[遊記] 冬 東京近郊富士山週遊+聖巡獨遊之旅

滑索多唔多人玩

報名處好爆 但唔肯定當中有幾多個係齋玩滑索
印象中好似已經有另外開條隊for滑索

滑索keep住有人玩無停過
每個玩滑索嘅人都有大嗌
然後橋上成班人都立即停低去影

全日行程重點: 沼津港深海水族館

最特別係有5條腔棘魚標本，以及棲息喺駿河灣各種深海生物
沼津漁民一旦捕獲到稀有深海漁種時就會攞去水族館
最初決定嚟伊豆一帶 就係因為被呢個深海水族館吸引到

隔離有VR深海體驗 但睇宣傳片覺得普通

入口隔離有一堆金目鯛

冬天伊豆一帶當做嘅貴價魚
呢兩日喺伊豆都有嘗試揾機會試下
(Btw沼津嚴格上唔屬於伊豆，只有南部一小部份算伊豆)

以下水族館內部
可惜好多都影得模糊又睇唔清啲字
可能樓豬當時太激動/手機廢影唔到偏暗環境:

最鍾意去水族館

深海小講座

腔棘魚 シーラカンス
全館共5條標本
招牌嘅世界唯一冷凍保存標本 仲要兩條

幾有氣勢零下18度保存
細細個睇科學書同Pokemon已經聽過腔棘魚呢個名

曾被認為早已滅絕、只在化石中發現
最大特點係其猶如手腳一樣有肉質嘅鰭
無背骨 得中空脊柱

1938南非首次發現活體 後來陸續有發現個案
日本亦曾多次派研究人員參與尋找研究腔棘魚
目前需許可證才能捕獲同保存

另外兩條 個色無咁靚 少少塑膠feel

仲有個無影到嘅標本
配合放大鏡俾人觀察個肉質鰭，同埋粗糙鱗片

一系列透明骨骼標本 可以清楚見到骨架同軟骨

出口嘅禮品店有得買 好似大槪一萬定幾萬yen一件

其他生物同標本展品:


禮品店

全部都勁Q 但好大件好貴 要忍手唔買

最後行咗1-1.5小時 畢竟成個館其實唔大 雖然展品多
不過好多魚都無做英文翻譯 好彩都睇得明日文說明

樓主都識好多
文化，歷史，深海知識，睇完po學到好多嘢

thx 純粹有興趣啫
唔少都只係跟返當地嘅介紹牌內容講返出嚟

更新太慢 成個星期都未講完一日行程
今日會加快返進度

出門口已經天黑 雖然有啲晏 但趁未全黑上一上個水門
沼津港水門View-O

以前沼津港曾多次受地震帶嚟嘅海嘨破壞
當偵測到地震 水門會自動落閂擋水 緊急時亦可以控制讓水門受重力自己慢慢下降
同時充當觀光塔 日頭同好天可以望到富士山
可惜太遲咩到見唔到應該食埋晚餐先行過嚟
簡單影返個沼津港算

水門上可以望到內部機械結構 另外有幾幅3D立體魚畫俾人打卡

返到沼津港食晚餐 有過半餐廳都已閂門
魚河岸 丸天 みなと店 (Tabelog 3.48)
https://tabelog.com/shizuoka/A2205/A220501/22031906/
招牌菜係圓柱型天丼 但一場嚟到漁港食炸海鮮好似有啲浪費
金目鯛魚生又賣哂 而金目鯛煮嘅賣相唔吸引(不過呢個諗法第二日就發現係錯)
於是就叫海鮮丼 有吞拿魚、櫻花蝦、生吻仔魚、熟吻仔魚等等

櫻花蝦幾嫩幾啱餸飯 生吻仔魚有陣腥味，唔識欣賞
唔肯係樓豬少食魚生唔太識分 定係個海鮮本身唔太出色/新鮮
自己覺得味道整體只係一般最多比尋日熱海個飯新鮮少少

離開餐廳都仲見到有啲人特登揸車入沼津港揾飯食 可見幾有人氣

返到沼津站8點鐘 商店街都收哂鋪

動畫完咗咁耐 商店街仍貼滿最新嘅Lovelive橫額

2016年推出嘅動畫Love Live! Sunshine以沼津尤其內浦地區為舞台
超高嘅人氣曾令沼津逼滿朝聖fans (雖然只係升咗一至兩成總遊客數)
按統計推算已帶嚟嘅經濟效益極高 甚至遠超已經好成功嘅搖曳露營(山梨靜岡長野)同少女與戰車(茨城縣大洗町)
曾連年下降嘅人口亦成功減慢咗降幅

