【為什麼所有人都無法單純的做自己呢】棟篤笑小說《波瀾》

香港人大多都是不會欣賞話劇的。這一點對於Peter這個見慣了大場面，還周遊過世界的前金牌經紀人同樣適用。緩慢的節奏，誇張的肢體動作，平實的劇情，感性的台詞，看慣了荷里活大電影的一般人哪能受得住，於是進場沒看十幾分鐘，Peter就在座位上睡著了。

醒來時話劇還在演，但進度不知道到哪了，倒是能感覺到旁邊兩個座位遠的大叔對自己一臉厭惡。Peter從胸袋拿出手帕將嘴角的口水擦掉，重新抖擻精神回到話劇的表現當中。

然後他發現，這種表演形式其實比他所想像的有趣味，但確實需要用心與集中去慢慢感受。

佐治叔曾跟他說過，進電影院的觀眾大致可分為兩種：一是進場只為輕鬆開心的，他們大多都是下了班、或是放假日陪女朋友家人什麼的出來輕鬆一下笑一下，能多不用腦就多不用腦，你跟他們說文藝說伏筆說劇情結構分鏡什麼的沒有任何意義；二是真的熱愛電影，希望能好好地、靜靜地感受電影院的氣氛，他們樂意去思考去解構電影裡的劇情發展、節奏、演技、思想、訊息，他們甚至還能寫出一篇導演看了都會滿頭問號的影評。

「無論係邊一個國家，第一種嘅永遠都會比第二種嘅多好多。曲高和寡係呢個世界上所有創作者都會面對嘅問題，身邊有好多年青嘅導演同編劇，佢哋每一日都喺度自我掙扎緊：究竟係要堅持自己嘅理想同風格啊，定係拋棄自我，直接融入呢個商業掛帥嘅社會環境？」

那時候佐治叔露出一臉無奈的微笑，攤開的雙手像是在跟Peter說，這是個亙古通今都一直困擾著那些人的不解難題。

謝幕的時候Peter特別留意著劉瑞峰的表情，那真摯的笑容彷彿已很久沒見，台下掌聲不斷，雖然自己欣賞能力不是太高，但Peter相信以這樣的氣氛看來應該是一場評價不錯的演出。他打了個電話，隨後靠關係進了後台，劉瑞峰在化妝間門前看見他的時候一臉驚訝，像是從沒想過會在這裡看見他一樣。

「咦羅生……」劉瑞峰是個身材高挑、皮膚白皙的俊男，所以除了話劇的演出以外，公司也為他接了不少平面模特的工作。Peter曾聽說過找他的模特兒公司不少，前途說什麼也比他在這裡打拼要好，要往影視界銜接的難度也更小，但他本人的意願是話劇優先於一切。

「做得幾好啊，我有買飛坐低睇。」Peter笑道，指了指房間裡面示意進去慢慢談。

「多謝，」劉瑞峰顯得有點受寵若驚，畢竟Peter是從來沒對話劇顯露過興趣的人。「不過又會咁突然嚟睇嘅？」

「我聽Victor話你哋近排發展得幾好，咁啱經過咪入嚟捧下場囉。」

「睇完有無咩意見？」劉瑞峰點點頭，笑著問道。

「意見真係講唔上，坦白講我好少接觸話劇，你都知架啦。」Peter笑著小聲答道。「多口問句，做話劇……覺得個發展空間點？」

「發展空間……？」劉瑞峰眨了眨眼，想了兩秒。「你係指……」

「就……發展囉，上電視又好，轉拍電影又好，去外國參加更大更出名嘅話劇團又好……我係純粹好奇想了解下，即係究竟一個話劇演員，佢嘅夢想同目標，或者係一條計劃好嘅路，會係點。」

「呢啲嘢……我諗應該因人而異嘅，」劉瑞峰搔了搔後腦，猶豫著笑了一聲。「我對拍電影電視劇嗰啲無咩興趣，我鍾意戲劇，但唔係影視嗰一type，我更享受喺舞臺上對住班觀眾，好即時咁將我嘅表演、情緒用呢種形式去表達畀佢哋，好似係台上台下一齊交流緊咁。」

