[遊記] 冬 東京近郊富士山週遊+聖巡獨遊之旅

無床 得呢啲櫈
女性有專用休息室

富士山本宮淺間大社

富士宮個名就係因呢個神社而來
Btw富士山山頂其實都係屬於本宮淺間大社領地

個日落景好有浮世繪feel

川水都當然都係由富士山流出 好清 不過有告示寫住要煲過先飲得

流鏑馬像
記念富士卷狩時，源頼朝曾向本宮淺間大社奉納流鏑馬



本殿 (無影到，借當地觀光協會圖
去嘅時候當然無開到櫻花)

右邊被繪馬包圍嘅 係武田信玄親手種嘅櫻花樹
行到本殿已經日落
神職人員擊鳴本殿內太鼓 將本殿的簾逐一拉落
受付處內幾位後生巫女對其同他神職人員鞠躬、行入門後收工
天黑後仍有信眾陸續行嚟參拜

富士火山彈同南極之石 一熱一冷




是日晚餐 麺屋ブルーズTHE BLUE'S NOODLES (Tabelog 3.51)
https://tabelog.com/shizuoka/A2204/A220401/22029984/
去到時啱啱開鋪 但隔幾分鐘已經有兩三個客人入去
店內播住Jazz 牆上好多黑膠碟

主打雞湯拉麵 份量偏細 好彩食完炒麵無耐未至於好餓
揀咗配梅かつお醬 (梅+鰹魚)

好似第一次食雞湯拉麵
有淡淡嘅香味 只係味道太清新太健康唔太慣
就算配埋鰹魚梅醬都唔太濃味
鐘意清淡口味嘅人可能會好鐘意嘅


晚餐後去咗行富士宮Aeon Mall (TripAdvisor圖)

同商店街冷清嘅情況相反 作為全市唯一大型百貨相當熱閙
Village Vanguard、Animate逼到只能慢慢行
成群高中生好青春咁玩夾公仔
服飾、行山用品鋪款式多又唔貴 但款式稍舊

本身嚟係想買啲當地土產 不過呢間Aeon似乎只賣全國都有嘅產品
乳酪、生果(非本地產)係平嘅 但一個人食唔哂聽朝酒店又有早餐
唯有打返兩鋪街機就返去訓





Day 4 完

睇到而家好似已經有結論，就係租車

即刻可以將行程加快一倍，仲可以加多啲露營聖巡點行下

行程加快一倍又未必得
自問呢個行程已經算好緊密 停多幾個休息點就ok嘅
但租車唔使追巴士/火車班次已經夠嬴

曼接近富士山既AEON Mall

Day 5


今日移動距離比較遠 加上酒店早餐9點完
好早就起咗身

酒店包埋早餐自助餐
當然亦有本地產嘅富士宮炒麵同朝霧牛奶


寄存行李喺酒店後，用JR Pass坐特急富士川去山梨縣嘅身延
08:56富士宮站上車

由靜岡縣西富士宮站至山梨縣甲府之間嘅班次好少 大槪兩個鐘先兩班
Miss咗就要改行程順序 好彩都順利
一路上富士川嘅風景都唔錯

前往身延山嘅巴士會配合返JR班次 廢事再追時間表 出站後就直接坐巴士10分鐘上山

巴士經過正門後一連串商店到總站 大槪10點正
可能時間尚早關係 好多商店都未開
遊客多數係長者同埋家庭親子
全日喺身延都唔覺見到有一個外國遊客

Btw 新宿都有直達巴士去身延山 只係車程要4個鐘

身延一帶都係相當鄉村嘅地方
而最知名景點就係身延山久遠寺
腹地廣大 範圍包括身延山，以及七面山山頂的飛地

作為日本佛教日蓮宗總本山，身延町乃至身延線鐵道都係因為參拜人潮發展而成
不過唔少人知道身延嘅原因 應該會係動畫搖曳露營的主要舞台

參道兩旁杉樹好高

高低差約100m嘅梯級 出汗到要除外套
唔想行梯級嘅話，隔離有叫男坂同女坂嘅斜路可以選擇

回望


本堂

可以除鞋入去參觀參拜 內部唔俾影相

本堂大槪40年前復修而成
天花畫係條龍 (官方圖)

由本堂可以再沿住走廊向右行 穿過一個又一個殿
內部唔少設施包括廁所都好新好乾淨 仲有輪椅用電梯
可見財力有幾勁

坐身延山䌫車上山頂奧之院
7分鐘車程 高低差763m 承惠1500Yen

車廂由水戸岡設計 車廂天花頂有同本堂一樣嘅墨龍畫
半個鐘一班

東觀景台可以望到一小部份富士山以及富士川 幾壯觀
(影漏咗身延山 1153m 個牌)


山頂䌫車站湯葉(豆皮)味團子
買嘅時候職員會幫你抺味噌醬同剪斷籤尾 喻意去除厄運(くし切り)