過度成功嘅動畫合作計劃帶嚟狂熱fans，
反而曾嚴重滋擾影響本地居民生活
不過去到睇嚟似乎已平靜返 一路上都見唔到有行為太奇怪嘅fans

車站前嘅Lovelive合作cafe

蛋包飯、燒池魚定食分別都只係1000yen
以合作cafe而言應該算係幾良心嘅定價

沼津站商場超市嘅半價飯盒便當好平 ~500yen一件
不過今晚仲有其他嘢想食唔可以被區區半價所引誘


再嚟到三島站 快快手買鰻魚便當就趕上車返酒店 (雖然都等咗10分鐘)
お食事処源氏 (Tabelog 3.26)

半份鰻魚飯+鰻魚可樂餅
全日第三份可樂餅
海鮮飯未落肚 有得揀半份呢點好吸引

鰻魚飯真係好好食
醬汁加咗特別嘅甜味 配鰻魚好香好正
而鰻魚可樂餅覺得只係算還可以
就咁買普通三島可樂餅已經足夠正，加埋鰻魚無好食到但又無變差
幾滿足嘅一餐 有機會再嚟三島一定會坐低慢慢食

DAY 6 完

完全唔同奈良鹿

DAY 7

經過連日緊密行程 休息又唔足夠
第二朝訓醒已經係10點
急急腳執行李食早餐check out
呢間酒店係幾好 但只可惜無得寄存行李 唯有俾錢車站前置物櫃

原本考慮過浸日歸温泉日航亭 同去熱海梅園睇紅葉
而家都只好放棄

無住到温泉旅館 唯有參觀前温泉旅館
坐巴士去起雲閣 再經過海灘


正門裝修緊 要兜大圈入
起雲閣約100年前大正時期建成 最初係財閥豪華別墅宅邸
後來成為熱海數一數二温泉旅館 接侍過好多文豪名人
直至2000年破產後被熱海市管理並開放成博物館

入場送名信片


作為温泉旅館 要先脫鞋著館方提供嘅拖鞋行 到房門前又再除拖鞋行入去
每個房間都有獨特設計 日西中式都有
職員都係老婆婆 勉強識少少英文生字
部份房有導賞員介紹房間


房間好高級 本身都好似小說場景咁
無論邊間房都會望住中間個日式庭園


有啲玻璃窗會見到好似有一條條直間折射咗窗外影像
導賞員話係因為果啲係100年前嘅玻璃 當年技術無咁好做到完整成塊玻璃

羅馬式温泉浴場 幾靚但似乎逼咗啲

另外有個新浴場就大好多 但現代感重啲

唔少文學家如尾崎紅葉、太宰治、谷崎潤一郎都曾居住在起雲閣一段時間
圍棋大師吳清源亦曾喺呢度同人比試

庭園中間行走幾舒服
最搶眼自然係兩層樓呢棟


唔肯定係咪故意設計 庭園雖然睇落視野廣闊
但唔少位意外地難清楚望到果兩層樓，會啱啱好被樹擋咗

其中有間房放咗個佛手柑 聽講唔會生食
可能當年會將珍貴水果當裝飾掛 (借google圖)

導賞時同一班婆婆一齊睇呢間房
其中有個可能以為我係台灣人 問我唔好意思呢個係咪台灣水果嚟㗎 樓豬無諗到俾人咁問 錯哂文法咁答佢我雖然唔係台灣人，但好似喺台灣見過類似嘅嘢 婆婆就話原來係咁唔緊要啦

再戰熱海銀座
目標係熱海打卡名店 熱海布丁Cafe 2nd (Tabelog 3.49)



