港產片[Fly me to the moon] 但願人長久集中討論區

都係，好似身份認同嘅混淆嗰part，佢都擺咗好多自己經歷同體會落去。

岩岩睇完，自己覺得劇本同setting都係一流，戲院有唔少妹豬都喊左（包括小妹我）。入面對新移民身份認同同埋原生家庭既討論好發人深省。特別係子缺講過：係香港佢地當我地湖南人，係湖南佢地又當我地香港人。諷刺既係第三幕有講到子缺呢個「新移民」竟然會爲保護本土文化而要上庭。睇到呢幕令我諗起好耐之前睇過篇學術文章討論講新移民會唔會比香港既民主派同化，入面既結論就係傳統認爲大西北尤其係天水圍新移民多理應特別親中同唔鍾意香港文化，但諷刺係天水圍既新移民先最抗拒建制派。相反中西區班土生土長香港人最歡迎建制派同抵制民主派。睇得出導演係呢part好有心思

另外導演對父女之間感情刻畫得好入肉，由開始對父親既仰望，到對父親既抗拒，最後驚覺父親徐徐老去，不再威嚴，自己所有既回憶同習慣都擺脫唔到父親既影子。呢d轉折位刻畫得入木三分。同埋好多父女之間既交流都好細膩，平凡但又親切。自己睇到呢d場景都不禁潸然淚下，需知坊間好多戲係呢d場合會用好強勁既音樂催淚，會有種逼你留眼淚既感覺。但今次既配樂總係黎得好及時，唔會覺得導演逼你流眼淚咁款
想講吳慷仁d戲真係勁到仆街，尤其係佢扮道友頂癮個陣求自己個女借錢，呢下真係眼耳口鼻都識做戲，影帝真係實至名歸

另一面，我覺得導演野心太大，想講好多野但時間有限，搞到有d位少少到喉唔到肺。同埋有少少位睇唔明，唔明點解會add入去劇情。第一就係子圓後生拍拖個度有少少唔明同成部戲有咩好大關聯，第二就係子圓搵炮友個度，我明導演想講原生家庭對子圓既影響，但其實呢個位唔需要花咁長篇幅去鋪墊，寧願導演多d時間講子缺或者父女之間愛恨情仇完整返個故事。

暫時諗到咁多，過幾日二刷完再寫

子圓個初戀係7仔偷嘢，係咪因為佢有子圓老豆既影子，所以先子圓先鍾意佢？
最後金毛又係同子圓老豆一樣打女人