【pH值介乎於7飄浮的愛情故事】《一腳踏兩船》(2)

「吓咩姐？」Crystal冷眼望住我，「Jeff咁就你，你開到聲佢實冇問題㗎喎～」

『係就係...之但係...』我都未講完...

「喂拖幾時都有得拍啦～但係女主角唔係時時都有得做㗎！」Crystal好用力咁點晒頭！

係...係掛...對Crystal嚟講就一定係啦...

即係話晒我都叫搶咗佢個女主角嚟做吖嘛...

又即係咁...呢個咁難能可貴嘅機會喺我手上都唔珍惜嘅話...對Crystal嚟講係二次傷害...

係吖...我就係想講對我自己嚟講，女主角都係同之前所講咁完全唔重要！我都係著重好姊妹嘅感受囉...

「唔使諗咁多喇～」Crystal拍拍我膊頭，「直接同Jeff講啦～」

直接吖...

本來打算走去搵Jeff講嘅...之但係咁啱就小息完喇...

返到入課室都有諗住講嘅...之但係想行去搵Jeff之時...

「仲唔坐返埋位？」班主任就口黑面黑咁行入嚟，「小息都完咗啦！」

睇見班主任咁嬲爆爆咁...唔係M到就係同男朋友鬧咗大交啦...

咁唯有再遲少少先講啦...

今日全日都唔係好搵到機會...

係真係冇咁嘅機會？定係我自己刻意唔去把握機會？

點解我總係覺得難以啟齒咁㗎呢？

其實又有咩咁難以啟齒呢？

當一對情侶會有難以啟齒嘅時候，又代表咩呢？

直到放學，終於有最好嘅“機會”...

Jeff帶住微笑行到過嚟...

我就喺佢未開聲之前：『係吖！我呢...嗰邊通知咗我話想搵我做MV嘅女主角...話想一陣去佢哋公司傾啲細節喎！』

「係吖？」Jeff有啲喜出望外，「恭喜晒吖！我都話你得㗎啦！」

『呃...呃...咁...但...但係我哋去藝術展...』講真我都冇諗過Jeff會咁開心...

真係咁值得開心？

「藝術展遲啲睇都得啦！反正都係啱啱開始咋嘛！但係女主角唔係時時都有得做㗎！」Jeff點晒頭！

『你同Crystal講啲嘢一樣嘅～」又係話女主角唔係時時都有得做～

「咁咪即係有道理囉～」Jeff理直氣壯咁～

有道理...或者啦～

Jeff接住問：「咁使唔使我陪你去吖？」

『唔...唔使喇～』我擰擰頭，『Crystal陪我去喎～』

「係吖係吖～」本來仲執緊個袋嘅Crystal就立即彈起身！翹住我隻手，「今日Joanne係我㗎喇～唔好阻住我哋兩姊妹吖～」

『喂吖！』我拍一拍Crystal隻手！

唔好咁對Jeff好唔好？

「咁...」Jeff帶住尷尬嘅微笑摸摸頭，「咁我返去等你電話～」

『嗯嗯～我搞掂返去就打俾你啦～』

「嗯～咁你小心喇～」

「有我陪住你女朋友仲使乜小心吖？唔放心吖？信我唔過吖？」

『喂吖！』

同Jeff喺學校門口揮揮手，然後就同Crystal行去搭車。

「使唔使吖？」Crystal冷眼打量住我，「啱啱先分開就咁依依不捨～」

『係咁㗎喇...』你仲好講...

「唉鬼咁纏綿～通常熱戀過後好快就冷卻～」

『喂你把口可唔可以唔好咁臭？』

「有幾臭吖～嗄～」

『喂吖好核突吖核突婆！』

同Crystal吵吵鬧鬧咁搭車，然後就上到去公司。

『呃唔該...』一行到埋去Reception，同個姐姐講聲，『我係Joanne...約咗Macro傾嘢...』

「哦Joanne～」姐姐帶住微笑打量我，「跟我過嚟呢邊先～」

姐姐就帶住我哋行入去...

「啱啱放學吖？」姐姐再打量我同Crystal。

『係吖係吖...』仲著住校服嘅我同Crystal而家先覺得有啲奇怪...

或者平時慣咗放咗學仲著住校服周圍走啦...

但係而家上嚟人哋公司傾嘢...著住校服又好似怪怪地咁...

「坐陣先～」姐姐帶我哋坐喺梳化，「我同Macro講聲～」

『哦哦...唔該～』我同Crystal就坐定定。

望住姐姐入咗房...

「喂緊唔緊張吖？」Crystal拉拉我隻手，「緊唔緊張吖？」

『唔緊張喎...』有咩需要緊張？

「車～都唔好玩嘅～」

『緊張先好玩㗎咩？』

「緊張先好玩～」

『而家又唔係玩...』

講唔夠幾句，姐姐就由房行返出嚟：「Joanne～可以入嚟喇～」

『哦好好～你坐喺度等我喇...』我就行過去...

「OK啦～」Crystal就坐定定。

入到房，就見到一個成熟戴眼鏡留有鬚根嘅男人。

呢個男人...就係Macro...

「Joanne你好～請坐～」Macro向我示意坐喺佢面前。

『哦好好...』我就有返啲儀態咁坐好。

原來佢就係Macro...

我記得...上次試鏡佢都在場...係坐喺LB身邊嘅...唔聲唔聲...靜靜哋咁...

「正如之前所講，我哋想請你做MV嘅女主角...」Macro俾咗份文件我睇，「呢度寫咗啲細節...你可以睇睇有冇問題...」

文件...細節...

我就揭嚟睇睇...

「其實就唔複雜嘅～都好簡單㗎姐～個MV預計要拍兩日...實際時間都係一日半左右～」Macro簡單咁講解，「咁報酬方面...你可以睇睇有冇問題...」

『哦哦...哦哦...』報酬...報酬...

我揭多兩揭...就睇到個銀碼...係寫咗...一...一萬？

今晚出完

鍾意嘅朋友記得Like同Share俾身邊嘅朋友一齊追～

有咩記得喺下面留言講～我會一一回覆～

三句預告

嘩...拍日半就有一萬咁爽㗎咩？

一萬蚊喎...我媽咪辛辛苦苦咁打份工，一日返十二個鐘...一星期返足六日...一個月都係萬二三咋...（聽佢講...）

而家拍日半就有一萬喇喎...

JEFF咁好人
好快佢前度就會係同個明星撞到拍拍聲架啦

為女朋友著想
唔會唔會 對Joanne有信心

係前女朋友
好快就分手架啦

Crystal呢啲咁嘅姊妹真係
成日想人散都有嘅

明明仲好恩愛 邊有咁易分

通常啲好姊妹都係咁

咪就係成班都仆街嚟
永遠都彈到人條仔一棟都無
成日建議人分手

冇錯 明明冇事都俾佢哋講到有事

早