[新手][ 愛情][排球]那天成為女之後，我的人生不再一樣

37.爭風呷醋

我離開左之後，我係返屋企既路途上都一直諗住頭先Professor Lai 講既野，諗諗下就好快就返到，就攤左係張床度，攤左無耐電話就響起

我：喂～

女聲：呀潔，打唔打波呀？我地都到齊喇

我：Ada？！好似都好晏喇喎，下星期先啦

Ada：黎啦，都唔係打左好耐，黎猜幾球咁啦

我：好啦，咁我依加換衫過黎啦

Ada：都係老地方見啦

我：ＯＫ，一陣見啦，bye

Ada：Bye

收左線之後我就走左去換衫，都係簡簡單單咁，著住件運動衫，之後就著返件簿褸，一件打波既短褲咁，加埋對波鞋就出門口。老實講我依加都覺得我做女都做得幾HEA，點解咁講。

其實做左一排女之後，我開始覺得係有一Ｄ做男時唔會遇到既問題，就似黎Ｍ呀，去廁所等等既問題，另外仲有長髮啦，儀容啦等等。

先講廁所既問題，眾所周知，女廁排隊時間長度係嚇到個鼻Ｄ肉縮完生返再縮過，點解？我依加可以話你知，好地地既一個廁所，屎尿屁係可以齊曬，呀！講錯，屎尿血先岩，作為男時覺得地下有尿，對男時既我黎講就好似打boss咁，如果咁都係boss，我諗果隻只係一隻十少辣既boss，女廁果隻，一定係特辣大boss！重點係邊？就好似你見到有人係個廁格出黎，當你見到有一道曙光出現時滿心歡喜咁入去，點知係海市蜃神咁，一切都係幻象……唔好意思，講得太誇張，簡單講就係果格比人用完等同廢左咁，用下就小一格，用下又小多格，咁十格廁所用用下冇咁幾格，咁速度自然大大下降啦，其次係就算用得既廁格，都唔係乾淨得去邊，一係你就鋪紙去，一係你就無影凳，三選一…..第三個選擇就當然係唔去！所以點解咁耐，係有原因既。

然後去返大家都知既野，長髮！其實無論男女都好，基本上都會有頭髮，差在係長短問題既姐，咁以男為例，當你剪完頭髮果下，短短既頭髮係你每次沖洗完之後，吹一吹，幾分鐘咩都乾，比你長Ｄ喇，其實正常男既頭髮長度，兩個字時間咩都改；相反作為女，基本上短極既係及肩短髮，好小剪到男咁既長度，以及肩短髮同長髮為例，及肩短髮吹乾既時間其實都比男既長，更遑論長髮，所以洗頭係一樣好煩既事。再加上大風吹，吹到亂曬，又要梳返好，加上返學紮辮，雖則熟能生巧，但都係要用時間去準備，都咪話唔煩。

另外化妝，皮膚，衣著等等既問題又係一門學問，我再講就真係變左說明文架喇。

所以話，唔好睇到做女好好咁，其實背後用左幾多時間，唔係做女既人，又點會咁容易體會到？點解會話我自己做得HEA，老實講，雖然Antonia叫我學下化妝，我都有試過，但又好似做唔到人地咁好，或者我技術未夠啦……至於衣著，我都係懶得襯，見幾好睇，著完上身過到自己就算，所以你話HEA唔HEA，我覺係好撚HEA！

講左一大輪，返返黎現實，咁我都出門口喇，一如以往咁就搭車去到果個球場打波。今日都冇咩特別，又係同Antonia佢地打下波咁，加上Andrew佢地都冇黎，所以今日都係得我地依一堆女係度打。

打完返到屋企，沖個涼食飯，好快又過左一日，其實做左女之後日子都算易過，除左一開始比較難適應，但到適應左之後又其實冇咩野既，或者做左靚女多左人錫，所以覺得做女都唔係一件壞事呀，嘻嘻。

之後話咁快又星期一，咁返到學之後，都係咁過啦，去到上chem堂時，咁Aaron同Joe佢地選修都係揀左chem，所以都係一齊上堂啦。

老師：拿，ＸＸＸＸＸＸ，做enthalpy change既題目呢ＸＸＸＸＸＸＸ，計左formationＸＸＸＸＸｘ

咁老師係度教，我地有我地吹水，係久唔久聽下佢講咩咁，因為個topic未算太難，所以都係hea 聽下先，突然…..