布甸同甜品都好多款
果日平日排隊唔長 turnover都幾快
啲日本妹食哂打埋卡都仲快過我食完

好配合熱海温泉嘅浴場主題裝修
用牛奶樽裝布甸 連餐盤都係浴盤

2號店限定嘅原味硬版(かため)
幾挺身唔似平時布丁咁用匙羹一舀就散開哂
但咬落去一樣咁軟綿
味道簡單但好食
食到最底 撈埋濃郁偏苦焦糖更加正


常盤木羊羹店
老字號 後來被前牛郎繼承家業成為老闆


原本有打算坐低試下 但羊羹+茶1000yen似乎貴咗啲
期間限定酸橙羊羹1500一盒
但作為手信始終唔多人鐘意羊羹就放棄

買羊羹要買埋茶葉先掂

正常酒店10點check out，有無俾人拍門

無事 呢間11點先check out

同沼津一樣 熱海都好多干物(魚乾)賣
好受日本遊客歡迎

應該係一夜干 睇落好新鮮
經過一兩間有即燒干物嘅鋪頭
但要等位又要立食 對腳已經幾攰就放棄咗

繼續上斜行到平和通商店街

拖gip行熱海嘅都係勇者
熱海唔少餐廳、街道都sell懷舊昭和氣氛
不過更多係真係舊

午餐時間
海鮮丼とくぞう 熱海駅前店 (Tabelog 3.05)
被門口果句金目鯛専門引咗入去

金目鯛紅白兩色丼
低分最大原因相信係無咩氣氛同服務麻麻裝修少少殘
好似去咗街邊香港日式餐廳
味道上覺得只係比平時食嘅魚生實淨少少、鮮味少少
但唔算好特別值得去食 當然可能只係餐廳本身處理得唔夠好

...正當我覺得金目鯛普普通通時，結果行出店外幾步路就被打臉
喺商店街試食嘅燉煮金目鯛簡直驚為天人(唔記得係咪同一間店)
魚肉軟得嚟好腍 加上湯汁非常鮮味
原來錯嘅唔係金目鯛 而係叫錯食法


温泉饅頭

意外地都算好食嘅
味道好似之前食嘅身延饅頭 不過今次係熱食 味道亦較甜
份量大件唔少 饅頭包皮蓬鬆，接近奶皇包
感覺上放耐咗就會變硬唔好食

熱海布丁 1號本店 比較近車站 不過都係要行斜路

昭和懷舊風裝修好match隔離商店街個環境
1號店得外賣 不過對面馬路另外有個鋪位俾人排隊
由於常温保存期得1個鐘 唔太夠時間我放雪櫃 啱啱又已經食飽 就唔再買

家康之湯 (熱海車站前足湯)

熱海無浸到温泉 就簡單浸下足湯 都好令人放鬆太好有預備定毛巾
叫做家康之湯因為德川家康好鐘意浸熱海温泉，甚至一年幾次派人從熱海攞温泉水到江戶

輕輕一推

樓主去到呢個位係咪富士山旅途就快完結？

去到呢度就離開靜岡縣
江之島、東京都有望到富士山嘅
咁多日只係得最後一日完全見唔到

Day 8

原定今朝會先去鐮倉 不過見天氣預告話朝早有微微雨
就改為上畫行水族館聽日再行鐮倉

龍宮造型嘅小田急片瀨江之島站



先去片賴江之島旅遊服務中心買eno=pass (1100yen)
包江之島內主要設施 另有景點餐廳商店優惠
職員話冬天夜晩江之島有燈飾睇 不過要另加400yen
反正一場嚟到咪睇埋

是日早餐 江之島小屋 (Tabelog 3.53)
據說疫情前經常大排長龍
不過當日朝早無咩人 唔使排隊直接入去

漁師汁定食(早餐限定) ~1500yen
作為早餐好似大份咗啲
魚生非常新鮮好食 店員有介紹過係咩魚但聽唔明
超濃稠魚湯 飲落去會feel到煮軟咗嘅魚骨魚肉 湯內亦有塊魚柳
相比淋落飯到更適合就咁飲 況且飯唔夠多配咁大碗湯

新江之島水族館

睇得動畫多 一直好想嚟呢度感受下氣氛 (雖然係獨自一個)
2500yen頗貴 用enopass折返250yen

一入去最先有個聖誕節特別展覽
首先見到嘅係電鰻供電嘅閃閃燈光

幾有gimmick
每隔幾秒就閃一兩下

成座塔嘅玻璃水杯

行近望會見到原來係一隻隻透明水母
咁樣擺法 要餵佢哋食嘢應該有啲麻煩

繼續江之島水族館內部:


全館招牌 水母展示

一大群水母真心靚

雖然影出嚟幾靚 但親眼睇講真覺得氣氛上其實不如海洋公園，燈光稍為光咗啲 不過江之島最正係可以睇得好清楚每隻水母個外表

另外新江之島水族館應該係水母方面嘅研究權威
有個corner展示咗好多種超迷你水母 (借官方圖)

江之島水族館其他部份:


行咗總共~2小時 雖然成個水族館話大唔大 但種類同款式都相當多元
介紹方式設計好有心機 幾學到嘢過程都幾令人興奮

想問樓主一齊坐天鵝船就會分手既傳說來自邊到？

睇好多旅遊片都有講過

直接日文source啦
https://wasshoi-kichijoji.com/wakuwaku/1978
https://president.jp/articles/-/32387