「所以你會想去參加一啲比較大嘅話劇團，然後……成為一個偉大嘅話劇演員？」

「劇團就無乜點考慮過，而家我只係一個入行幾年嘅新人，演技上表演上仲有好多嘢需要磨練，」劉瑞峰笑了笑，眼神裡彷彿滿是對話劇的喜愛之情。「偉大嘅演員當然大家都想做，或者轉做製作人又好、導演又好、編劇又好，只要係話劇就OK。」

Peter點了點頭，祝福及鼓勵他幾句以後便離去。海傍聚集了無數欣賞維多利亞港夜景的遊客，張保仔號在岸邊搖搖晃晃等待著掏錢上船的人，Peter站在文化中心外那條長樓梯上插著褲袋，眼看對岸，但腦海裡卻滿是劉瑞峰在台上謝幕時那燦爛的笑容。


這天阿實的日程稍為空閒一些，在深水埗隨便吃點東西以後便在路上隨意走了一會兒，看見長沙灣道的另一頭有家貼滿了減價標識的光碟租賃店，突然犯電影癮的阿實想也沒想便從隧道穿了過去。

店面的電視正播放著一些超級英雄電影的節錄，阿實低聲地哼著歌直接走進電影區，他也好一陣子沒有注意最近有什麼電影上映或是在網上觀看，碟架上的封面琳瑯滿目，看得阿實是興趣連連。回過神來時他手上已捧著四五盒影碟往收銀台走去，收銀員認得他是林華實，顯得一臉驚訝。

「要唔要睇下啲棟篤笑嘅DVD？」她邊計算著總額，邊打趣道。

「都無我嘅碟，唔啦。」阿實看了她一眼，說笑道。

只是被她這麼一說，阿實結帳後又忍不住想要走去看一眼。那裡除了余一丈全集以外，香港其他一些表演者的演出DVD也被放在架上租賃，外國的也有幾張，阿實看得雙眼發光，心裡責怪自己怎麼以前不知道這裡有這麼多的寶物。

正欲轉身離去之際，角落的一張DVD瞬間讓他的腳步停了下來。他伸手將其抽出，封面上正是在當天的紅館舞臺上談笑風生、顧盼神飛的佐治叔。而「佐治叔『百年歸老』棟篤笑」這個演出名字到現在阿實還是覺得佩服不已，很多人到了一定年紀後就會對死亡心生恐懼，儘量避諱不提，哪能像佐治叔一樣笑著面對還能拿出來自我調侃一番的。

「唔該請問呢隻有無新？」

「有啊，你想買定係……？」

「買啊唔該。」

有趣的是，雖然過了三年，但看著螢幕裡侃侃而談的佐治叔，阿實依然覺得像是沒多久以前的事，裡面的一字一句他彷彿還是坐在觀眾席上傾聽般吸引。

阿實曾經夢想要成為余一丈，曾經夢想要成為佐治叔，但他卻沒有夢想過要成為出色的自己。然而當余一丈變了，當佐治叔離開了，那為什麼自己的目標還依舊要放在那些不復存在的殘影之上？

十月一日的煙花在維港上空綻放，以往在酒店餐廳打工時，食客們會聚集在寬敞的落地玻璃前觀賞，然而來光顧的大多都是外國人，阿實相信他們並不知道放這煙花的目的是什麼，甚至可能大部分香港人也不知道。

這天阿實的工作是跟《答問真珍珍》的監製、導演和梁建港討論一下第二季的節目方向跟細節等等。阿實本以為為免麻煩，節目的第二季會盡可能跟第一季相同，但這導演顯然是那種不安本分的類型，在飯局上一直在表示自己想搞點創新的態度。