「係呢呀潔，講起我地早兩日去睇果套那些年，身邊都好多人睇左，佢地都話好好睇。」Aaron講

「都ＯＫ啦，佢好似本身係本書嘛。」我講，講完之後我都順勢望返Joe一眼

「係呀，我都聽到有Ｄ女仔都係睇左幾次，你會唔會呀？」Aaron問。我果下真係心諗你咁問咩用意

「咩話？！伍潔瑤！你同曾世朗睇左唔同我睇？！」Joe大叫

（補一補充，Aaron叫曾世朗，而我地上堂坐位如下，而我地就係一枱三至四人坐，咁Aaron，我同Joe其實都係坐附近，所以Joe聽到我同Aaron講野係唔出奇）

　　　　　　　　黑板
　長枱１　　　　長枱２　　　　長枱３
　長枱４　　　　長枱５　　　　長枱６
　長枱７　　　　長枱８　　　　長枱９
　長枱１０　　　長枱１１　　　長枱１２

因為Joe大叫，全場都望住左佢同我，chem老師直頭係呆左咁企左係度

「陳祖康你係度發咩癲呀？」Aaron講（陳祖康係Joe）

「你就發癲呀！」Joe對住Aaron講，然後再望住我

「伍潔瑤，點解你同佢睇而唔同我睇！？」Joe問

「下…..都話我咁岩有野做嘛….」我講

「做做做！有咩做呀？同曾世朗去睇，睇完做愛呀？八婆！」Joe一邊講一邊行過黎我度

「冇…冇呀，你諗左去邊呀！」我講，唔知點解依刻我心虛，佢一邊行黎我一邊後退

「八婆！！！」Joe行到黎，一手抽住我套校裙領

「喂喂喂！！」全班係度叫

「放開你隻臭手呀陳祖康！」Aaron一拳打左落去Joe塊面度

Joe「呀」一聲就鬆開手，後退兩步，左手掩面，怒視Aaron咁講；「打我？！」

然後Joe就衝向Aaron，一拳向住Aaron既面揮過去，Aaron因為Joe突如其來既一拳，反應唔切就硬食左，Aaron左手掩住面，大叫「屌你食屎啦！」就再衝去Joe度，兩個係度互相毆鬥，依個時候既我被佢地兩個嚇到定左型，只係望住佢兩個因為我而係度打架。

過左一兩分鐘之後幾個訓導都上到黎，將佢地兩個拉開之後，其中一個訓導大聲問

「你地兩個做咩？！」

「冇…」Aaron同Joe同時講

「冇？冇你兩個又會打架？」訓導大聲問

「冇…」Aaron同Joe同時講

「你兩個當我傻架？冇野又點會打架？你兩個跟我落黎！」訓導大聲講

「係…」Aaron同Joe都垂頭講

「呀陳Sir，果邊位女同學都同件事有關，你帶埋佢落去。」Chem老師咁樣講,果下我真係心諗D老師真係食開屎，係都要搞大件事

咁之後我可以點？咁當然係跟埋落去啦，費事又搞大件事啦。落到去，我地三個就分別一人坐係一個位度寫口供紙（姐係寫低頭先發生咩事）。老實講，的而且確件事都因我而起，但係件事上我係完全冇做過任何事，我只係因為自己既事而推左Joe既邀請就發生岩先件事……咁我冇理由寫「因為我某年某月某日由男變女，所以我昨天因為要找尋變回男既方法，推掉跟陳祖康我約會而令他和曾世朗打起架上來」咁咩，真係唔比學校報驚捉我去驗驗，都比學校捉我去青山度由正常醫到我痴線啦。

