[新手][ 愛情][排球]那天成為女之後，我的人生不再一樣

比你發現左重點

出文啦樓主

暫定星期四晚

各位 個google drive又白痴 今晚出唔到 要睇既 可以上紙言

正 排球人表示路過

50. 與Eva的討論

我返到屋企之後，我就拿拿聲去左沖涼，一邊沖一邊就係度諗岩先見到既野，究竟點解會咁？我一係諗極都諗唔明，當時我見Antonia佢好唔開心咁講自己既經歷，咁不堪既經歷佢都願意同我分享，佢唔係當左我係朋友，佢先會咁樣講我知架咩？……

啪啪啪…敲門聲打破我既思緒

「咩呀？」我問

「呀女，你冇咩野嘛？」呀媽問

「冇呀。做咩呀？」我問

「冇，見你沖咁耐，睇下你搞掂未姐。」呀媽講

「得啦，出黎喇。」我講，講畢我就閂左水喉，拎起毛巾抹乾身著好衫就行左出去。

「做咩沖咁耐既？」一出到去呀媽就問

「冇呀，咁……舒服嘛。」我講

「唉，你咁我要交好多水費架，講左你好多次架啦。」呀媽苦口婆心咁講

「係啦，下次唔會啦。」我講

「下次下次，成日都咁講，下次係先好呀你。」呀媽沒氣咁講

「係啦，我入房先啦。」我講完就行左入房

我拎住部電話，跟手就攤左落床上面，我一面係度碌手機，一面係個Whatsapp介面係度望，發覺其實成個list入面，真係冇一個可以講到心事，本身可以講心事既又比我激走左，以為可以講心事既又原來可能係害我既……..碌碌下，比我見到一個人名，係我幫原先依個身體既宿主去化解左同佢之間既事果一位女仔──Eva。

我打開左同佢既Whatsapp chatroom，我輸入完，但又del返，我自己都係度諗緊好唔好同佢講……但係依個時候，我除左佢就冇其他人可以傾訴，雖然話Michael應該係一個唔錯既傾訴對象，但日子其實尚淺，老實講，我都唔太敢同佢講咁多野住。

最後我都係決定問下Eva既睇法先。

我：Eva？

Eva：做咩呢呀潔？

我：冇呀，想搵你傾下計之嘛，唔得咩？

Eva：得，呀潔喎，哈哈，點解唔得呢，我親愛既呀潔。

我：頂你唔好咁gay啦。

Eva：下？Gay咩呀，你係唔係依排痴得男仔堆多，學埋Ｄ男仔野呀？

我：下，唔係呀哈哈，講下笑嘛。（我心諗，我本身係仔，緊係講gay啦，唔通有仔黎gay你你會講「喂，唔好咁les啦」咁咩，雖然冇人黎gay我）

Eva：哈哈，知喇，咩事呀？

我：冇，有件事，想問下你既睇法

Eva：你講啦

我：你……得唔得閒？不如出黎傾？

Eva：都可以呀。不如去食個糖水傾？

我：好呀，有冇邊間好介紹？

Eva：虹橋岩唔岩？

我：都可以，咁……十點半等？

Eva：好，一陣見

我：一陣見

咁之後我就起身，換返件衫，都係一般既衣著，T一件，短牛一件，波鞋一對咁，咩多個袋就出發。

落到樓下，等左兩個字輕鐵就去到澤豐輕鐵站，之後問完Eva係邊等之後，就去左目的地等佢。冇耐佢都黎到，佢就帶左我去一間糖水鋪之後就坐低左，我地叫完野食之後，Eva就開始開我

「做咩呀？你有咩心事咁呢？」

「我呢……」我將Antonia有心事，到佢話要加以利用男，收兵等等既事，去到見到Antonia同Joe係儲物室行出黎既事，都講左比Eva知，但當然，我就冇講Antonia既過去。

「唔……拿，依我所見呢，Antonia同Joe佢地兩個一定有Ｄ野，但佢地同你條事有冇關係呢，我唔敢講，可能咁岩撞到都唔出奇架，或者咁岩是旦一方搵大家都有機會，其實佢地本身好似係識架嘛，不過，都唔可以排除你既諗法既我係咁睇囉。」Eva講

……

「兩個ＸＸＸＸ窩夫。」職員講完就遞左過黎

「食野先啦。」Eva講

「嗯……」我講

「不過，老實講，我都覺得似係同佢地有關，真心講一句，我都唔覺呀Joe 佢有咁大既威力，但如果你話係Antonia都有份歌頌你既，說話又唔係咁講。」Eva講

「但又有個問題，如果真係Antonia有份唱我既，咁理應Ｄ人都會講係Antonia，或者你既好朋友都係咁睇我，但佢地只係一味講我點點點，咩收兵公廁娘娘，但又冇提過邊個講。」我問