梁建港似乎很同意導演的想法，因為這節目本來就是跟日本買來版權的，但即使加上粵語配音你還是感覺裡頭的內容跟香港有種距離感，畢竟裡面所有提到的東西都與自己相隔千里。

「所以你想自己拍一輯……香港嘅？」戴著眼鏡的梁建港用原子筆有節奏地敲打著自己的下巴。

「嗯，我問過日本嗰邊，佢哋都話可以，但成事之後要俾佢哋過目，而且個名都要用返，錢嗰方面就可以畀少啲。」導演點頭答道。

「但香港有無咁多花臣玩先，豆潤咁大個地方。」監製一臉懷疑地看著他們。

「唔係架，其實香港都算係歷史悠久嘅地方，加上係中西文化匯合嘅港口，你淨係當冷知識嘅資訊節目都夠玩好幾期。」梁建港答道，看起來像對這事有點興趣。「當然要搵啲觀眾感興趣的奇人奇事可能會有啲難度，但我覺得有得做，而且幾有睇頭。」

「阿實你點睇？」監製想了兩秒，轉而朝阿實問道。

「既然我哋係香港人，做香港嘅電視台嘅節目……」阿實掃視了眾人一眼。「咁做返屬於香港本地嘅節目其實……都好合理啊。」

「咁你自己有無咩諗法？例如話覺得邊個地方啊，邊度有個咩人好特別咁之類嘅嘢啊？」導演問道。

「剩係我住緊嘅深水埗都有唔少，」阿實答道。「我住嗰度有條巷仔，有個阿伯坐喺嗰度幫人整風扇整咗幾十年；再遠啲又有天光墟，有唔有趣我唔知點判斷，但我認為起碼會引起一啲社會嘅議題同反響先。」

「天光墟又好似沉重咗啲，成班露宿者擺地檔賣嘢呢啲觀眾睇咗都唔會覺得開心……」導演苦笑道。

「搞笑藝人嚟講你都算比較奇特架喎，」監製盤起雙手，看著阿實笑道。「同埋聽你平時講嘢，睇你棟篤笑啲片段，都唔似嗰啲會關心社會民生嘅類型啊。」

阿實勉強擠出了一個微笑來回應，早察覺到不太對勁的梁建港瞄了他們一眼，馬上開口扯到另一個話題救場。最後討論的結果是確定整季都以香港為背景，但當然風格沒有阿實所說的那麼沉重，畢竟黃金時段的節目還是應該要以合家歡為主。

反過來說，阿實也只是隨便說個提議而已，他自己也明白這節目不可能做成探討社會民生各種階層之間的衝突的那一類，換成他自己是監製跟導演也不會這麼做。只是聽到監製這麼形容自己以後，他又一次感到沮喪和無力。

梁建港在跟他相處了這麼一段時間以後也大概摸清了阿實是什麼樣的性格，道別的時候他走到阿實身邊說了幾句安慰的話。

「呢個社會係好現實架，個個都想睇啲開心嘅嘢，大家都會覺得唉我返工已經好大壓力好唔開心，做人已經咁辛苦，點解仲要去睇其他人有幾辛苦呢？」梁建港笑道。「全世界都係咁，更何況出名工時長壓力大嘅香港？」

舊式的雙層電車在眼前緩緩駛過，發出的叮叮聲響彷彿與繁忙的中環街道格格不入。身旁盡是些快步行走的上班族，大部分人的臉上都是一副如釋重負的表情，阿實笑了一聲，僅是點點頭沒再答話。

演出的日期逐步靠近，阿實日夜修改著已初步定下來的劇本，他曾考慮過要不要找一些朋友來充當白老鼠聽眾，但細想又覺得創作這回事本來就不應該受人影響。不出兩三日就冒出的新聞會讓他對原稿作出加插或是刪減，所以即便當天的工作再忙也好，他也會找時間將當天的本地跟外國新聞都看一遍，以免自己錯過了什麼有趣的素材。