「伍潔瑤，你仲係度托頭？依加叫你寫返發生左咩事呀，我一陣就問左你先！」訓導陳sir拍住枱咁講

之後訓導陳sir就行左去Aaron同Joe果邊睇下佢地寫咩，咁我就托住右邊腮位，求其咁撩幾筆，無耐訓導陳sir又行返返黎

「我不知道。」訓導陳sir講

我望一望訓導陳sir

「你唔知？玩野呀？化學老師話你係知情架喎。」訓導陳sir再講

「下，我唔知情喎。」我講

「好，我就睇埋佢地點寫。」訓導陳sir講

之後訓導陳sir睇完，Aaron就寫因為Joe佢想打我而出手，而Joe就寫我同Aaron玩佢而出手，咁之後訓導陳sir就拎住佢地寫既野，召左我入一間房仔問

「依加陳祖康指證你玩佢而出手喎，你做過咩黎？」訓導陳sir問

「下，咁依個係佢片面之詞姐，但佢出手係事實，你拎住佢單方面既野黎質問我？你冇野呀嘛？」我不忿地道，老實講我由入黎依間中學到依加，作為男時既我都對依間既訓導執法方法極之反感，因為佢地其實查到查唔到，都係會話你有問題而請你食返幾張黃紙，所以其實基本上解釋黎都係廢。

「你依加咩態度呀？」訓導陳sir拍枱問，我心諗你唔係諗住咁樣嚇到我掛？但唔知係唔係變左女，我又真係比佢嚇左嚇…

「陳sir，我都係有果句講果句姐。」我講，講完之後我向後挨，雙手「橋」住再頭望左邊，仲細細聲哼左聲

「依加有人指你係挑起依件事既人呀！你認唔認」訓導陳sir邊講，邊用食指對住張枱係度督

「係咩？咁佢地係咁寫咩？」我問

「老實講丫，反正以你地做事既作風，有罪無罪，通通有罪；有事無事，屈到有事，我講咩，你地都聽唔入耳。」我講完就擰擰頭，唉一聲

「你….你….你講咩呀？！」訓導陳sir拍曬枱問

「我要講既都講左，信唔信都係你既事。總之都係果句，我唔知佢無啦啦因咩事而打人。」我講

「……」訓導陳sir冇聲出

「如果冇咩事呢，我想繼續上堂，行先。」我講完就起身推門走，訓導陳sir叫我都叫唔切

而Aaron同Joe見我係房度行出黎，再望去訓導陳sir個Ｏ嘴樣都好似好驚訝咁，我就冇理佢地，逕自返上去上堂。

Sorry呀 要你久等

型！

依幕其實寫緊我中學

其實唔知有冇其他巴絲都係讀區內所謂既好中學 唔知點解通常總有咁既制度同老師

38.謠言

返到上去課室之後，班上部份人已經係用厭惡既眼光望住我，講緊既係有男有女，而且係連個老師都係以不屑既眼光望左我一眼之後講

「同學你返埋位，唔好再阻礙其他人上堂。」

我望一望佢，之後行埋去位坐低時，我望到果一Ｄ同學既眼光，其實真係一Ｄ都唔好受，佢地既冷眼，覺得我係罪魁禍首咁，真係無言……到我坐低左之後，我望向Ada同Bianca佢地果邊，佢好似都尷尷尬尬咁望左我一眼之後就望返去前面既黑板度繼續上堂。

完左堂chem堂之後，咁就會行返返去班房度放低野就去吹下水，去個廁所咁。咁行到返去放低野之後……

「佢地做咩會打起上黎既？」Ada問

「下？」我講

「問你佢地又會突然打起上黎既？咩同佢唔同我咩咁……你搞咩呀？」Ada再追問

之後我講左同佢地出街睇戲同埋因為搵professor Lai既事，但就冇講Antonia叫我學收兵既事比Ada聽。

「咁你又會同佢地出街既？」Ada瞇起對眼望住我問。心諗，Oh shit！！！！點解釋好呢…….

