[遊記] 冬 東京近郊富士山週遊+聖巡獨遊之旅

第一次出遊記 趁仲記得想記錄同分享返呢次旅程細節同感受
希望唔會講到太亂、影相影得太差 請多多包涵~

前言:
三年幾以嚟一直留喺香港 收到消息日本通關而咁啱自己得閒就決定出發了
之前已經以前去過一次東京(市中心為主)，所以今次成個行程會以圍繞富士山嘅東京近郊為主
彌補上次見唔到富士山嘅遺憾
都好彩成個trip大部份日子都好天
事後睇返相影得唔太夠多部分無影到嘅地方會講明係借網上圖片講返

另外要多謝返之前解答過我行程資訊既各位ching

行程上簡單而言就係由東京出發 經過山梨、靜岡、神奈川3縣環繞富士山一圈 最後返東京市區行

由於疫情下太耐無出過國加上反正獨遊 想去多啲地方 行程上稍為緊湊並無預留太多休息時間
自己步速算快都覺唔太夠時間用 同埋腳軟
如要參考行程最好預多啲休息位

江之島11點d鋪先開, 而且會開始多人. 9點左右無乜鋪開, 但無乜人

DAY 1
下晝到香港機場
可能因為只係啱啱正式開關
香港機場人流少到好似凌晨時份咁 離境大堂大部份店鋪都無開


五點鐘提早食晚餐
Gordon Ramsay機場店
叫咗個意大利飯配沙律 都算香嘅雖然味道一般 只係價錢真心過貴 仲要係配汽水

機場日落

UO今次間機好似細過以前


飛過唔知係澳門定珠海嘅地方


飛到關東一帶時 睇住啲路上嘅燈光估係咩地方個感覺好令人興奮

羽田落機時間22:45 本身聽講話新入境程序會好花時間
但好彩實際上比預計中快 大槪23:30已經出到境
以前平和島温泉係有深夜接駁巴來往羽田 不過似乎因為疫情關係到而家仲未開返
尾班車大槪12點正左右 所以一出境就快快手趕去京急坐去平和島站

之後都想去富士山附近，留名睇靚景

去到平和島站後先慢慢買返張PASMO嚟用
然後就繼續行去平和島温泉
温泉離車站有1公里路程 但喺日本冬天深夜嘅一公里感覺上相當幾遠下條馬路仲要好寬好大風

平和島温泉過夜plan￥3800 有得浸有得休息算好抵

有毛巾同館內用衫褲俾埋你換
收銀個阿叔見我日文勉強溝通到 好奇問我邊度嚟
我答香港之後 又問我香港嘅邊度嚟 答佢新界，佢哦完話聽過後就無再傾落去

內部無影到相，所以揾官網圖代替
温泉內有天然温泉 亦有炭酸泉、桑拿、冷水浴等設施

今次成個行程浸咗幾次温泉，不過無諗到平和島會係成個trip設施最豐富果個
第一次試桑拿+冷水浴冷熱循環 凍水頂唔到十秒就出返嚟 不過做完感覺又真係幾放鬆嘅

其他客人都似係得日本本地人 睇嚟未開始多返外國客嚟用

浸完就喺大廳飲牛奶同揾宵夜食，作為行程嘅第一餐
見到大廳推廣緊一個凍雞皮零食，就買包辣味試下

係好食嘅 少少咸味唔太辣 雖然凍咗少少好似未必適合冬天浸完温泉後食
食完去休息區揾張櫈準備訓時 咁啱見到有人睇緊世界盃 就坐低睇埋個十二碼先訓

當然果時係幾乎熄哂燈唔會咁光

DAY 1 完

未有咁快講到富士山
俾幾張富士山相頂住先

試過即日依照張爛鬼pass完走富士山一圈既來留個萌

露營

必須酒

JR東海張PASS真心廢
無得用新幹線唔使講
又得登唔包甲府至下部温泉段
班次又唔夠密
不過都因為咁去咗本身期望唔大但幾正嘅熱海三島沼津

留名睇巴打靚相
新年都特登喺河口湖睇日出 跟一跟相先

Lm

我答香港之後 又問我香港嘅邊度嚟 答佢新界，佢哦完話聽過後就無再傾落去

你嘅日文程度真係好淺，未去到反駁佢：「香港只係東京23區咁細」呢個程度

利申日文程度好淺

唔知個阿叔係咪本身想講話以前去過香港
當時太夜眼訓無問到佢

留名睇三島沼津

DAY 2
一起身居然只係6點半 不過可能因為浸完温泉關係訓得好舒服 已經有返哂精神
搭去品川站時撞上返工返學時間 開始有東京果種大城市feel
班車未至於好逼 但大家都好靜做自己嘢

去到品川站前商場，想食和式早餐 求其揀咗呢間品川ひおき (Tabelog 3.27)
叫咗豚汁定食(味噌湯+豚肉) 賣相味道都幾頹包裝納豆同紫菜 碗豚汁食落都算正常嘅

