我屋企住公屋
老豆地盤佬一個 無乜學歷
老母結婚之後一路無做野，無學識無技能嘅師奶
由細到大都同佢地關係唔係特別親
相對上同老豆關係會好少少
佢地對我嘅了解
都係去到知我讀邊間中學邊間大學
至於讀咩科 我都無同佢地講過
由細到大都無咩資源俾過我
完全係放養式咁養大我
零用錢呢啲奢侈品當然係無啦
記得小學有一次，我見同學學琴
我同我老母講我都想學
佢一句：學咩呀 有咩好學
就完咗呢段對話
甚麼興趣班補習去exchange去旅行咩都無份
其實仲有好多好多呢啲野 唔喺度詳講了
金錢上嘅資源無俾，連精神上嘅支持都無俾過
只係識得拎我同人比，人地個女點點點
小學中學默書考試考到95分
就問點解無100分
考到第二名
就會問點解唔係第一名
喺佢眼中永遠唔會有滿足呢兩隻字
有少少成績/成就 美其名為我自豪
實際上就拎我出去同人打飛機
滿足自己嘅虛榮心
自己另一個仔啲野就收埋唔講
大學畢業後出黎做野
佢曾經有問過我攞家用
我同佢講 要我交家用我就搬出去
我一直以黎都好想搬出去住
我從來無喺佢地身上感受到正常人嘅關懷同愛
本身平時喺屋企大家都無兩句
反而咁樣有返啲距離感，似乎係對大家最好
最近佢間唔中會問我有無拍拖
我平時對感情事一概不提
因為唔想俾佢地批評
喺佢地眼中我係一個A0
而佢最近嘅態度都好似幾想我拍拖，幾正面咁
咁我就一時大意鬆懈咗同佢講咗我拍緊拖
佢第一樣關心嘅就係 對方有無樓
講埋啲咩千祈唔好幫人供樓，最好就層樓都寫埋我個名
我男朋友托賴有層私樓供緊
去到呢度佢嘅態度都幾正面嘅（因為人地有樓）
佢就係咁話要約埋我男朋友出黎食個飯見個面
我男朋友都無咩所謂嘅
終於去到嗰一日
成程氣氛尷尬到 我都唔想再回想起
審犯咁 問人返咩工、之前返過咩工、層樓月供幾錢 etc.
然後又黑口黑面咁
最後知道佢嫌人無錢 因為層樓唔係full pay
我返屋企食飯又俾說話我聽
講埋啲唔知乜水個仔喺邊度有層full pay嘅樓
問我做咩唔揀（我連相都無睇過）
佢已經講到人地非我不娶咁，我係聽到笑咗出聲
又講埋人地係獨生子
全程都只係識講人地有幾多層樓有幾多錢
無提過人地性格學歷興趣（因為佢都唔知）
佢唔在乎個人適唔適合我，我會唔會鍾意
只在乎佢個「未來女婿」有幾多層樓，佢可以拎出去同人打飛機
最好笑係佢叫我唔好再錯落去 要止蝕離場 （講緊同我男朋友一齊）
我覺得好委屈我男朋友
因為我同佢屋企人食飯個陣 大家氣氛都好好
會傾下啲日常生活野、講下未來
亦無人會問我人工幾多 屋企住公屋定私樓
佢阿媽仲成日話要買機票book酒店請我地去旅行
因為呢件事我都同咗兩老嘈交
我同佢地講要求人地有樓有車之前都要睇下自己屋企咩條件
而家係我地屋企條件差過人
但佢地偏偏睇唔到呢一點
唔講仲以為佢地係愛新覺羅汪啲親戚
佢地嘅取態係佢地無錯 佢地想「我」好
仲強烈否認自己淨係講錢
下下都提住人地啲樓，唔係講緊錢唔通講心？
佢仲癲到私底下走去搵我朋友講
我男朋友無錢 層樓要供
又幻想我幫人供樓
順便數臭我無良心無禮貌唔交家用之類啦
總之就受害者上晒身
仲話第時我地結婚係唔會得佢兩老嘅祝福
其實我想講
佢嘅唔出現，就係對我最大嘅祝福
終於呻完 多謝大家睇到呢度