「咁….咁….」我口窒窒咁講

「咁咩呀….？」Ada繼續瞇起對眼望住我問。依加個情況有Ｄ似就係Ada一邊問，一邊面向住我烏低身質問我，而且就流曬冷汗咁向後彎腰扮曬無野咁。

「做咩你好似審犯咁審？」我一下企直個身問

「冇，見佢地講到同你有關咁。」Ada講

「其實就係同佢地都係朋友，睇場戲姐。」我解釋

「唉，呀潔，你又唔係唔知….」Ada

「我知呀，佢地對我有意思嘛！」我講

「係囉，你知仲…….」Ada

「唉，都係諗住friend底咁出去睇場戲，點知會搞成咁丫….」我講

「總之…你小心Ｄ啦，除非你真係咁想收兵，唔係呢，最好避嫌啦。」Ada講

「知啦。」我拍拍Ada膊頭講

之後同班比較friend既都有黎問下我發生咩事咁，但因為又唔係真係好friend果隻，所以都話「有誤會掛」打圓場算，而真係friend既都同返佢地講話Aaron同Joe係約左我睇戲，但因為屋企有事而去唔到同Joe睇，最後到今日發生咁既事。

好快就小息完，黎緊既係中文堂，中文堂都係聽個老師老吹下課文，扭曲下作者原本意思又一堂。係上上下中文堂時，Aaron同Joe都不約而同咁上返返黎。而佢地上返返黎既樣都係除左死老母之外，當佢地互相對望時，都係報以仇恨既目光。而係中文堂既尾聲時，訓導陳sir就再上黎叩叩門

「呀….Miss Chan唔好意思，想搵一搵個同學。」訓導陳sir講

「哦，好呀。」Miss Chan講

「伍潔瑤，你出一出黎。」訓導陳sir叫我

然後全班都望住我，咁我都咁樣比人叫到，都要就咁行出去啦。然後就跟住訓導陳sir行落去，佢又一言不發咁，老實講都有小小不寒而慄。之後佢帶我去到頭先間房仔度

「坐。」訓導陳sir講

咁我就依佢既說話，坐低左再應對啦。

「頭先我分別同佢地兩個傾過下，聽聞你既威力都幾大下喎。」訓導陳sir講，我一聽就知佢似乎知道Ｄ野咁，但幾多……就真係唔知

「唔明你講咩。」我扮傻咁講

「唔好當我傻架啦，我已經對件事一清二楚啦。」訓導陳sir講

「咩係咩？咁件事來龍去脈係點？你點睇？想點罰我？我錯咩？」我問

「依加唔係你問我，係我問你野！你憑咩咁問我野？下？」訓導陳sir講

「So？！你咩身份咁尊貴呀？腦細呀？你打工咋呀陳生，你當你咩呀？判官呀？咪玩啦，你又冇證冇據，單憑一兩個人既說話而去判斷一個人有冇問題，我諗有問題既唔係你覺得有問題果個人囉！有冇聽過，耳聽三分假，眼見未為真呀？咁中意執法，做警察啦。」我愈講愈激動

