第一次入戲院睇龍珠劇場版。
一如外間評語(香港上畫算遲),今次喺打鬥方面真係落足功夫,有一段仔仲用第一身視點,龍珠嚟講非常新鮮!重啟+正史版嘅布洛尼同舊版截然不同,多咗好多人性刻劃,唔再單純係一隻淨係識嗌「格古洛」然後失控暴走嘅野獸,就連身上件毛皮都有佢故事,非常討好。
講開劇情,又係另一驚喜之處。除咗好多經典角色粉墨登場,仲將鳥山明嘅《銀河巡警Jaco》裡面講悟空老豆一段原原本本搬上銀幕,雖然咁樣意味住將舊版型到爆嘅悟空老豆正式打入黑歷史,但家陣呢個富有人情味嘅異類撒亞人,其實都好有特色。
一套打鬥交足貨、劇情有驚喜、甚至笑位都真係笑得出嘅龍珠,仲有咩好挑剔?最重要係我最鍾意嘅角色 —— 比達,今次總算唔係負責出醜嚟襯托悟空,加爆分!唯一真係要彈係有幾幕嘅作畫明顯崩咗,崩到我懷疑係咪特登向電視版曲線致敬。另外係今次嘅打鬥應該幾值得同適合睇IMAX3D版,奈何香港冇。