《答問真珍珍》的拍攝也已經開始，同樣的做法阿實依然得心應手，不論是導演監製，還是拍擋梁建港都對他的表現感到滿意，節目的氣氛、內容、趣味性都達到了他們的要求跟預期，可以說是得到了理想的結果。

「你場talk show幾時開話？」在走廊上走著，梁建港開口問道。

「12月尾，」阿實答道。「有興趣嚟睇？」

「有，我不嬲都鍾意睇棟篤笑。」梁建港笑道。

「咁預埋你，你想睇邊日我留飛畀你。」

自動代入左梁建港做森美

思路正確

「你今次個show叫咩名？」

「『波瀾萬丈』」

「……似舞臺劇多啲喎。」

「其實無幾多人睇棟篤笑會深究個棟篤笑叫咩名嘅，香港更加。」阿實笑道。

「哈哈哈咁又係。」梁建港笑出了聲來。「Peter哥同意咗架啦呢個名？」

「嗯，佢話呢個show全權交晒畀我話事。」

「但點解會叫個咁嘅名嘅，有無咩特別原因？」

「嗰日行書店，隨手拎起本成語字典，見到有句『一石激起千重浪』，覺得幾得意，所以就用咗。」

「……咁點解唔直接叫『一石激起千重浪』嘅？」

「嗯……『波瀾萬丈』好似聽落型啲，又無咁長。」

「你都幾隨意架喎。」梁建港笑道。

「反正內容吸引就得啦，我相信只要你做得好講得好，個名係點無人會理你嘅，又唔係有粗口有色情，無衛道之士嚟搞我呱。」阿實微笑著聳肩道。

「啊真係愈識落愈覺得你呢條友有趣。啊唔係喎，丈哥講過話佢覺得用有趣同好笑嚟形容棟篤笑表演者係一種侮辱喎，我更正，愈識落愈覺得你呢條友幽默。」

「其實我又唔係咁在意嘅。」

「唔係喎，嗰日食飯傾呢個節目嗰陣，監製形容你嗰陣你個樣變晒架喎。」梁建港斜斜地瞄了他一眼，笑道。

「我只係估唔到……原來慢慢咁，我已經成為咗一個同自己幾乎完全無關嘅人啫。」阿實苦笑道。

阿實在大學畢業以前一直沒想過自己日後會做什麼，讀中文僅僅是因為自己的語文成績不錯，曾萌生過想當作家的想法，但因為自知文筆太差所以不到幾個月便放棄了。而到今天回想起來，在香港當作家說不定比搞棟篤笑還要潦倒。

但在社交網站可以看到的是，身邊的同學不管以前多麼滿腔熱血，心懷夢想的，踏出社會以後便又是另一回事。當然也有人得償所願，成功邁步進入了自己夢寐以求的行業，但十居其九都是在碰壁以後找一些誰都能做的工作。談起曾經的理想時，大多都裝作瀟灑地一笑置之。

家豪如此、阿歡如此……又或許他日回想起的時候，阿實自己也是如此。

他想起以前在金融公司裡工作的時候，身邊有位同事經常說自己想當個吉他手，偶爾某些歌手的一些吉他演出會被網民拿來討論，當然他也是其中之一，甚至會在公司裡表示對其技術的不屑。

或許人的天份生來如此，但每天嘲笑著那些勇敢地踏出了第一步的人如何如何不濟，然後自己做著一份每天都想快點下班的無聊工作，這就是我們想過的生活？人的一生就只有一次，大家真的都甘心以批評他人的方式來渡過這寶貴的一輩子？