「你咁樣叫唔尊師重道，同時亦都唔肯合作，你要為你既行為付上責任。伍同學，你可以上返去。」訓導陳sir講

咁我就冇理佢，自己返返去班房。到我行到上去行入班房既時候，全部人靜左咁，望住我竊竊私語，我就心諗咩事呀。到我行返埋位坐低，然後Antonia就行左入黎搵我

「喂呀潔，你既事…依加好似成form都知喇喎。」Antonia講

「下？姐係咩？」我問

「你同Joe既事囉，Ｄ人講你同佢本身有Ｄ野，然後因為Aaron而撇甩佢。」Antonia講

「邊有呀，你知架……」我無奈咁講

「我知……總之你小心Ｄ謠言啦。」Antonia講

「知喇，Thank you。」我講

我望住Antonia既背影慢慢移去班房門口，繼而消失，我再環望四周既同學，佢地個樣係好似鄙視緊我咁，比起頭先係chem lab上堂既同學既眼光有過之而無不及。

開始啦開始啦

有一排冇睇, 一睇有咁多文, 正呀

講明會再出嘛 一定算數

咁就有人信喇咩

終於有交

唔係點先信

校花同邊個一齊基本上起碼全級都知，邊有可能突然爆出黎仲要轉埋手

我再睇睇先

39.極權學校？

既然Ｄ人都咁樣，我都唯有接受住先，上埋堂先。咁之後我就繼續上堂，好快就放lunch。依舊都係同Ada佢地一齊食，咁今次食飯，佢地既話題就係我既事。

「呀潔，其實今日發生咩事？」Carrie問

「下，其實咪就係佢地打交囉。」我講

「聽聞你同Joe有Ｄ野，然後因為Aaron既介入而撇甩佢喎。」Carrie問

「咁你覺得係唔係咁呀？」我問

「咁又唔係，識你咁耐，你都唔會係依Ｄ人，但又好好奇佢地點解會打起上黎，而又做咩佢地打起上黎時你又會比人咁樣傳你。」Carrie問

「我唔介意同你地講….」我講

「講…..？」佢地異口同聲問

「做咩姐，我同佢地冇野架，我想講係見friend咪一齊去睇下戲咁姐。」我講

「車！…」佢地都好齊咁講

「但真係冇野？佢地又會打起上黎？」Carrie問

「其實佢地約我睇戲既，咁我星期六就同左Aaron睇左，之後我星期日咁岩有事去唔到，但咁岩Joe又約我星期日嘛，咪推左Joe囉。跟住岩先Aaron又講起，咁Joe聽到咪扯曬火囉，但我又唔明，我又唔係佢邊個，佢做咩咁，唉。」我講

「咁係因為佢兩個都對你有野嘛！」佢地齊聲講

「你又唔係唔知你同Antonia兩個拍得住，兩個都咁正，大把人都為左你兩個爭崩頭架啦，但Antonia就收兵咁，所以都有一堆灰鳩既兵走去你既陣營架嘛。」Carrie講

「車，但我對佢地冇興趣！」我講

「咁咪再搵囉！簡單！」Carrie講

「食野啦，凍喇。」我講

咁我地有傾有講，食完餐飯返到上去自己果form果層之後，發現好多人都望住我地，應該話係望住我，雖然平時都有人望下我，但今日….都唔知係佢地真係有Ｄ野，定還是我心理影響…

返到入班房坐低之後，有個男同學既行左埋黎

「Katrina，同Aaron玩得爽唔爽呀？」男同學問

「咩呀……？」我疑惑咁問

「有冇興趣打返場Friendly咁呀？」男同學笑笑口問

「你打波既咩？你講緊咩呀？」我疑惑咁問

「哈哈，你都幾識扮架喎。」男同學笑住講

「我今晚屋企冇人，不如上黎一齊玩啦。」佢係我耳邊講

「痴線！」我嬲嬲地，一下推開佢講

「車！慾女扮玉女，全世界都知你同Joe同埋Aaron都做過架啦，仲要話人地搞到你好爽，扮曬純情，你之前都仲同過好多人搞啦，怕咩，唔差在多我一個啦。你之前都係當個何梓峰係水魚姐，你都係背住佢同其他人搞，搞到何梓峰發現左而飛你啦。」個男同學講