「咁佢唔方便出面既，佢搵多幾個朋友幫手，效果都差唔多。」一把女聲講

我同Eva都同時望去把女聲度

「哈哈，唔好意思呀，咁岩聽到你地講野姐。」職員姐姐講

「姐係…..？」我問

「拿，好簡單姐，據你所講咁，果位Antonia其實就係你識既，所以佢係唔方便出面講，但如果佢利用佢既朋友係度唱你既，你覺得會唔會可行？而佢既朋友係你唔識既人，咁就好方便啦，或者Antonia將一件你既事，加小小鹽同醋就同佢地既朋友講，咁唱你既就唔係出自果位Antonia把口，你地又點睇？」職員姐姐講

「點解你會咁諗既？」Eva問

「哈哈，我之前讀中學既時候都有聽過類似既方法去唱自己既朋友囉。我唔知佢地本身有咩仇口，搞到要去唱人啦，但呢，你地係女仔都明白，女仔同女仔之間既果隻角力，係男仔唔會明架嘛。表面上其實大家好好朋友，但其實可能大家都唔係咁妥大家，或者是旦一方唔妥另一方咁。」職員姐姐講

「咁又係既……」Eva講，我心諗，我都真係唔知原來係咁複雜

「所以呢，要搵到一個真係好好既朋友係唔容易架。但不過岩先都係我既睇法姐。」職員姐姐講

「唔該你呀，我地會試下係依個方向去睇下。」我講

「哈哈，唔洗客氣喎。我去做野先。」職員姐姐笑住講，講完就去左執枱

「你點睇呀，呀潔？」Eva問

「似乎果位姐姐既睇法，都唔係話冇佢既道理，都有機會係咁。」我講

「咁你想點做呀？」Eva問

「可唔可以幫我查下？」我問

「可以，呀潔其實你係一個好人黎，我咁樣你仲肯原諒我，我相信你都唔會係衰人啦。」Eva愈講愈眼紅紅

「係啦，唔洗講到喊曬既。」我講

「知啦，都夜喇，埋單囉，聽日再講？」Eva問

「好呀。唔該埋單。」我講

「係！黎喇。」職員姐姐講完就過黎

「多謝你地102蚊啦。」職員姐姐講

「咦，咩唔係……」我未講完，職員姐姐將食指輕輕禁住我個嘴，再講

「以後多Ｄ黎食咪得囉。」講完，職員姐姐單一單眼，其實果位職員姐姐個樣都幾純，身材….夠用囉，但比人感覺真係…..GFable

我同Eva比完錢之後就解散，咁我就行去車站搭車返去。

慢慢睇 依篇變左周記因為我都唔係成日寫到

雙週記都黎緊

明顯就係月刊黎

唔好意思啦 真係忙先咁 之前一開都keep到

下次幾時更新

預下星期四 準備考試

今晚有文

G持

51.Eva的看法

返到去之後，我就再沖一沖個身先，沖身果時我都係度諗返岩岩先果位姐姐講既野，本身係男既我，朋友都唔多個，更何況話識得多人，但最起碼我身邊對我既，就算最差都係好似唔理我，又冇話點。相反，原來做女既，係會明爭暗鬥，我真係好唔慣會咁，原來十幾歲既女仔，已經係咁虛偽，真係個女話中意你，我都唔知真唔真，正如Ｄ女收兵咁，口口聲聲話對你好有感覺，但到頭來都只係一個收兵既藉口。

我沖完出黎之後，吹一吹返個頭，因為沖涼時係總會彈到小小水去後頸對上既頭髮度，吹返好之後就攤上床上面，拎住手機望，我一望就見到Michael既一個Whatsapp

Michael：呀潔，唔好太夜訓呀，早抖喇

我：你咁夜先訓架咩？

等左一陣之後Michael都冇應我，我諗佢應該都訓左。然後我部電話震左一震，原來Eva搵我

Eva：呀潔，訓未呀？

我：差唔多喇，做咩呀？

Eva：你驚唔驚我會好似頭先果位姐姐咁？

我：做咩咁問既？（我心諗，其實都小小驚，反而其實我最信既係Ada，但可惜係自己激走左人。但同得你講，唔多唔小都信你既。）

Eva：冇，因為其實果位姐姐都講得岩架，而且我以前又咁對過你……

我：你點對過我呀？

Eva：Patrick呢……

我：Patrick單野姐，算啦，我之前都話算啦，其實如果佢係咁既人，咪由佢囉，好姊妹唔怕多，但賤男，一個都嫌多啦！

Eva：哈哈，呀潔你真係冇變，講野都仲係咁有趣，而且又冇架子，又靚女身材又好，人靚聲甜，難怪吸引到我地學校所有男既都想追到你啦哈哈。果時你比Patrick追到，個個都勁失望，因為佢地都心諗女神要封盤哈哈。