食完就去JR東海櫃位買定幾日後用嘅富士山靜岡PASS，因為河口湖站係無得買
一開始以為會喺新幹線入口賣 排完一輪隊先知排錯地方 原來應該要行經品川站最標誌性嘅中央大堂同走廊先揾到





(以下發洩mode)JR東海櫃位職員處理PASS票券嘅速度好慢，每組人都用咗約十分鐘先搞掂就算預約都係咁耐
排我前面嘅鬼婆鬼佬都苦笑抱怨 最後排咗成近半個鐘先到我
個職員認唔出聯合王國係指邊到指住BNO上面果句The United Kingdom of Great Britain and Northern Ireland都要問返我喺咩國家 結果我要幫返佢喺佢份淸單上揾返英國(イギリス)出嚟
搞完一輪買完PASS都差唔多10點半

搞掂票券就搭JR到新宿酒店放低行李
今日住嘅膠囊酒店

接待果位職員好似係韓仔 英文可以流利溝通到

行李安置好就轉搭中央線到吉祥寺，準備去今日第一個景點 井之頭恩賜公園同埋吉卜力美術館
無諗到，今次旅程中第一次望到富士山就係呢程車途中出現 藍色天配細細個三角形雪頂 可惜時間太短反應唔切去影低

一路由吉祥寺站前往井之頭公園嘅街道商鋪感覺上都較年輕

當日係紅葉季尾段，井之頭公園嘅紅葉好多都開始落咗鋪滿地下



傳說中一齊搭坐就會分手嘅天鵝船，唔知因為咁定單純無開當日唔見有人搭


成個公園嘅感覺都好舒適同埋意外地大 有唔少師奶放狗、老人家嚟影雀、同後生仔女唔知影IG定抖音片

湖中都有各種水鳥



Hold咗個伸翼pose好耐晒太陽


雖然井之頭公園好令人放鬆 由於吉卜力美術館嘅門票有限入場時間
都要趕喺限時前到達三鷹之森吉卜力美術館

疫情下吉卜力美術館取消咗海外購票 海外遊客買飛難咗好多 樓豬都係好彩有人幫手先成功買到 不過入到去時都有約一半其實都係海外遊客 日本客就主要係一家大細，學生同情侶都有唔少


入口嘅龍貓

室內部份唔可以影相，不過假如想攞本簿出嚟畫畫就無問題嘅
簡單而言，入邊有得睇吉卜力作品的原稿、吉卜力工作室的製作場景、講解動畫原理等等
亦有一個小型電影院放映以往吉卜力嘅短篇動畫作品
成個美術館裝飾氣氛都好令人投入，亦有各條通道比人好似細路咁捐嚟捐去


入場券係由動畫底片製成


入邊餐廳相當多人排隊 唯有揀咗隔離唔需要嘅外帶區買輕食
炸魚薯條+麥茶 好細份但都好食嘅 加咗少少辣粉幾香


屋頂有天空之城機械兵雕像，可以排隊影相

呢個好似係天空之城個核心



加加埋埋停留咗約2.5小時就行返出吉祥寺站

補多張井之頭公園

吉祥寺曾連續幾年被日本網民選為「最想居住街道」冠軍
商店街好有年輕同生活氣息，物價以東京而言都算相當平

吉祥寺站北面的SUNROAD商店街 左手邊則係另一個商店街ダイヤ街


ダイヤ街曾經經常大排長龍嘅吉祥寺名店 元祖丸メンチカツ さとう
而架只係排咗十個人左右 隔離魚餅鋪反而仲多人排隊

以其牛肉丸而出名(270yen) 另外亦有可樂餅同熟肉可以買
太餓無影到相 借google圖片

的確幾香脆 好有洋蔥味咬落去出哂肉汁

隔離有條窄巷 ハーモニカ横丁(口琴橫丁) 隱藏咗多間酒吧居酒屋，東南亞、港、歐、美式都有
有間奄美大島料理 之後search返居然仲係隈研吾設計
可惜今日仲有地方想去就無試到


去返SUNROAD商店街 有大大個路牌寫明有咩商鋪 設計幾靚

商店街中間有個寺 大門外形有啲特別 不過呢個好似唔係正門

SUNROAD商店街尾有間平價生果店 各款生果都只係200yen上下一袋
可惜一個人食唔到咁多水果

lm

全部都係日本遊記
支持

佢係問你香港咩城市/邊個國家黎呀麻

唔怪得我就算憬官網都買唔飛啦
係咪即係日本個網會check 係咪日本vpn 先俾買？
諗緊係香港仲有咩方法買到

係 官網訂都要VPN
訂完可以2日攞去Lawson攞

Kkday好似都有但唔知work唔work
畢竟要實名登記