，你肯定唔夠自信，點解會出現係度你都講唔出，你係一個唔知自己想點既人；你講完都唔知你係做乜既，我點知有冇機會同你深交？
識人第三步，衣著談吐
人靠衣裝，唔好同我講內心，任何一件成功既產品都有包裝，就算係無印都係sell簡約，而唔係難睇，你著衫衣不稱身，又殘又舊，鬍又唔剃，頭又唔剪，仲有口臭，唔好玩我啦，咁咪唔係叫真性情囉唔該。
其次談吐，自我介紹完你總要搵野傾，你講野係正常既，已經足夠，而你識講野當然係有分加，亦定左呢段關係入面邊個比較強勢，點可以係短時間入面同陌生人交朋友，點令佢覺得你得，之後再詳細講。
識人第四步，內涵
講完咁多外在野，係時候講內在，而內在永遠都係排係最後亦係最重要既野，好多人初初睇就得，識落就覺得垃圾既吹水怪，提升內在，先可以得到人認同，先可以獲人賞識同尊重。
內涵分兩大類，一，專業類；二，泛用類。專業類係指你對你既工作、行業有幾深認識，呢種就睇你有幾重視你份工，亦係你工作表現相關；泛用類包好多，琴棋書畫、嫖賭飲吹、吃喝玩樂、時局政治、宗科哲史等等，識愈多識好，因為你識得識多就對愈多人有話題，唔需要好深入識，知知地，有研究，有玩過就得，切忌扮專家，講術語，又或者太主觀，記住，你係識人，唔係要證明自己高大上。
關於增值內涵之後會再詳述。
識人第五步，主動
主動，係最重要既，如果你連呢點都做唔到，上面幾點你都唔會有開始，唔好怕羞，亦唔好諗太多。
你好，我叫九叔，我想認識下你，唔知點稱呼你好？
巴打絲打們，我踏出左第一步，你地呢？
歡迎從以下途徑認識一個新朋友，亦即係我。
明天再見
TG: Gornine911
FB: https://www.facebook.com/uncleninehappiness
