常見問題
Q: 點解我唔去day trade炒股炒期貨聽日就發達要等index fund成廿幾年先發達？
A: 因為喺短時間內嚟講，錢就係得咁多，你贏錢就有人輸，個distribution 嘅平均一定係零，然而計埋手續費抽抽插插之後個平均就只會係負數，仲未計你條死傻散高買低賣，仲未計啲大firm有幾打PhD同超級電腦每日就係諗點樣打贏你，所以長遠嚟講day trade必定係跑輸大市兼蝕時間
如果你講唔岀你嘅策略係exploit緊咩 market inefficiency, 啲alpha係點嚟，就不如收手算
Q: 咁係咪月供VOO, QQQ就得？
A: 唔係，VOO同QQQ就只係美國市場，遇着美股未來10年好似2000-2010年代咁打橫行你就仆街。正確做法係買勻全球股市分散投資，咁樣成個地球收皮你先會輸
Q: 過去十年Magnificent 7升到仆街，呢啲公司又唔會執笠前景有咁好點解唔買佢地？
A: 公司前景好唔代表佢就會升，係要公司前景好過大家嘅預期先會升。Magnificent 7嘅股價一早已經反映咗大家對佢嘅憧望，佢要繼續有得升就要一直繼續打破大家嘅期望，咁你覺得有冇可能繼續連續打破多十年?
而實際上過去咁多年真正跑贏大市嘅一直都係小型價值股，超大型股只係咁啱呢十年跑贏大市
Q: 股災點算，股票一定會升？
A: 股災即係減價，坐返幾年美國佬就會搞掂。平時有三至六個月應急生活開支喺短期國債，再加啲中長期國債去hedge返股票就得