味道一般，比較硬身
而個醬好似係凍，稍為重味咗啲

山頂奧之院思親閣 右邊有受付處

日蓮嘅人生最後九年喺身延山渡過
期間因思念雙親而多次登山頂 望返家鄉房總半島方向

入邊嘅宣傳單張仲有英文版 話日蓮宗喺美國有支部

思親閣隔離有好多好似山腳果種咁高嘅杉樹
穿過樹林就係北觀景台
可以望到南阿爾卑斯

左邊會見到七面山
七面山山頂作為久遠寺的飛地，每年會舉辦登山活動

身延山視野好廣闊 無論向東向西分別都會見到打橫一排嘅群山
被山同樹林圍繞嘅感覺

身延站附近店鋪兩三點就收鋪 見時間唔夠用就急急腳落山



䌫車每20分鐘一班 落山時太多人 結果要等多一班
搭䌫車時會播放身延山一帶生活稀有動物嘅叫聲
可惜望落去揾唔到有任何動物嘅身影



返到身延站前嘅しょうにん通り商店街
短短嘅商店街 店面都幾乾淨
雖然係周末 可能大部份遊客都係揸車
行經商店街遊客唔多

榮㫒堂 (Tabelog 3.50)

以身延饅頭出名 (1個70yen) 另外都有其他小食手信賣
去到時已經幾個客排緊隊 買十個廿個饅頭買上車攞走
樓豬廢事成日食太多嘢就簡單買咗1件
細細間鋪內已經有4個女職員做入袋、收銀等 做唔停手

出返鋪外 坐木櫈對住富士川食

薄皮紅豆餡
類似温泉饅頭但個紅豆餡係好食嘅 唔會過甜
可能Miss咗出爐時間所以係凍食 不過個皮仍然好軟熟

午餐 食事処ゆたか屋 (Tabelog 3.26)

天重
炸皮好薄 食材本身好味好食

原本想叫身延名產生湯葉 (豆皮) 高級到簡單幾塊都要幾百yen
可惜去到好似話賣哂

食完最後去附近土產店快快手買埋手信 就趕去車站返富士宮

喺天上山食咗たぬきだんご，真係唔太識欣賞
團子本身無咩味都接受到，但啲醬甜到同團子嘅口感分離，好似淨係食緊醬，之後去到身延山唔敢再試

買䌫車飛計唔計買嘢，會唔會都有卡

以前京都祇園食個一次新鮮即整團子幾正
會唔會只係山梨人對團子嘅口味出咗問題

印像中好似有另一張卡 係有䌫車圖
不過我用咗酒店送嘅100yen coupon 買完先知無得攞

既然成個Trip嘅主題係富士山 咁當然要去返個富士山博物館
由西富士宮落車，行多十分鐘到靜岡縣富士山世界遺產中心
點解唔前一日去埋? 因為到前一日為止仲係維修日所以呢日開返先去

入邊會先沿指斜坡轉圈行上去 模擬富士山登山個程



隨住你行上去，牆上螢幕動畫亦都會唔同，顯示富士山喺唔同高度時唔同嘅風景生態日夜景色 (借官方圖)


有職員坐喺分叉口指示你唔好行錯路線睇其他展示廳住先順路一直上到最頂 落返嚟先好睇

行到最上層 屋外露台上等待遊客來臨嘅 就係真‧富士山

喺靜岡縣(除咗伊豆)會見到富士山右邊有個小型突出物，係1707年寶永大噴發形成嘅新火山: 寶永山
聽講靜岡人畫富士山時唔會忘記畫埋寶永山

從另一路線轉圈落返去，會繼續講解富士山相關嘅形成、地理、天然環境生態水流、宗教、富士山聖巡、文化藝術等等 仲有假如火山爆發時可能嘅影響
館本身唔算好大 但範疇相當廣泛 資料量多得嚟容易明白

紅色部份係可以見得到富士山嘅地方

主要都係關東地區＋山梨靜岡

映像館每15分鐘輪流播放介紹富士山嘅短片 總共有3款影片
時間關係只睇咗其中一條 幾乎無文字，以記錄片加動畫顯示富士山信眾登山落山嘅參拜過程坐隔離有對印度父子好似睇得幾興奮


停留咗1個鐘 睇完都開始天黑
返酒店攞行李後就離開富士宮，往熱海出發

Btw樓豬喺富士站轉車時行得太慢 結果miss咗班車
結果白白坐喺富士站幾個字食住風等下一架

補返張身延站月台
回程時無特急坐 得普通車

身延線唔少站係無人站
同埋好多月台唔夠大 要行去靠前車卡先有得落車

留名

應該唔係月台唔夠大，自己估係因為架車係one man列車（ワンマン列車），喺冇人站落車就要去車頭俾司機檢查車飛同俾錢，所以淨係開車頭，如果個站大啲例如富士宮、身延呢啲有人站，就都會全部門開晒
都試過喺西富士宮落車，明明係有人站，但出入口位個職員唔見咗，隔離就咁擺個箱俾人自己入錢，真係靠自律
https://www.jreast.co.jp/morioka/onemancar/

的士

yuru camp 聖巡有D興趣

lm

回憶下先
果陣河口湖仲有巴士去到本栖湖

謝謝師兄 來咁3月尾我都想去東京賞櫻+去甲府身延聖巡下 請問係咪買3日個款JR廣域周遊pass?