看到來接載的Peter在車外抽著煙，阿實整理了一下自己紊亂的思緒，當然他沒打算能暪過Peter的法眼，但稍微掩飾一下或許能避過這位經紀人的說教。

車門關上後，還未等阿實拿出電話打開什麼，Peter便突然開口說想要吃壽司，阿實只是點頭應了一聲沒說什麼。

「我以前曾經發挖過一個歌手，想簽佢嗰陣佢話唔想出賣自己嘅靈魂，問可唔可以畀佢足夠嘅自由度……」Peter一如以往地看著窗外，一副漫不經心的樣子娓娓道來。「我同佢講：喺娛樂圈想要打出名堂，一百個人入面有一千個人都要經歷出賣靈魂呢一個階段，而呢一個階段有幾長無人知，可能到你死咗嗰日你都只係個陪笑嘅棋子，但亦有人好快就成咗名，然後可以隨心所欲咁做自己想做嘅嘢……」

阿實嘗試聽著裡頭的弦外之音，有時候他也很意外，因為Peter彷彿真的能看穿人的心思一般。

「我讀中學嗰陣曾經都話第時想做一份唔駛受氣嘅工，但大個之後先知呢個係一個奢望。我唔敢話呢個世界無，但至少喺香港無乜可能。做打工仔唔駛講啦，基本上個個都要受氣；做上司，即係做夾心啦，上頭老細Ｘ人你要幫下屬孭鑊，下面啲人做得衰你又一樣受氣；做老細咩，其實又一樣要受氣，班細嘅做得唔好你又要扯火，出去同人傾生意又係要扮死狗，呢個世界邊有幾多地位對等嘅飯局。到你一步步向上爬，間公司愈做愈大啦，但你慢慢就會發現，點都總會有比你大嘅公司，所以到你退休之前，其實你都係一直喺度受緊人氣。」

阿實又是點頭應了一聲，臉上的表情像是在跟Peter說「你說得有點長」。

「我知你成日嫌我譖氣，但最緊要你自己要諗清楚，要諗得通，」Peter看著車窗外的夜景，不急不緩地說道。「咁多年嚟，你得到啲咩，而你辛辛苦苦咁一路走嚟，又係為咗啲咩－但如果行錯一步，你可能就會失去晒所有嘢，就好似喺度行鋼線一樣，你要用盡力氣去平衡呢兩者嘅比重，然後一路前進……This is entertainment circle.」

阿實一手拉開自己那邊的窗簾，被擋住並慢慢開展而來的景色熟悉不已，看著那些與自己擦身而過的車輛，兩年前在甄選中落敗的記憶湧上心頭，叉雞飯飲恨而去的背影亦歷歷在目。

但他依然相信，只有忠於自己，才能抬起頭昂然繼續前行。
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿

故事都差唔多完
將會迎嚟最後兩章 亦都會進入成個故事嘅高潮
敬請期待

原來慢慢咁，我已經成為咗一個同自己幾乎完全無關嘅人

btw entertainment circle 係直譯搞gag？
用返this is the entertainment industry 會唔會好啲
anyway 繼續支持

btw entertainment circle 係直譯搞gag？
用返this is the entertainment industry 會唔會好啲
anyway 繼續支持

我記得entertainment circle係可以咁用 但可能唔係咁正規？

google咗一吓好似冇
都襯peter嘅佢之前都有搞gag

唔係啊我GOOGLE有喎
BTW就算柒咗都襯PETER呢個真

第八話


阿實曾看過一個故事，說是一個電話騙子撥到一個老年女性那裡，然後謊稱自己是她兒子，結果硬是被拖住聊了大半個小時。最後掛線時她向那騙子說了聲謝謝，說他的聲音跟自己死去的兒子幾乎一模一樣，這通電話就像時光倒流了一樣。

很感人的一個故事，但其實如果用電影的角度完全可以拍成一部喜劇，當然要帶點感人的元素。

所以如果是棟篤笑表演者的話，便應該有著能把所有情感的新聞都變成喜劇材料的能力。特別是香港這個政治新聞一籮筐、兩天三日就會蹦出幾則令人啼笑皆非的言論或是對答的地方，如果說有什麼特產的話恐怕就是「創作素材」了吧。