「下？！你講咩呀！」我拍左下枱大喝，然後全場靜左

「伍同學你做咩破壞公物！？」訓導陳sir大喝

「邊有呀！」我講

「我望住，你同我出黎！」訓導陳sir大喝，但怒火遮眼既我又點會聽佢講

「點解呀！？」我大叫

「出！黎！」訓導陳sir大喝

「你出出去先啦，唔好將件事搞僵先。」Ada係我身邊細細聲講，我果下先有返小小意識諗到自己岩先係失左常性咁

咁訓導陳sir咁講，我就行左出去門口位望住佢

「企直！」訓導陳sir大喝

「你有咩事，要講就快。」我講

「哼！破壞公物，我一陣再處分你。依度係你需要為剛才既行為付上責任，拎返去比家長簽好，聽日交。」訓導陳sir講完係背後拎左張紙出黎

我接過張紙一望


敬啟者
因學生　伍潔瑤在校內犯以下事項
1. 不尊師重道
2. 未合作提供事件真相
3. 侮辱師長
4. 妨礙他人學習
就此，本校僅此知會，學生　伍潔瑤被記小過１次，缺點２次。

　祝
台安


我一望，我講

「車，欲加之罪。」

然後擰橫張黃紙，「嚓～」一聲，張黃紙就分開兩邊，然後我撕左幾次，一下將張黃紙拋入垃圾筒，我再講

「你慳Ｄ啦，咁樣老砌我，講事實又唔喜歡，你中意既咪係咁出比我囉，我唔care，但你出之前，你問下自己知唔知自己做緊咩先啦，你咁中意派黃紙，依加就比個機會你出一張比我，教！畜！」

依一刻全場靜左，連訓導陳sir都Ｏ左嘴咁望住左我，最後我再講

「缺點唔係唔比你記，你記得黎，都要記到人心服口服先得架，一味老砌學生，有佣分咩？何必將自己放係咁高既位置呀，人地係做錯時你派缺點，人都條氣都順Ｄ啦下話。總之你要記就記飽佢，我除左岩先教畜果句之後，其他一律都唔會承應，講完！」

邊個位爆出黎轉埋手？唔太明 定我打打下有bug我諗唔到 求指正

你同Joe既事囉，Ｄ人講你同佢本身有Ｄ野，然後因為Aaron而撇甩佢

加油！名已留！

大概知你講咩 就係d人見Joe咁樣講 咪比人傳主角同Aaron佢地兩個囉 中學既野 你又唔係唔知

40.聰明的Ada

「依件事我再商議，你岩先侮辱師長既事，你一陣就會收到處分。」訓導陳sir講完就走左

當所有學生見到訓導陳sir行開左之後，全班所有學生都好hyper咁衝過黎圍住我…..就假。

好，認真返，當所有學生見到訓導陳sir行開左之後，全班所有學生都好似好厭惡我，仲隱約聽到Ｄ人講「咁都得」，「頂撞訓導」，「垃圾班先會出既人」，「偽女神」咁上下。情況就好似「女皇的教室」咁，本身學生想搞班主任，而班主任逐個擊破之後，當女主角想叫同學團結，冇人理佢，再用好怨恨既眼神望住佢咁無異。

咁我見群情洶湧，都打算行出課室，但就咁岩打鐘準備上今日最尾兩堂，咁就唯有行返埋位啦。坐低時我望望Ada同Biancaｍ，都好好彩，佢地放隻手係我大脾，拍拍我大脾，就好似同我講，仲有我地咁，係依個時候我更加覺得有朋友真係好好。

之後果兩堂都冇咩事發生，咁我今日都冇咩心情留係學校打波，所以一放學就走左，Ada見我咁都同左我一齊走，今日我地一齊行既時候，我地都冇咩講野，一邊行一邊自顧自己周圍望下野就算，好快就行到去輕鐵站。