我：下，講到咁誇張呀，但你想同我講依樣？

Eva：咦，呀潔你真係好醒既姐。

我：哈哈，係人都估到你有野想講啦，但我又唔覺得你想講岩先果樣野。

Eva：係呀，其實呢，我有樣野想同你講架，但你又未必岩聽。

我：做咩呀？

Eva：其實我好似曾經見過Michael係街度攬女。

我：所以呢？應該係之前既事？

Eva：唔係，只係早幾日。

我：……

Eva：我知你未必想聽，但我諗左諗，因為我見依排你同Michael都好似好friend咁，所以提一提你姐，我驚佢呃你。

我：係……

Eva：總之小心Ｄ佢，唔好信曬佢，不過我諗佢都幾中意你，佢既賣點又真係才華同好仔，但佢係街攬女真係…….但可能我睇錯啦。

我：但Ｄ人話女既直覺好準架喎，你覺得你既直覺係點？

Eva：你講到你唔係女咁，但女黎講你既直覺似乎都幾唔準下，哈哈

我：下？點解喎

Eva：Patrick單野……

我：下，咁我可能覺得佢幾好先揀佢呢。

Eva：唔知你啦，最清楚果個係你自己，但不過真心講一句，唔好咁容易就信一個人呀。

我：咁你呢？

Eva：玩野呀？

我：哈哈，玩下姐，知喇。

Eva：不過老實講，以你咁估，就咁睇既話我又唔覺Michael會呃你既，但都係小心為上啦，至於Antonia既事，我諗我要小小時間先幫到你，我可以拎返個人情。

我：下？咁好似唔係太好喎，要你為我咁拎返個人情

Eva：唔緊要，其實都係Patrick既Friend想識Antonia，咁我都係咁樣比左個電話佢，但其實Antonia都唔介意有幾多人有佢個電話架啦，就算知係我比既都唔緊要既，咁可以到時有需要既時候，好好加以利用依個人情嘛，哈哈，依加就係依個時候喇。（我一直係度心諗：岩岩佢果句，好好利用依個人情，睇黎，好好利用依個動作，套用係唔同人身上有唔同既效果，我明顯就係一個唔識用既人啦）

我：咁……多謝你先喇，但你係唔係還人情比我架咋，哼！

Eva：下，你諗太多喇，朋友要互相幫助嘛，更何況呀潔你依加咁樣，又信我，小小人情，又有咩所謂，知己難求呀，哈哈，講出黎我自己都打個冷震，又成個男仔咁又好老土咁。

我：多謝你

Eva：傻啦，希望幫到你啦。

我：希望可以快Ｄ知啦。

Eva：我諗Antonia果邊都好快知，如果真係好似果個姐姐咁講既話，我諗佢果邊既所謂朋友都係冇真係友情架喇，都係互相利用架姐；反而依加係諗緊Michael果邊，一黎Michael果邊佢識既人小，難埋到身，二黎我咁耐以黎都係見過Michael一次，仲要唔知係唔係真係見到，就係攬女果次，所以Michael你自己都要小心，我會幫你搵人留意下佢

我：我諗Michael應該冇野掛……

Eva：唔好咁信人先呀呀潔，你諗下，佢又會係係依排先走返出黎同你食野，我怕佢有份參與其中，你就當係我直覺啦。

我：好啦好啦，我會小心架喇，但始終Michael佢都對我好既……

Eva：小心啦，唔好咁快獻出所有野呀！！唔好做第二個我呀

我：知啦，多謝你。

Eva：唔洗客氣啦，不過你依排都要好似都要陪住Michael先，始終都係我諗佢有問題姐。

我：知架喇，總之，好多謝你呀Eva。我係男既，我一定比你引死了。

Eva：哈哈，講埋Ｄ冇可能既野。

我：咁又係，哈哈，訓喇，你都早Ｄ抖下喇。

Eva：好啦，早抖喇。等「好」消息啦。

我：好啦，咁我等你「好」消息喇。

Eva：早抖呀潔。

我：早抖Eva。

樓主加油 我一日追曬🤪

Michael 一定有問題啦

點解會咁覺？你又係Eva?

擺明想食女啦 扮乜做friend

lm

哈哈 睇埋落去先

文?

月刊黎 等下啦

月更

都係星期四晚有文