以這種做法創作和表演的阿實，在十二月尾的首場演出獲得了極高的評價，能容納三千多人的伊利沙伯體育館在第二三場時座無虛席，全場掌聲雷動，歡呼笑聲不絕於耳。Peter放下了手中的報紙，走到場館裡的走廊，看著在台上來回踱步表演的阿實，台下興高采烈的觀眾，心裡百味雜陳。

這天特首跟某些高官不知怎的也到了場，Peter有跟阿實說過這事，著他適當地改一下稿子，但很顯然阿實沒有這麼做。

「二戰嗰陣呢，希特拉嚴令全國禁煙，包括前線嘅所有軍事人員、士兵。原因係咩？因為影響個人健康。」阿實邊走邊說，然後頓了頓，觀眾席中開始傳來笑聲。「第二次世界大戰軸心國士兵嘅總死亡人數係超過八百萬人，即係你每日上戰場同人搏命，可能今日食幾支煙仔，然後聽日就無命架啦……你同我講要注意個人健康？呢啲咪黑色幽默囉各位。」

「我發現政府領袖通常都係精通黑色幽默嘅，例如我哋香港。我哋偉大嘅特首曾經喺一次訪問度暗示話『如果選舉只係一場數字嘅遊戲，咁你自然就會向香港嗰半數月入低於一千八美金、即係大概萬四蚊港紙嘅市民埋手』……我知就咁聽可能有啲難明，因為我哋嘅特首始終係高材生，我嘗試用一啲通俗少少嘅語言翻譯一下……」

「我覺得搵得少過萬四蚊嘅香港人仲想有平等選舉真係好可憐囉。」

與滿場笑聲全然不同的，是屏幕上一臉難堪的特首，可以看到他坐在觀眾席上臉色鐵青，強顏歡笑得像是隨時要爆發，他身邊還不時有些年輕人向其發出陣陣挑釁性的歡呼聲。

「講清楚先呢句嘢唔係我作嘅，係我喺一啲網媒度見到嘅，但亦正係因為咁我先知原來自己係一直都領會唔到特首呢種獨有嘅黑色幽默。」

「其實我幾時都覺得喺香港做高官係一種厭惡性行業嚟，你諗下，又要出嚟孭鑊，成日都要俾人問候全家，又要喺鏡頭面前做戲，要諗好多常人諗唔到嘅對白，真係講真你叫我上去做我係做唔到架。所以你哋成日話佢哋收十幾二十萬一個月好似咩都無做過咁好似好筍，但你諗下點解老人院看護，護士嗰啲咁高人工？因為除咗份糧之外仲要包埋『厭惡性津貼』啊嘛，Ｘ人你估唔駛付出代價啊？」

不出Peter所料，特首沒坐多久便離席而去，現場再一次發起震耳欲聾的歡呼聲與掌聲，光從背影就能看出他正強忍著暴跳如雷的情緒。Peter也有了心理準備般轉身走回後台，而那裡也早就佇立著一名穿著西裝的神秘人。

「搵我？」Peter插著袋，朝他笑道。

那神秘人沒有答話，只是露出微笑並伸出手，示意Peter隨他走一趟。

Peter被帶到某個不起眼的角落處，站在那裡的同樣是一群身穿黑色西裝的男子，他認得其中一人，是某局長的親信，據說經常在政府高府間周旋，人脈甚廣－說難聽點就是最高級的走狗。

「李局長講過架，存在即合理，所以我覺得香港嘅房屋問題、地產霸權呢啲根本都唔係問題。如果唔係點解佢會存在啫？呢個係大自然之間爭鬥而剩下嘅必然結果，而你哋，就係食物鏈嘅最底層，被壓榨、被捕食，係合理嘅亦合符邏輯嘅。」