「呀潔。」Ada叫我

「？」我問

「其實你係唔係有野要同我講？」Ada問

「點解咁問？」我問

「你講啦，你當我係朋友既話。」Ada講

「咪同左你講佢地兩個都約左我睇那些年，之後我因為那些年而啟發左我有平行世界依個concept，咁咪去搵左professor Lai問下，點知食左白果。而去搵professor Lai果日，就係Joe約我去睇果一日，咁我因為要搵professor Lai而冇去到同佢睇。到今日岩先chem堂時因為Joe聽到Aaron問我星期六套那些年點而大打出手姐…」我講

「我知，但我想知既唔係依樣，係你點解會突然同佢地睇？」Ada問

「咪其實因為同佢地都係friend，咁同佢去睇下戲都應該無妨既，咪出左去囉。」我講

「我覺得唔係咁簡單既，老實講，我識你唔耐，但你知唔知你自己由原先似個男，到開始女性化，到依加同原先既呀潔都無異，當然除左係你講野用詞同呀潔有出入之外，行為性格上都好似。到有一日開始我發覺你好似驚驚地Ｄ男咁，你果排好小接觸Ｄ男，佢地搵你，你都縮下縮下咁，唔知你發生咩事，到最近你又好似好反常，又同男單獨出街，我真係想知你發生咩事。」Ada愈講愈激動，仲要揸到個拳頭實一實

「Ada…」我好擔心講

「你同我講啦！你既事…你之前都同我講你係男，點解依加發生左咩事你都唔肯同我講呀？」Ada講

「你想知……我點解果排好小接觸Ｄ男，佢地搵我，我都縮下縮下咁？」我問

「嗯…」Ada細細聲講

「好啦，我同你講啦，其實係早排發生既…就係有次我差Ｄ比一班人女女女左。」我講

「下？」Ada好驚訝咁講

「嗯，就係第一次去搵Professor Lai之後既事…」我握緊拳頭講

「咁點解你唔同我講？」Ada問

「對唔住，其實我真係好唔想提起。」我dup低頭講

「對…對唔住呀。」Ada都dup低頭講

然後我地又陷入dead air，當唔多落車時Ada又再問

「係呢，咁…你怕左男，但又會同Ｄ男出街？唔怕佢地好似果班人咁？」

果下心崽，頂，點解釋好？食得屎

「報復？」Ada再問

「……」我無出聲

「你唔出聲姐係係啦。」Ada講

「落車喇，到喇。」我講，講完就急急腳行出車。

「伍潔瑤！」Ada大聲叫

「做咩呀？……」我問，但同時係背住Ada，唔敢面向住佢

「你望住我呀！」Ada講，仲比我聽到Ｄ哽咽既聲音

「你…你…你做咩喎？」我講

「你望住我呀！」Ada再講，最後我因為聽到Ada咁傷心咁，我都擰轉頭望佢

「望左喇，做咩呀？…」我細細聲講，我望到Ada佢係度喊緊

「點解…點解你要報復呀？…」Ada問

「……」我無出聲

「答我呀！你係唔係學Antonia收兵玩人呀？」Ada再問

「你…你唔好理啦。」我講

「你明明一開始唔係咁架，你知比人玩係幾慘架，人地一番心機放係你身上，而最後只不過係你一隻既棋子，你覺得人地會點諗？對你對人都唔好呀！」Ada講

「明明你一開始係個好好人，點解你會變成咁…你收手啦，慘仲未係hurt到人，收手啦呀潔，好唔好呀？」Ada再問

「其實…Ada你做咩咁關心我？」我問

「下…？！你問左去邊，依加我問你呀！」Ada好激動咁講

「總之…你唔好理咁多啦。」我講

「我真係唔想望住我好朋友變壞呀！衰人！」Ada大叫

然後我聽到佢咁講，我就轉身走，然後係我臨行遠前我聽到

「唔準走呀呀潔…嗚嗚嗚。」

「你再走我就以後都唔再理你！」

最後我係轉彎前，擰一擰轉頭望左佢一眼，只見Ada好絕望咁住左係地下，雙手掩面喊。

係愛呀 哈利

突發 依期需要延後 因為公司事趕期 sorry各位