那人看見Peter走近，一臉笑意地指了指上方的擴音器。

「幾風趣啊，係有啲料嘅，」那人身材高挑，精致整齊的油頭與Peter同出一轍，只是其臉上更透著一股令人說不出的寒意。「Peter哥睇人係有一手啊。」

「開門見山啦，我唔係咁鍾意同人講門面嘢。」Peter看著身旁那些木無表情的西裝大漢，苦笑道。

「你知林華實咁做會有咩後果架可？」那人又指了指擴音器，露出一個無奈的表情。

「香港有言論自由架嘛。」

「嘩咦，Peter哥，你比我想像中天真無邪喎……」那人皺眉做出了一個驚訝的表情，非常浮誇而做作。「你唔好誤會，一切所謂嘅言論自由、活動自由、集會自由等等，係我哋畀你先有。」

擴音器裡又傳來一陣熱烈的笑聲，那人臉色不太好看地整理了一下西裝外套的領口，小聲地跟旁邊的西裝大漢說了幾句。

「原本我可以直接封殺晒你成間經紀人公司嘅所有藝人，不過大佬話可以畀你一次機會，」那些西裝大漢突然抓緊他開始做出搜身的動作，並拿出他的手提電話確認沒有在錄音。男子盤起雙手一臉輕鬆，Peter則輕舉雙手，消化著對方的說話。「但你可以同林華實講，聽日將會係佢成世人嘅最後一場棟篤笑表演，叫佢好好享受下。」

「權力機關可以控制到咁偏咩？」搜身完畢後，Peter笑著整理了一下自己的衣服。

「睇你肯唔肯做嘅啫，」他們像是已達成目的般起行離去，而那人在經過Peter身邊時還停了一下。「香港所有大型場地都直屬康文署，你申請開個show又有咁多嘢要申請，要人審批、排期……你知權力機關嘅官僚主義有幾繁複、有幾嚴重架啦。所以……祝你好運啦，又可能我只係嚇下你嘅啫，皇天不負有心人，真係想搞嘅搵個屋邨同班阿公阿婆交流下囉，你要做到咁我又無理由阻你嘅。」

Peter笑著點了點頭，迴盪於走廊的腳步聲在耳邊淡出，他又緩緩走出外面，繼續感受著阿實全心全意的表演。

「講返一啲民生少少嘅話題啦，無計因為香港嘅政治比較有趣，同台灣中國嘅風格唔同，就好似電影一樣。」阿實笑道。「最近大家都知啦，內地嘅電子支付開始興起，而且發展得非常蓬勃同普及，亦開始有進軍香港嘅趨勢。我自己有用過有感受過，確實係非常之方便，然後你可以見到所有人都愈嚟愈依賴呢一樣嘢。」

「我先唔討論內地嘅電子貨幣軟件好唔好用，同埋呢件事本身嘅安全性點。我個人唔反對電子貨幣，因為始終佢好方便，八達通係電子貨幣嘅一種，信用卡又係電子貨幣嘅一種，你網購又好食飯買嘢埋單又好，電子貨幣喺呢個現代社會確實係令我哋方便咗好多嘅。但講到要發展成為無現金城市呢我係有少少反對嘅，大家知唔知無現金城市有咩問題？就係你用現金畀錢嗰陣，你會俾人Ｘ。」

「有一次我返大陸探親，落樓下間士多買支汽水，然後我扲張五蚊俾佢找嗰陣呢，佢塊面係黑晒架，就好似你做錯咗咩咁。」阿實做出一個呆滯而驚訝的表情。「『大佬而家我畀錢埋單咋喎……』『係啊你用錢埋單啊嘛，你好地地埋單唔得嘅，點解要用錢呢！？』」

沐浴在伊館內的笑聲讓Peter感到有點欣慰，他雙手盤胸，輕輕地側靠在牆上看著上方那大螢幕裡的阿實，這個他悉心栽培了好幾年的年輕棟篤笑表演者，而想到這段表演將要成為他的絕唱，心裡又不免有點婉惜。

但路畢竟是阿實自己所選擇的，作為經紀人自己做的也已經很多，並沒有辜負過他什麼……只是愈是這麼想，Peter的心裡就愈是不甘心，因為他堅信阿實應能達到一個不比余一丈低的高度。